ىستانبۇلدا قازاقستاننىڭ ساۋدا-ەكونوميكالىق ميسسياسى ءوتتى. شارا ەلىمىزدىڭ يندۋستريا جانە ينفراقۇرىلىمدىق دامۋ مينيسترلىگى،  «اتامەكەن» ۇلتتىق كاسىپكەرلەر پالاتاسى، قازاقستاننىڭ تۇركيا رەسپۋبليكاسىنداعى ەلشىلىگى، قازاقستاننىڭ سىرتقى ساۋدا پالاتاسى جانە تۇركيانىڭ ساۋدا پالاتالارى مەن بيرجالار وداعىنىڭ قولداۋىمەن ۇيىمداستىرىلدى.

قازاقستاننىڭ تۇركيا رەسپۋبليكاسىنداعى ەلشىلىگىنىڭ فەيسبۋكتەگى رەسمي پاراقشاسىندا جاريالانعان  مالىمەت بويىنشا، ساۋدا ميسسياسىنا قازاقستاندىق جانە تۇرىك كومپانيالارىنىڭ 150-دەن استام وكىلدەرى قاتىستى. سونىڭ ىشىندە 30 قازاقستاندىق وڭدەلگەن ءونىم ەكسپورتتاۋشىسى بولدى.

ساۋدا ميسسياسى بارىسىندا قازاقستاننىڭ ەكسپورتتىق جانە ينۆەستيسيالىق مۇمكىندىكتەرى، سونداي-اق، ەلدەگى بيزنەس جۇرگىزۋ ءتارتىبى، ەكسپورتتاۋشىلار مەن شەتەلدىك ينۆەستورلارعا كورسەتىلەتىن مەملەكەتتىك قولداۋ شارالارى مەن جالپى ساۋدا جۇرگىزۋدى ىنتالاندىرۋدىڭ ءتۇرلى قۇرالدارى تۋرالى باياندامالار جاسالدى.

ءىس-شارا بارىسىندا قازاقستان رەسپۋبليكاسىنىڭ تۇركيا رەسپۋبليكاسىنداعى ەلشىسى ابزال ساپاربەك ۇلى سويلەگەن سوزىندە تۇركيا قازاقستاننىڭ ماڭىزدى ستراتەگيالىق ءارى باستى ساۋدا-ەكونوميكالىق جانە ينۆەستيسيالىق سەرىكتەستەرىنىڭ ءبىرى ەكەنىن اتاپ ءوتتى. سونداي-اق، ەلشى ەكى جاقتى ساۋدانىڭ 1992 جىلعى 30 ميلليون اقش دوللارى كورسەتكىشىنەن بۇگىنگى تاڭدا 2 ميلليارد دوللارعا جەتىپ وتىرعانىن ايتىپ كەتتى.

سونىمەن قاتار، ا. ساپاربەك ۇلى تاۋەلسىزدىك جىلدارىندا تۇركيا قازاقستان ەكونوميكاسىنا 3،8 ميدديارد دوللار شاماسىندا ينۆەستيسيا قۇيعانىن جانە قازىرگى تاڭدا قازاقستان ەكونوميكاسىنىڭ ءتۇرلى سالالارىندا تۇرىك كاپيتالىنىڭ قاتىسۋىمەن 2200-گە جۋىق كاسىپورىن جۇمىس ىستەپ جاتقانىن ايتتى.

ق ر يندۋستريا جانە ينفراقۇرىلىمدىق دامىتۋ مينيسترلىگىنىڭ جاۋاپتى حاتشىسى مەرەكە پشەمبايەۆ ءوز سوزىندە قازاقستاننىڭ تۇركياعا اۋىل شارۋاشىلىعى، ەت ونىمدەرى، مەتال جانە مەتال ونىمدەرى، حيميا ونەركاسىبى ونىمدەرى، ماشينالار مەن قۇرىلعىلار، دارى-دارمەك، ازىق-تۇلىك جانە ت.ب. سالالاردىڭ ەڭ پەرسپەكتيۆالى 47 تاۋارلىق ءونىمىن جەتكىزۋگە دايىن ەكەندىگىن مادىمدەدى.

ق ر «اتامەكەن» ۇلتتىق كاسىپكەرلەر پالاتاسى باسقارماسىنىڭ ءتوراعاسى ابىلاي مىرزاحمەتوۆ اشىلۋ سوزىندە تۇرىك كاسىپكەرلەرىن ينۆەستيسيالىق ىنتىماقتاستىققا شاقىرا وتىرىپ، قازاقستان ارقىلى رەسەي جانە ەاەب نارىقتارىنا شىعۋعا بولاتىندىعىن جانە قازاقستانداعى ينۆەستيسيالىق ورتانىڭ ايماقتاعى ەڭ ءتيىمدى ەكەنىن العا تارتتى.

ساۋدا ميسسياسى شەڭبەرىندە قازاقستان جانە تۇرىك كاسىپكەرلەرى اراسىندا ۆ2ۆ فورماتىندا ەكى جاقتى كەلىسسوزدەر وتكىزىلىپ، سونىڭ ناتيجەسىندە ءبىرقاتار قازاقستاندىق ءونىمنىڭ تۇرىك نارىعىنا شىعارىلۋى بويىنشا كەلىسىمدەرگە قول جەتكىزىلدى.

سونداي-اق، ءىس-شارالار اياسىندا تۇركى ساۋدا-ونەركاسىپ پالاتاسى مەن قازاقستان-تۇركيا بىرىككەن پالاتاسىنىڭ العاشقى وتىرىستارى وتكىزىلدى. ءازىربايجان، قازاقستان، قىرعىزستان جانە تۇركيا مۇشە بولىپ تابىلاتىن بۇل پالاتا مۇشە مەملەكەتتەردىڭ كاسىپكەرلەرى اراسىنداعى ەكونوميكالىق بايلانىستى نىعايتۋدى جانە ەكى ەل اراسىنداعى تاۋار اينالىمىنىڭ ءوسۋىن كوزدەيدى.

قازاقستان-تۇركيا بىرىككەن پالاتاسىنىڭ العاشقى وتىرىسىندا قازاقستان رەسپۋبليكاسىنىڭ تۇركيا رەسپۋبليكاسىنداعى توتەنشە جانە وكىلەتتى ەلشىسى ابزال ساپاربەك ۇلى سويلەگەن سوزىندە بۇل پالاتانىڭ قازاقستان رەسپۋبليكاسى تۇڭعىش پرەزيدەنتى – ەلباسى نۇرسۇلتان نازاربايەۆتىڭ 2018 جىلعى 13 قىركۇيەكتە انكاراعا جاساعان ساپارى بارىسىندا قۇرىلعانىن جانە ەكى ەل اراسىنداعى ساۋدا-ەكونوميكالىق، ينۆەستيسيالىق جانە تەحنولوگيالىق ىنتىماقتاستىقتى ىنتالاندىرۋ جانە نىعايتۋدى كوزدەيتىنىن اتاپ ءوتتى.