پرەزيدەنت UAE SWAT Challenge سايىسىندا توپ جارعان كۇشتىك قۇرىلىمداردىڭ ءبىر توپ وفيسەرىن ماراپاتتاۋ راسىمىندە ءسوز سويلەدى. بۇل تۋرالى اقوردا حابارلادى.
بيىل دۋبايدا وتكەن ءدۇبىرلى دوداعا قازاقستان اتىنان 12 كوماندا قاتىسقان. ىشكى ىستەر مينيسترلىگىنىڭ «سۇڭقار» جانە «توميريس» كوماندالارى حالىقارالىق جارىستىڭ كۇمىس جۇلدەگەرى اتاندى. ال ۇلتتىق قاۋىپسىزدىك كوميتەتىنىڭ «ارىستان» كومانداسى ءتورتىنشى ورىنعا يە بولدى. مەملەكەتتىك كۇزەت قىزمەتى مەن قورعانىس مينيسترلىگىنىڭ كوماندالارى دا شەبەرلىكتىڭ ۇزدىك ۇلگىسىن كورسەتتى.
مەملەكەت باسشىسى جەڭىمپازداردى قۇتتىقتاپ، بۇل تابىس تياناقتى دايىندىق پەن قاجىرلى ەڭبەكتىڭ ناتيجەسى ەكەنىن اتاپ ءوتتى.
– «ەلدىڭ اتىن ەر شىعارار» دەگەن. سايىپقىران ساربازدارىمىز كوك تۋىمىزدى اسقاق جەلبىرەتتى. تورتكۇل دۇنيە جاۋىنگەرلەرىمىزدىڭ مىقتىلىعىنا كۋا بولدى. ءبىز سىزدەردى ماقتان تۇتامىز. وسىنداي جەڭىستى ساتتەر بارشا حالقىمىزدىڭ، اسىرەسە، وسكەلەڭ ۇرپاقتىڭ رۋحىن كوتەرەدى. ەل قورعانى مىقتى بولسا، قازاقستاننىڭ ەڭسەسى ءاردايىم بيىك بولماق، – دەدى قاسىم-جومارت توقايەۆ.
مەملەكەت باسشىسى حالقىمىزدىڭ ەرلىك ءداستۇرى تەرەڭدە جاتقانىنا نازار اۋداردى.
– بيىل ۇلى جەڭىستىڭ 80 جىلدىعىن اتاپ وتەمىز. بۇل – بوستاندىق پەن ادىلدىك ۇعىمدارىن تۋ ەتىپ، مايداندا جانقيارلىقپەن شايقاسقان، تىلدا ەڭبەك ەتكەن بارشا قازاقستاندىقتارعا كورسەتىلگەن قۇرمەت. باتىرلارىمىزدىڭ تەڭدەسسىز ەرلىگىن ۇرپاق جادىندا ساقتاۋ – پارىزىمىز. بۇگىندە سىزدەر جاۋىنگەر حالىقتىڭ ۇرپاعى رەتىندە وتان الدىنداعى قاسيەتتى پارىزدى تەرەڭ ءتۇسىنىپ، ادال قىزمەت ەتىپ جۇرسىزدەر. ءبارىڭىز دە ەلىمىزدەگى بەيبىت ءومىردى ساقتاۋ ءۇشىن تاباندى ەڭبەك ەتىپ كەلەسىزدەر. سىزدەردى زاڭ مەن ءتارتىپ ساقشىسى دەۋگە تولىق نەگىز بار. زاڭ مەن ءتارتىپ – ادىلەتتى ءارى ءقاۋىپسىز مەملەكەتتىڭ وزەگى، – دەدى پرەزيدەنت.
قاسىم-جومارت توقايەۆ ەل تىنىشتىعىن كۇزەتكەن ارناۋلى قىزمەتتەر مەن كۇشتىك قۇرىلىمداردىڭ اتقارعان ىستەرىنە توقتالدى.
– بىلتىر ۇلتتىق قاۋىپسىزدىك كوميتەتى زاڭسىز ارەكەتتەردىڭ الدىن الۋ ءۇشىن جيىرمادان استام جەدەل جاۋىنگەرلىك ءىس-شارا وتكىزدى. ەكى تەررورلىق اكتىنىڭ جولىن كەسىپ، قاسكويلەرگە توسقاۋىل قويدى. ۇلتتىق ۇلان جاساقتارى توتەنشە جاعدايلاردىڭ سالدارىن جويۋعا بەلسەنە اتسالىستى. ىشكى ىستەر مينيسترلىگىنىڭ قۇرىلىمدارى اۋقىمدى جۇمىس اتقارىپ جاتىر. وتكەن جىلى ەسىرتكى وندىرەتىن 64 ورىن جابىلدى. 22 مىڭ توننا ەسىرتكى تاركىلەندى. ەسىرتكىنى جارنامالاعان 7،5 مىڭ سايت بۇعاتتالدى. ەكى ميلليارد تەڭگەدەن استام قارجىنى شەتەلگە شىعارماق بولعان الاياقتاردىڭ جولى كەسىلدى. سوڭعى ءۇش جىلدا 8 مىڭعا جۋىق ءتۇرلى قارۋ-جاراق تابىلدى. مۇنداي مىسالدار وتە كوپ. ارناۋلى قىزمەت قاتارىنداعى مىڭداعان سارباز مەملەكەتتىڭ ەگەمەندىگى مەن ازاماتتاردىڭ قاۋىپسىزدىگىن قورعاپ ءجۇر. جاۋىنگەرلەرىمىز قاشاندا وتان الدىنداعى انتىنا ادال، – دەدى مەملەكەت باسشىسى.
پرەزيدەنت ءقازىر كەيبىر مەملەكەتتەر، ءتىپتى الپاۋىت ەلدەر سىرتقى جانە ىشكى ساياساتىنداعى ۇستانىمدارىن قايتا قاراپ جاتقانىن مىسالعا الىپ، قازاقستان ءداستۇرلى ءارى زاماناۋي قۇندىلىقتاردى تەڭ ۇستايتىن پراگماتيزمگە الدەقاشان بەت بۇرعانىن جەتكىزدى.
– زاڭ مەن ءتارتىپ ۇستەمدىگىن ورناتۋ ماڭىزدى ەكەنىن ءاردايىم ايتىپ ءجۇرمىز. ۋاقىت ءبىزدىڭ ۇستانىمدارىمىز بەن ستراتەگيالىق باعدارىمىزدىڭ دۇرىس ەكەنىن كورسەتتى. سوندىقتان ءبىز الداعى ۋاقىتتا دا ۇلتتىق مۇددەمىزدى قورعاپ، ەلىمىزگە لايىقتى بىرەگەي جولمەن جۇرەمىز. جالپىۇلتتىق قۇندىلىقتارىمىزدى دارىپتەيمىز. ەشكىمگە جالتاقتاماي، ءوز ساياساتىمىزدى جۇرگىزەمىز. ويتكەنى ءبىزدىڭ ماقساتىمىز – ايقىن. بۇل – قۋاتتى جانە وركەندەگەن قازاقستاندى قۇرۋ، – دەدى قاسىم-جومارت توقايەۆ.
پرەزيدەنت ءسوزىن قورىتىندىلاي كەلە، وفيسەرلەردىڭ قىزمەتىنە ساتتىلىك تىلەدى جانە ولاردى مەملەكەتتىك ناگرادالارمەن ماراپاتتادى. جيىندا ق ر ىشكى ىستەر مينيسترلىگىنىڭ «سۇڭقار» كومانداسىنىڭ مۇشەسى، پوليسيا اعا لەيتەنانتى ەرمەكقالي شوقايەۆ، ىشكى ىستەر مينيسترلىگى «توميريس» كومانداسىنىڭ كاپيتانى، پوليسيا مايورى ايناگۇل بايجىگىتوۆا جانە ق ر مەملەكەتتىك كۇزەت قىزمەتىنىڭ كاپيتانى، «ساردار ا» كومانداسىنىڭ مۇشەسى مەرلان ۇلتانبايەۆ ءسوز سويلەدى.
