قوعامنىڭ تۇراقتى دامۋى مەن ازاماتتاردىڭ ءقاۋىپسىز ءومىر ءسۇرۋى ەڭ الدىمەن زاڭ ۇستەمدىگىنە، ءتارتىپ پەن جاۋاپكەرشىلىككە تىكەلەي بايلانىستى. قۇقىقتىق مادەنيەتى جوعارى، سانالى ءارى بەلسەندى جاس ۇرپاق - ادىلەتتى قوعامنىڭ نەگىزگى تىرەگى. وسى ماقساتتا «زاڭ مەن ءتارتىپ» يدەولوگەماسى اياسىندا جەتىسۋ وبلىسىندا «Legal Talk: اشىق ميكروفون» فورماتىنداعى جاستار فورۋمى وتكىزىلدى. اتالعان فورۋم جاستار مەن مەملەكەتتىك ورگاندار اراسىنداعى اشىق ديالوگتى نىعايتۋعا، قۇقىقتىق ساۋاتتىلىقتى ارتتىرۋعا جانە قوعامداعى وزەكتى قۇقىقتىق ماسەلەلەردى بىرلەسە تالقىلاۋعا باعىتتالعان ماڭىزدى الاڭعا اينالدى.
فورۋم اشىق ميكروفون فورماتى بولدى. بۇل فورمات قاتىسۋشىلارعا ءوز ويلارىن ەركىن بىلدىرۋگە، كوكەيىندە جۇرگەن سۇراقتارىن تىكەلەي سالا ماماندارىنا قويۋعا جانە ناقتى، تۇسىنىكتى جاۋاپ الۋعا مۇمكىندىك بەردى. ءىس-شارا بارىسىندا زاڭ مەن ءتارتىپ، قوعامدىق قاۋىپسىزدىك، جاستاردىڭ قۇقىقتارى مەن مىندەتتەرى، ينتەرنەت كەڭىستىگىندەگى قاۋىپتەر، قۇقىق بۇزۋشىلىقتاردىڭ الدىن الۋ تاقىرىپتارى كەڭىنەن قوزعالدى.
فورۋمعا سپيكەر رەتىندە جەتىسۋ وبلىسى اكىمىنىڭ ورىنباسارى ەسداۋلەتوۆ دياس راحمەت ۇلى، جەتىسۋ وبلىسىنىڭ پروكۋرورى جۇماقانوۆ باۋىرجان البەرت ۇلى، جەتىسۋ وبلىسىنىڭ ەكونوميكالىق تەرگەپ-تەكسەرۋ دەپارتامەنتىنىڭ باسشىسى تيۋمەلييەۆ ەركىن امانگەلدى ۇلى، جەتىسۋ وبلىسى پوليسيا دەپارتامەنتى باستىعىنىڭ ورىنباسارى بايكەنوۆ جاسۇلان قۇدايبەرگەن ۇلى قاتىستى.
سالا ماماندارى جاستارمەن اشىق پىكىر الماسىپ، ءوز تاجىريبەلەرىمەن ءبولىسىپ، قۇقىقتىق مادەنيەتتى قالىپتاستىرۋداعى وزەكتى باعىتتارعا توقتالدى.
ءىس-شارا بارىسىندا ينتەراكتيۆتى ويىن ۇيىمداستىرىلىپ، 1-ورىن يەلەنگەن قاتىسۋشىعا العىس حات پەن سىيلىق تابىستالدى. قاتىسۋشىلاردىڭ بەلسەندىلىگى مەن قىزىعۋشىلىعىن ارتتىرۋعا ەرەكشە كوڭىل ءبولىندى. بۇل جاستاردىڭ قۇقىقتىق تاقىرىپتارعا دەگەن كوزقاراسىن جەڭىل ءارى تۇسىنىكتى فورماتتا قالىپتاستىرۋعا ىقپال ەتتى.
اتالعان فورۋم جۇمىسىنا 200-گە جۋىق جاس تارتىلدى. فورۋم جاستاردىڭ ازاماتتىق ۇستانىمىن نىعايتۋعا، زاڭعا قۇرمەتپەن قاراۋعا تاربيەلەۋگە جانە قوعامدىق ءتارتىپتى كۇشەيتۋگە باعىتتالعان جۇيەلى جۇمىستىڭ ماڭىزدى بولىگى بولدى. بۇل - تەك پىكىر الماسۋ الاڭى عانا ەمەس، جاۋاپكەرشىلىگى جوعارى، سانالى قوعام قالىپتاستىرۋ جولىنداعى ناقتى قادام.
ءى. جانسۇگىروۆ اتىنداعى جەتىسۋ ۋنيۆەرسيتەتىنىڭ ستۋدەنتى اقەركە ەسقارايەۆانىڭ ايتۋىنشا، ءىس-شارا وتە قىزىقتى ءارى مازمۇندى ءوتتى.
- قۇقىق قورعاۋ ورگاندارىنىڭ باسشىلارى مەن وبلىس اكىمى ورىنباسارىنىڭ جاستارمەن كەزدەسۋگە ارنايى كەلۋى ەرەكشە اسەر قالدىردى. ولار قويىلعان سۇراقتارعا اشىق تۇردە جاۋاپ بەرىپ، كۇردەلى تاقىرىپتاردان قاشقان جوق. مۇنداي فورمات زاڭ مەن ءتارتىپتىڭ ءىس جۇزىندە قالاي جۇمىس ىستەيتىنىن تەرەڭىرەك تۇسىنۋگە مۇمكىندىك بەرەدى. اسىرەسە دروپپەرلىك تاقىرىپتىڭ تالقىلانۋى ەستە قالدى، سەبەبى بۇل قازىرگى جاستار ءۇشىن وزەكتى ماسەلە. كوپ جاعدايدا ونىڭ سالدارىنا ءمان بەرىلمەي جاتادى، سوندىقتان مۇنداي ءتۇسىندىرۋ جۇمىستارى وتە ماڭىزدى. وسىنداي جاستارمەن اشىق كەزدەسۋلەر الداعى ۋاقىتتا دا ءجيى ۇيىمداستىرىلسا دەگەن ويىمىز بار، - دەدى ول.
