مەملەكەت باسشىسى قورعانىس ءمينيسترى رۋسلان جاقسىلىقوۆتى قابىلدادى. پرەزيدەنت – قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى قاسىم-جومارت توقايەۆقا قورعانىس ۆەدومستۆوسىنىڭ بيىلعى اتقارعان قىزمەتى تۋرالى ەسەپ بەرىلدى. بۇل تۋرالى اقوردا حابارلادى.
مەملەكەت باسشىسىنا بولىمشەلەردىڭ جاۋىنگەرلىك دايىندىعى مەن قارۋلى كۇشتەر قاتارىنا كۇزگى شاقىرۋ ناۋقانىنىڭ ناتيجەلەرى، سونداي-اق اسكەري قىزمەتتەگى ءتارتىپ پەن قاۋىپسىزدىكتى نىعايتۋعا، اسكەري قىزمەتشىلەردىڭ الەۋمەتتىك مارتەبەسى مەن جالاقىسىن ارتتىرۋعا باعىتتالعان شارالار جونىندە باياندالدى.
«ارميانىڭ جاۋىنگەرلىك الەۋەتىن كەزەڭ-كەزەڭىمەن كوتەرۋ جانە اسكەردى دايارلاۋدىڭ جاڭا تاسىلدەرىنە كوشۋ ماسەلەلەرىنە ايرىقشا نازار اۋدارىلدى. رۋسلان جاقسىلىقوۆ مەملەكەتتىك قورعانىس تاپسىرىسىنىڭ ورىندالۋ بارىسى تۋرالى بايانداپ، اسكەردىڭ قارۋ-جاراق پەن تەحنيكانىڭ جاڭا ۇلگىلەرىمەن، اتاپ ايتقاندا، ۇشقىشسىز باسقارىلاتىن اۆياسيالىق جۇيەلەرىمەن، راديوەلەكتروندىق كۇرەس كەشەندەرىمەن جاراقتاندىرىلىپ جاتقانىن حاباردار ەتتى. بۇدان بولەك، جاۋىنگەرلىك ماشينالاردى جانە بايلانىس قۇرالدارىن جاڭعىرتۋ، راسيوناليزاتورلىق جۇمىستى، سونداي-اق اسكەري ينفراقۇرىلىمدى دامىتۋ ماسەلەلەرى قاراستىرىلدى.
قاسىم-جومارت توقايەۆ ەلىمىزدىڭ بىتىمگەرلىك كونتينگەنتىنىڭ بۇۇ اياسىندا گولان جوتالارىندا اتقارىپ جاتقان قىزمەتى ماڭىزدى ەكەنىن اتاپ ءوتتى»، - دەلىنگەن اقوردا حابارلاماسىندا.
كەزدەسۋ سوڭىندا جوعارعى باس قولباسشى قاسىم-جومارت توقايەۆ مينيسترگە وتاندىق قورعانىس كاسىپورىندارىمەن ءوزارا ىقپالداستىقتى جانداندىرۋ، اۋماقتىق قورعانىس پەن ارنايى وپەراسيا كۇشتەرىن دامىتۋ، الەۋمەتتىك-قۇقىقتىق جۇمىستى كۇشەيتۋ جونىندە ناقتى مىندەتتەر جۇكتەدى.
