پاۆلودار، اقتوبە جانە قوستاناي قالاسىندا «مۋلتيمەديالىق جۋرناليستيكا: ساپالى كونتەنت دايىنداۋ ماسەلەلەرى» اتتى ءبىر كۇندىك سەمينار-ترەنينگ بولىپ ءوتتى. قازاق ءتىلدى جۋرناليستەردىڭ بىلىكتىلىگىن ارتتىرۋ (ERG) ەۋرازيالىق توپقا قاراستى «ERG كومەك» كورپوراتيۆتىك قورىنىڭ وڭىرلىك جۋرناليستيكانى دامىتۋعا باعىتتالعان شارالارىنىڭ ءبىرى.
ءۇش قالادا وتكەن تەگىن سەمينار-ترەنينگكە ءار قالادان جەرگىلىكتى باق-تاردا جۇمىس ىستەيتىن 20-دان استام جۋرناليست قاتىسىپ وتىردى. ولارعا قاينار ولجاي، مەيرامحان جاپەك، ەربول ازانبەك، نۇرلان جاناي مەن ەرجان قالىمباي ۇلى سىندى مەديا ترەنەرلەر مۋلتيمەديالىق جۋرناليستيكاعا قاتىستى ساباقتار بەردى. سونىمەن قاتار، قازاق ءتىلدى جۋرناليستيكاداعى ەڭ وزەكتى تاقىرىپتاردىڭ ءبىرى — ساپالى كونتەنت جاساۋدىڭ قىر-سىرىن ۇيرەتتى. سەمينار-ترەنينگ باعدارلاماسى شەڭبەرىندە ترەنەرلەر مۋلتيمەديالىق كونتەنت قالاي جاسالاتىنىن، ونى جاساۋدىڭ جولدارىن كورسەتتى. سونىمەن قاتار، جۋرناليستەرگە ماقالانى ساۋاتتى جازۋ، تاقىرىپ قويۋ، ستيليستيكالىق ەرەكشەلىكتەر مەن اقپاراتتى ۆيزۋاليزاسيالاۋ، ىسكەرلىك جۋرناليستيكا، ديدجيتال جۋرناليستيكا تاقىرىپتارىنا قاتىستى ساباقتار بەرىلدى. قاتىسۋشىلار مەديا ترەنەرلەرگە وزدەرىن تولعاندىرعان ساۋالدارىن قويىپ، جاۋاپ الدى. جۋرناليستەردىڭ تەوريالىق جانە تاجىريبەلىك بىلىكتىلىگىن ارتتىرۋعا ارنالعان شاراعا قاتىسقاندارعا ارنايى سەرتيفيكاتتار مەن سىيلىقتار تابىس ەتىلدى. سونىمەن قاتار، جەرگىلىكتى جۋرناليستەرگە بەلگىلى جۋرناليست ەربول ازانبەكتىڭ جەتەكشىلىگىمەن جارىق كورگەن «ىسكەرلىك جۋرناليستيكا» كىتابى دا تارتۋ ەتىلدى. ۇيىمداستىرۋشىلار قازاق مەديا نارىعىندا الداعى جىلدارى ساپالى كونتەنت جاساۋ ماسەلەسى وزەكتى تاقىرىپقا اينالارىنا سەنىمدى. ارزان شوۋ مەن دابىراسى قالىڭ دۇنيەلەر جانە حايپقا باعىتتالعان باعدارلامالاردان حالىق جالىعا باستادى. ءوز ءوزىن وسىرگىسى كەلەتىن، تۇلعالىق دامىپ، رۋحاني كەمەلدەنگىسى كەلەتىن تۇتىنۋشىلاردى قازاق تىلىندەگى ساپالى اقپاراتپەن قامتاماسىز ەتۋدە ب ا ق ءالى قاۋاقارسىزدىق تانىتىپ كەلەدى. كوپتەگەن سالادا اقپارات مۇلدە تاپشى. سالالىق، ساپالىق اقپاراتتارعا سۇرانىس تا كۇن ساناپ ارتۋدا.
مەديا ترەنەرلەردىڭ ءبىرى، بەلگىلى پۋبليسيست قاينار ولجايدىڭ ايتۋىنشا، مۇنداي شارالار اسىرەسە، وڭىردەگى قازاق ءتىلدى جۋرناليستەردىڭ دامۋىنا وڭ ىقپال ەتىپ، زامانعا ساي ىلگەرلەۋىنە ءوز سەپتىگىن تيگىزەدى. ال سەمينار-ترەنينگتەرگە دەمەۋشىلىك تانىتقان ERG كومپانياسىنىڭ وكىلى جانبولات سەرىكباي ۇلىنىڭ سوزىنشە، بۇعان دەيىن قازاق ءتىلدى جۋرناليستەردى وقىتۋ شاراسىنىڭ فورماتى سان ءتۇرلى بولىپ كەلگەن. بىلتىر ەلورداعا ءبىراز وڭىرلەردەن جۋرناليستەر الدىرتىپ، وقىتقان. ءبىراق، سوڭعى جىلدارى ءبىر ادامنىڭ سەمينار-ترەنينگكە بىرنەشە رەت قاتىسۋى، كومپانيانىڭ جۇلدەسىن دە بىرنەشە دۇركىن الۋى سەكىلدى ۇردىستەر بايقالعان. سوندىقتان بيىلدان باستاپ ايماقتارعا شىعىپ، بارىنشا جەرگىلىكتى جۋرناليستەردى مولىنان قامتىپ، وقىتۋدى ءجون كورگەن. شارانى ۇيىمداستىرۋشى «التىن قازىنا» قوعامدىق بىرلەستىگىنىڭ وكىلى جانبولات تاۋەلدىڭ ايتۋىنشا، قاراشا-جەلتوقسان ايىندا ءۇش قالادا وتكەن جۋرناليستەردىڭ بىلىم-بىلىگىن ارتتىرۋعا ارنالعان سەمينار-ترەنينگكە بارلىعى 70-تەن استام جۋرناليست قاتىسقان. ءار قالاعا 20 ورىن بەلگىلەنگەنىنە قاراماستان، كەي قالادا قاتىسۋشىلار سانىن ودان اسىرىپ جىبەرۋگە تۋرا كەلگەن. سەبەبى، قىزىعۋشىلىق تانىتقان جەرگىلىكتى جۋرناليستەردىڭ قاراسى مول بولعان.
EURASIAN RESOURCES GROUP تۋرالى انىقتاما
Eurasian Resources Group (ERG) – كاسىپورىندارى قازىپ شىعارۋ، وڭدەۋ، ەنەرگەتيكا، لوگيستيكا جانە ماركەتينگ سالالارىندا تولىق بىرىكتىرىلگەن، تابيعي قورلاردى وڭدەيتىن الەمدەگى ەڭ ءىرى ءارتاراپتاندىرىلعان كومپانيالاردىڭ ءبىرى بولىپ تابىلادى. ءتورت قۇرلىقتا ورنالاسقان 14 ەلدە ەۋرازيالىق توپتىڭ كاسىپورىندارى مەن بيزنەستى دامىتۋ جوبالارى جۇمىس ىستەۋدە. كومپانيا ءوز سالاسى بويىنشا ەڭ ءىرى جۇمىس بەرۋشىلەردىڭ ءبىرى. 2014 جىلى Eurasian Resources Group 20 جىلدىق مەرەيتويىن اتاپ ءوتتى. باسقارۋشى كومپانيانىڭ باس كەڭسەسى ليۋكسەمبۋرگتە ورنالاسقان.
بۇگىندە ERG فەرروحروم ءوندىرۋ جونىنەن جانە تەمىر كەنىن جەتكىزۋشى الەمدىك دەڭگەيدەگى ءىرى كومپانياعا اينالدى. ەۋرازيالىق توپ سونداي-اق، دۇنيە جۇزىندەگى اليۋمينيي شيكىزاتىن ءوندىرۋشى كومپانيالاردىڭ وندىعىنا كىرەدى جانە مىس پەن كوبالتتى جەتكىزۋشى ءىرى كومپانيالار قاتارىندا.
ERG – قازاقستاننىڭ تاۋ-كەن، مەتاللۋرگيا سالاسىنىڭ ۇشتەن ءبىرىن قۇرايدى. سونىمەن قاتار، ERG – ورتالىق ازياداعى ەلەكتر قۋاتىن نەگىزگى جەتكىزۋشىلەردىڭ ءبىرى جانە ءىرى تەمىر جول وپەراتورى. قازاقستاندا ەۋرازيالىق توپ پەن ەلىمىز ءۇشىن اسا ماڭىزدى كاسىپورىندار ورنالاسقان. ولار: كازحروم تۇك، سوكولوۆ-سارىباي كەن-بايىتۋ وندىرىستىك بىرلەستىگى (سسكوب)، قازاقستان ءاليۋمينييى، قازاقستان ەلەكتروليز زاۋىتى (قەز)، ەۋروازياتتىق ەنەرگەتيكالىق كورپوراسياسى (ەەك)، «شۇباركول كومىر» جانە «ترانسكوم» كولىكتىك توبى. قازاقستانداعى ERG كاسىپورىندارىندا 61 مىڭ ادام جۇمىس ىستەيدى.
كونگو دەموكراتيالىق رەسپۋبليكاسىندا ERG – Boss Mining، Frontier جانە Comide كاسىپورىندارىندا مىس جانە كوبالت كەنىن ءوندىرىپ، وڭدەيدى. اتالعان ەلدە سونداي-اق، Metalkol Roan Tailings Reclamation (RTR) سەكىلدى اياقتالۋعا جاقىن بىرنەشە جوبالار جۇزەگە اسىرىلۋدا.
ERGء-دىڭ مىس بالقىتۋ زاۋىتى Chambishi Metals PLC – زامبياداعى جەتەكشى كاسىپورىن جانە الەمدەگى مىس وندىرەتىن ءىرى ءوندىرىس ورنى. سونىمەن قاتار، كومپانيانىڭ افريكا قۇرلىعىنداعى بىرنەشە ەلدە، ونىڭ ىشىندە وڭتۇستىك افريكا رەسپۋبليكاسىندا، زيمبابۆە، مالي جانە موزامبيكتە كومىر، مارگانەس، پلاتينا، بوكسيت، فليۋوريت ءوندىرۋ بويىنشا جوبالارى بار.
برازيليادا ERG جىلىنا 18 ملن توننا ءونىم بەرەتىن تەمىر كەن ءوندىرىسى – Pedra de Ferro جوباسىن ىسكە اسىرۋدى جالعاستىرۋدا.
