ءتۇرلى حالىقارالىق تالداۋ اگەنتتىكتەرىنىڭ دەرەگىنشە، ەلىمىز بىرنەشە جىل بويى ءموبيلدى ينتەرنەت باعاسى ارزان مەملەكەتتەر قاتارىندا كەلە جاتىر. MoneySuperMarket سايتىنىڭ رەيتينگىندە قازاقستان 10-ورىنعا جايعاستى. ءبىرىنشى ورىندا يزرايل 1 گب ينتەرنەت-ترافيك قۇنى 0،13 دوللار، ودان كەيىن قىرعىزستان، ال ۇزدىك ۇشتىكتى يتاليا تۇيىندەيدى.  جالپى العاندا، 20 گب ينتەرنەت-ترافيك ءۇشىن قازاقستاندىقتار 11 دوللار تولەيدى. اقش-تا – 105 دوللار، ال نورۆەگيادا – 106 دوللار. ساراپشىلاردىڭ پىكىرىنشە، ءومىر ءسۇرۋ دەڭگەيى جانە تابىس كولەمى جوعارى ەلدەردە كەز كەلگەن قىزمەت قۇنى سايكەسىنشە كوتەرىڭكى بولادى.

«بۇعان اسەر ەتەتىن تاعى ءبىر اسپەكت – ينفراقۇرىلىم. قۇرىلعان ينفراقۇرىلىم قىمبات بولسا، تۇتىنۋشىلار قالتاسىنا سالماق ءتۇسۋى مۇمكىن. بايلانىس شىعىندارى حالىقتىڭ ورتاشا تابىسىنا بايلانىستى ەسەپتەلەدى. قاي جاعىنان قاراساق تا، قازاقستان باسقا ەلدەرمەن سالىستىرعاندا ينتەرنەت باعاسى ارزان ەل بولىپ سانالادى»، – دەدى سيفرلاندىرۋ سالاسىنداعى ەۋرازيالىق ساراپشىلار جەلىسىنىڭ ءتوراعاسى دميتريي شەدكو.

Finprom.kz سايتىنىڭ مالىمەتىنشە، جىلدام ينتەرنەت قۇنىنىڭ ارزان بولۋىنا سيفرلىق ينفراقۇرىلىمعا مەملەكەت تاراپىنان جاسالىپ جاتقان ينۆەستيسيالار مەن بايلانىس وپەراتورلارىنىڭ جەلىنى كەڭەيتۋ جونىندەگى شارالارىنىڭ ارقاسىندا قول جەتتى. سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنىڭ دەرەگىنشە، بازالىق ستانسا قۇرىلىسىنا شامامەن 500 ملن اقش دوللارى كولەمىندە ينۆەستيسيا قۇيىلعان.

مەملەكەت باسشىسى قاسىم-جومارت توقايەۆ قاۋىپسىزدىك كەڭەسىنىڭ وتىرىسىندا كولىك ءمينيسترى مارات قارابايەۆقا جۇمىس بارىسىندا جىبەرگەن كەمشىلىكتەرى ۇشىنسوگىس جاريالادى، دەپ حابارلايدى اقوردا. 

پرەزيدەنت قاسىم-جومارت توقايەۆتىڭ توراعالىعىمەن قازاقستان رەسپۋبليكاسى قاۋىپسىزدىك كەڭەسىنىڭ كولىك-لوگيستيكا سالاسىن دامىتۋ ماسەلەلەرى جونىندەگى وتىرىسى ءوتتى.

كولىك ءمينيسترى مارات قارابايەۆتىڭ جانە ءبىرقاتار ورتالىق مەملەكەتتىك ورگاندار باسشىلارىنىڭ باياندامالارى تىڭدالدى.

مەملەكەت باسشىسى كولىك سالاسىنداعى احۋالدى سىنعا الدى. قوردالانعان پروبلەمالار مەن بەلگىلەنگەن مەجەلەردىڭ ورىندالماۋى جاڭعىرتۋ جۇمىستارىن جۇرگىزۋگە كەدەرگى كەلتىرىپ وتىر.

پرەزيدەنت شەكارادان جۇك وتكىزۋدىڭ قيىندىعىن، كوپتەگەن وتكىزۋ بەكەتتەرىنىڭ جاعدايى ناشار ەكەنىن، سونداي-اق ءىرى ينفراقۇرىلىمدىق-ترانزيتتىك جوبالاردىڭ ءوز ۋاقىتىنان كەشىگىپ جاتقانىن ايتتى.

قاسىم-جومارت توقايەۆ «جاسىل ءدالىز» جۇيەسىن ۇيىمداستىرىپ، ەلىمىزدىڭ لوگيستيكالىق الەۋەتىن وڭتايلى پايدالانۋدىڭ ماڭىزىنا توقتالدى. ونىڭ ايتۋىنشا، جاھاندىق سىن-قاتەرلەر كۇشەيگەن كەزەڭدە قازاقستان ءوزىنىڭ باسەكەلەستىك ارتىقشىلىعىن ساقتاپ قانا قويماي، ونى نىعايتا تۇسۋگە ءتيىس.

مەملەكەت باسشىسى جۇك تاسىمالى كولەمىن ارتتىرۋ ءۇشىن نارىقتى اۆياوتىنمەن جەتكىلىكتى دەڭگەيدە قامتاماسىز ەتۋ قاجەت دەپ سانايدى.

بۇدان بولەك، مۋلتيپليكاتيۆتىك تيىمدىلىكتى كوتەرۋ ماقساتىندا ەلىمىز ارقىلى وتەتىن جۇك تاسىمالى كولەمىن ۇلعايتۋ، سونىڭ ىشىندە الەمدىك جەتكىزۋ تىزبەگىنە قوسىلۋ مىندەتى قويىلدى.

جيىن سوڭىندا پرەزيدەنت مينيستر مارات قارابايەۆقا جۇمىس بارىسىندا جىبەرگەن كەمشىلىكتەرى ءۇشىن سوگىس جاريالادى.

مەملەكەت باسشىسى كولىك-لوگيستيكا سالاسىنداعى پروبلەمالاردى شەشۋگە قاتىستى ناقتى شارالار قابىلداۋدى تاپسىردى.

قاسىم-جومارت توقايەۆ اقوردادا حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونسپەن جانە ازيا پاراليمپيادا كوميتەتىنىڭ پرەزيدەنتى مادجيد راشەدپەن كەزدەستى، دەپ حابارلايدى اقوردانىڭ باسپا ءسوز قىزمەتى.

مەملەكەت باسشىسى پاراليمپيادا قوزعالىسىنىڭ ماڭىزدى ميسسياسىن جوعارى باعالاپ، ەلىمىز وسىناۋ ىزگى ماقساتتى قۋاتتايتىنىن اتاپ ءوتتى.

پرەزيدەنت وتاندىق پاراليمپياداشىلاردىڭ الەمدىك ارەناداعى تابىستارى قازاقستاننىڭ ينكليۋزيۆتى، ورنىقتى جانە الەۋمەتتىك جاۋاپكەرشىلىك ارقالاعان مەملەكەت رەتىندەگى كەلبەتىن قالىپتاستىرۋعا ىقپال ەتەتىنىن جەتكىزدى.

— ورايلى ءساتتى پايدالانىپ، بۇكىل الەمدە، ازيا قۇرلىعىندا جانە قازاقستاندا پاراليمپيادا قوزعالىسىن ىلگەرىلەتۋ باعىتىندا اتقارىپ جاتقان جۇمىستارىڭىزعا ريزاشىلىعىمدى بىلدىرەمىن. سىزدەرمەن سەنىمدى سەرىكتەس بولۋعا ءازىرمىز. كەلەشەكتە قوزعالىستى دامىتىپ، نىعايتۋ ماقساتىندا بىرلەسىپ كوپ جۇمىس ىستەيتىنىمىزگە كۇمان جوق، — دەدى پرەزيدەنت.

ەندريۋ پارسونس پەن مادجيد راشەد پاراليمپيادا سپورتىنا جانە استانادا ازيا پاراليمپيادا كوميتەتى باس اسسامبلەياسىنىڭ 8ء-شى سەسسياسىن ۇيىمداستىرۋعا كورسەتكەن قولداۋى ءۇشىن قاسىم-جومارت توقايەۆقا العىس ايتتى.

ولار قازاقستاندا پاراليمپيادا قوزعالىسى بارشاعا بىردەي مۇمكىندىك قاعيداتى اياسىندا جوسپارلى ءارى دايەكتى تۇردە دامىپ كەلە جاتقانىنا نازار اۋداردى.

— سوڭعى جىلدارى ءبىز ەلەۋلى پروگرەسس پەن ەرەن تابىستارعا كۋا بولدىق. پاريجدە وتكەن پاراليمپيادا ويىندارىندا قازاقستان كەرەمەت ناتيجە كورسەتتى. سپورتشىلارىڭىز توعىز مەدال جەڭىپ الدى. سونىڭ ىشىندە العاش رەت ەكى اتلەت التىن مەدالعا يە بولدى. قازاقستان سپورتشىلارى وزدەرىنە دەيىنگى اتلەتتەردىڭ ءىزىن جالعاپ، وسكەلەڭ ۇرپاقتى جىگەرلەندىرىپ كەلەدى. بۇل كەزدەيسوقتىق ەمەس، جۇيەلى جۇمىس پەن دۇرىس تاڭدالعان باعداردىڭ ناتيجەسى. ءبىز قازاقستاننىڭ پاراليمپيادالىق سپورت تۇرلەرىن دامىتۋ نيەتىن جوعارى باعالايمىز، — دەدى حالىقارالىق پاراليمپيادا كوميتەتىنىڭ پرەزيدەنتى ەندريۋ پارسونس.

مادجيد راشەد 2018 جىلى استاناعا كەلگەنىن، قازاقستانداعى پاراسپورتشىلاردىڭ جاتتىعۋىنا جاسالعان قولايلى جاعدايمەن تانىس ەكەنىن ايتتى.

— دەلەگاسيامىزعا استانا ۇناپ جاتىر. ءبىزدى جىلى شىرايمەن قارسى الدى. جەرگىلىكتى حالىقتىڭ كەڭ پەيىلىنىڭ ارقاسىندا قازاقستاندا ءوز ۇيىمىزدە جۇرگەندەي سەزىنەمىز، — دەدى ازيا پاراليمپيادا كوميتەتىنىڭ پرەزيدەنتى.

كەزدەسۋدە ەلىمىزدە APC جانە IPC جارىستارىن وتكىزۋ ماسەلەلەرى تالقىلاندى. سونداي-اق وتاندىق پاراليمپياداشىلاردىڭ ءبىلىم بەرۋ باستامالارى مەن حالىقارالىق باعدارلامالارعا قاتىسۋى پىسىقتالدى.

بۇگىندە ەلىمىزدە 19 پاراليمپيادالىق سپورت ءتۇرى قارقىندى دامىپ كەلەدى. جىل سايىن ءتۇرلى دەڭگەيدەگى 800-دەن اسا جارىس وتكىزىلەدى. وعان 10 مىڭنان ارتىق ادام قاتىسادى. ۇلتتىق قۇراما ساپىندا 1 مىڭنان استام سپورتشى بار.