بۇگىن مەملەكەت باسشىسى قاسىم-جومارت توقايەۆتىڭ قاتىسۋىمەن ۇلتتىق قوعامدىق سەنىم كەڭەسىنىڭ العاشقى وتىرىسى بولدى. ەلورداداعى تاۋەلسىزدىك سارايىندا وتكەن جيىندا كەڭەس مۇشەلەرى بۇگىنگى قازىرگى كەزدەگى ەڭ وزەكتى ماسەلەلەر تۋرالى ءسوز قوزعادى.
اقوردا سايىتىنىڭ حابارلاۋىنشا، قاسىم-جومارت توقايەۆ ءوز سوزىندە ەلىمىزدى دامىتۋعا جانە جاڭعىرتۋعا باعىتتالعان باستامالار مەن ۇسىنىستاردى پىسىقتاۋ ىسىندەگى ۇلتتىق قوعامدىق سەنىم كەڭەسىنىڭ ءرولىن اتاپ ءوتتى.
– ۇلتتىق كەڭەستىڭ ءاربىر مۇشەسىنىڭ وزىندىك پىكىرى مەن ۇستانىمى بار. بۇل دامىعان ازاماتتىق قوعام ءۇشىن قالىپتى جاعداي. ۇلىقتاۋ راسىمىندە «ءارالۋان پىكىر – ءبىرتۇتاس ۇلت. شىن مانىندە، بالاماسىز، باستاماسىز جانە بەلسەندىلىكسىز دامۋ بولمايدى. وسى ءۇش كيت ىلگەرىلەۋدى قامتاماسىز ەتەدى» دەگەن ءسوزىمدى نەگىزگە الۋىمىز قاجەت، – دەدى مەملەكەت باسشىسى.
قاسىم-جومارت توقايەۆ قازاقستاننىڭ ساياسي رەفورمالارىنىڭ بىردەن قارىشتاپ العا كەتپەيتىنىن، اقىلعا سالىپ، بىرتىندەپ جۇزەگە اسىرىلاتىنىن، دامۋعا جانە جەمىستى جۇمىسقا باعىتتالاتىنىن ايتتى.
– كەيدە كەيبىر ۇراندار مەن ۇندەۋلەر وتە تارتىمدى كورىنەدى، ءبىراق ولاردىڭ اۆتورلارىنىڭ ەل الدىندا ەشقانداي جاۋاپكەرشىلىگى جوق. رەفورما ءۇشىن رەفورما – بۇل داعدارىسقا باستايتىن جول ءارى مەملەكەتتى باسقارۋدان اۋىرىلۋعا اكەلىپ سوعادى. ەشقايسىمىزدىڭ مۇنى قالامايتىندىعىمىزعا سەنىمدىمىن. دامۋ دايەكتى ءارى ۇدەمەلى بولۋى ءتيىس. سوندا عانا ءبىز ءوزىمىزدىڭ مەملەكەتتىلىكتى ساقتاۋعا جانە نىعايتۋعا باعىتتالعان ازاماتتىق ءارى ساياسي بورىشىمىزدى ورىندايمىز، – دەدى قازاقستان پرەزيدەنتى.
قاسىم-جومارت توقايەۆ مەملەكەتىمىز ءۇشىن ماڭىزدى ءارى كوكەيتەستى ماسەلەلەر جونىندە ءبىرىڭعاي تۇسىنىكتىڭ ماڭىزدى ەكەنىن ايتتى، سونداي-اق وندىرىستەردى كوشىرۋگە قاتىستى قاۋەسەتتەرگە تۇسىنىكتەمە بەرە وتىرىپ، جەردىڭ شەتەلدىك ازاماتتارعا ساتىلمايتىنىن تاعى دا اتاپ ءوتتى.
– سوڭعى ۋاقىتتا جەر شەتەلدىكتەرگە ساتىلادى ەكەن نەمەسە كورشى ەلدىڭ 55 ەسكى زاۋىتى كوشىرىلەدى، مىڭداعان شەتەلدىك جۇمىسكەرلەر تارتىلادى ەكەن دەگەن سياقتى ءتۇرلى قاۋەسەت اڭگىمەلەر تاراپ ءجۇر. حالقىمىز مۇنداي داڭعازا اڭگىمەلەرگە ەرمەۋى قاجەت. وزدەرىنىڭ كوزدەگەن ماقساتتارىنا جەتۋ ءۇشىن جۇرتتىڭ پاتريوتتىق سەزىمدەرىن ءوز مۇددەلەرى ءۇشىن پايدالانا بىلەتىن ادامدار وسىنداي الىپ-قاشپا اڭگىمەلەردى شىعارىپ ءجۇر. بيلىكتىڭ مىندەتى – قوعاممەن ديالوگ جۇرگىزۋ ارقىلى مەملەكەتتىك ساياساتتىڭ ماقساتىن ءتۇسىندىرۋ. مەن جەردى ەشكىمگە بەرمەيتىنىمىزدى تاعى دا ايتقىم كەلەدى، – دەدى قاسىم-جومارت توقايەۆ.
پرەزيدەنت قازاقستاننىڭ حالىقارالىق ىنتىماقتاستىق، ۇزدىك ستاندارتتار مەن وزىق تەحنولوگيا ءۇشىن اشىق ەكەنىن اتاپ ءوتىپ، بارلىق داۋلى ماسەلەلەر كونسەنسۋس ارقىلى شەشىلەتىنىن ايتتى.
– قازاقستاننىڭ قازىرگى سىرتقى يدەولوگياسىندا «حالىق جاۋى»، «بەسىنشى كولوننا»، «ىقپال ەتۋ اگەنتتەرى» سياقتى تۇسىنىك جوق. بۇل ءبىز ءۇشىن جات نارسە. ءبىز ءوز ازاماتتارىمىزدىڭ ادالدىعى مەن پاتريوتتىعىنا نىق سەنەمىز. ۇلتتىق تۇتاستىقتىڭ تاعى ءبىر نەگىزى – دامۋدىڭ دەموكراتيالىق ۇلگىسىنە بەيىلدىلىك. ءبىز، ەڭ الدىمەن، مەملەكەتتىلىگىمىزدى نىعايتۋ ميسسياسىن باسشىلىققا الىپ، وزىمىزگە ۇتىمدى ۇستانىمدا قالۋعا ءتيىسپىز، – دەدى مەملەكەت باسشىسى.
قاسىم-جومارت توقايەۆ مەملەكەتتى وركەندەتۋ ءۇشىن بارلىق سالانى جاڭعىرتۋ ءىسى دامۋدىڭ ستراتەگيالىق ماقساتتارىنىڭ جانە ازاماتتىق قوعامنىڭ پىكىرىنە تالداۋ جاساۋ نەگىزىندە جۇزەگە اسىرىلاتىنىن ايتتى.
– ازاماتتىق قوعام وكىلدەرىن ۇلتتىق كومپانيالاردىڭ، الەۋمەتتىك-كاسىپكەرلىك كورپوراسيالاردىڭ، ورتالىق مەملەكەتتىك ورگانداردىڭ باقىلاۋ كەڭەستەرىنە ەنگىزۋ جونىندەگى ۇسىنىستى قولدايمىن. بۇل اشىق بولۋعا، سونىڭ ىشىندە، قوعامدىق نازاردان تىس قالعان كۆازيمەملەكەتتىك سەكتوردىڭ اشىق بولۋىنا مۇمكىندىك بەرەدى. ۇلتتىق كەڭەستىڭ مۇشەلەرى «اشىق اكىمدىك» تاجىريبەسىن جاپپاي تاراتۋدى ۇسىنىپ وتىر. شىن مانىندە، بىزگە باسقارۋ مادەنيەتىنىڭ جاڭا ستاندارتىنا كوشۋ كەرەك. «اشىق اكىمدىك» جەرگىلىكتى بيلىكتىڭ قوعام ءۇشىن قولجەتىمدى بولۋىنا مۇمكىندىك بەرەدى، حالىق پەن مەملەكەتتىك قىزمەتشىلەر اراسىنداعى كەدەرگىنى جويادى، – دەدى مەملەكەت باسشىسى.
پرەزيدەنت ساياسي جۇيەنى جاڭعىرتۋدى جانە كىرىستەردىڭ ءادىل ءبولىنۋىن قامتاماسىز ەتۋى ءتيىس الەۋمەتتىك ساياساتتى قايتا قاراۋ ءىسىن جالعاستىرۋ قاجەتتىگىن ايتتى. سونىمەن قاتار قاسىم-جومارت توقايەۆ ۇلتتىق كەڭەستىڭ جۇمىس توبىنىڭ اياسىندا قازاقستان حالقىنا ارنالعان جولداۋدا ايتىلعان باستامالاردى ەگجەي-تەگجەيلى پىسىقتاۋدى ۇسىندى.
جيىندا ۇلتتىق كەڭەستىڭ مۇشەلەرى – راحىم وشاقبايەۆ، مۇحتار تايجان، ايدوس سارىم، اسىلبەك قوجاحمەتوۆ، قازىبەك يسا، ساياسات نۇربەك، ايمان وماروۆا، ەرمەك تۇرسىنوۆ، سەيداحمەت قۇتتىقادام، وراز جاندوسوۆ ءسوز سويلەدى.
سۋرەتتەر akorda.kz سايتىنان الىندى.
