ۇلتتىق بانكتىڭ بازالىق مولشەرلەمەنى 14،75 پايىزعا دەيىن تومەندەتتى، دەپ حابارلايدى Ulys بانكتىڭ باسپا ءسوز قىزمەتىنە سىلتەمە جاساپ.
قاڭتاردا جىلدىق ينفلياسيانىڭ تومەندەۋ ءۇردىسى جالعاسىن تاپتى. ينفلياسيالىق كۇتۋلەر ءۇش اي قاتارىنان باياۋلاپ كەلەدى. ال ايلىق ينفلياسيا ورتاشا جىلدىق ماندەردەن جوعارى قالىپتاسۋدا. سىرتقى ينفلياسيالىق جاعداي بەيتاراپ كۇيدە قالىپتاسىپ وتىر. ءبىرقاتار ساۋدا-سەرىكتەس ەلدەردە ينفلياسيا ءبىرشاما قارقىن الىپ، سىرتقى ينفلياسيالىق قىسىم ءسال كۇشەيدى. الەمدىك ازىق-تۇلىك باعاسىندا تومەندەۋ ءۇردىسى جالعاسىپ، سىرتقى ينفلياسيالىق جاعدايعا وڭ اسەرىن تيگىزىپ وتىر. ىشكى ەكونوميكادا ورنىقتى ىشكى سۇرانىسقا جانە تۇراقتانا قويماعان ينفلياسيالىق كۇتۋلەرگە بايلانىستى ينفلياسيالىق قىسىم ساقتالىپ وتىر.
جىلدىق ينفلياسيا 2024 جىلعى قاڭتاردا 9،5%-عا دەيىن باياۋلادى. بۇل ۇلتتىق بانكتىڭ بولجامىنا سايكەس كەلەدى. باعالاردىڭ جالپى وسىمىندەگى باياۋ ءۇردىس – جۇرگىزىلىپ جاتقان اقشا-كرەديت ساياساتىنا، جاھاندىق ينفلياسيالىق قىسىمنىڭ جانە ءوندىرىس شىعاسىلارىنىڭ تومەندەۋىنە، لوگيستيكالىق تاۋار جەتكىزۋ جولدارىنىڭ بىرتىندەپ قالپىنا كەلۋىنە، بيلىكتىڭ ينفلياسياعا قارسى شارالارىنا، سونداي-اق وتكەن جىلعى جوعارى بازا اسەرىنىڭ ىقپالىنا بايلانىستى.
ايلىق ينفلياسيا ورتاشا جىلدىق ماندەردەن (0،6%) جوعارى قالىپتاسىپ، 0،8% بولدى. تۇتىنۋشىلىق باعالاردىڭ وسۋىندەگى ورنىقتى بولىكتى سيپاتتايتىن بازالىق ينفلياسيا جانە ماۋسىمدىق فاكتورلار ەسكەرىلمەگەن ينفلياسيا ءبىراز قارقىن الىپ، تارگەتتەن جوعارى دەڭگەيدە قالىپتاسىپ وتىر.
ءۇش اي قاتارىنان باياۋلاپ، قاڭتاردا ءبىرشاما تومەندەگەن حالىقتىڭ ينفلياسيالىق كۇتۋلەرى بازالىق مولشەرلەمەنىڭ تومەندەۋىنە سەبەپ بولدى.
جالپى سىرتقى ينفلياسيالىق فون بەيتاراپ كۇيدە قالىپتاسىپ كەلەدى. الەمدىك ازىق-تۇلىك پەن ەنەرگيا باعاسىنىڭ تومەندەۋىنەن جاھاندىق ينفلياسيا باياۋلاپ وتىر. سونىمەن بىرگە رەسەيدە ينفلياسيا جوعارى دەڭگەيدە قالىپتاسىپ، قىتايدا ايلىق ينفلياسيانىڭ ءوسۋى بايقالادى. قاڭتاردا فاو ازىق-تۇلىك باعاسىنىڭ يندەكسى استىق پەن ەت باعاسىنىڭ ارزانداۋىنا بايلانىستى تومەندەدى. جاھاندىق ينفلياسيانىڭ باياۋلاۋىنا قاراماستان، سىرتقى اقشا-كرەديت شارتتارى قاتاڭ قالپىندا قالۋدا. اقش فرج جانە ەوب ينفلياسيانى نىسانالى ماندەرگە قايتارۋ قاجەتتىلىگىنە بايلانىستى مولشەرلەمەلەرىن تومەندەتۋگە اسىقپايدى.
وپەك+ مۇناي ءوندىرۋ ءىسىن ۇزدىكسىز قىسقارتۋىنا، اقش تاراپىنان ءوندىرىستىڭ قالىپتى وسۋىنە جانە تاياۋ شىعىستاعى اسكەري قيمىلدارعا بايلانىستى بازالىق سەنارييدە Brent ماركالى مۇناي باعاسى 2025 جىلدىڭ سوڭىنا دەيىن باررەلىنە 80 اقش دوللارى دەڭگەيىندە تۇراقتانادى جەگەن بولجام بار. 2026 جىلى مۇناي باعاسى جىلدىق ورتا ەسەپپەن
77 اقش دوللارىنا دەيىن تومەندەيدى دەپ كۇتىلۋدە. سونىمەن قاتار سەنارييدە الەمدىك ازىق-تۇلىك باعاسىنىڭ (فاو استىق باعاسىنىڭ يندەكسى) 2024 جىلدىڭ ورتاسىنا دەيىن ءبىرشاما كوتەرىلىپ، سودان كەيىن عانا تۇراقتانۋى مەن ودان ءارى تومەندەۋى قاراستىرىلعان. العىشارتتار، ءبىر جاعىنان، قىزىل جانە قارا تەڭىز لوگيستيكاسىنداعى ىقتيمال قيىنشىلىقتار تاۋەكەلىن، ەكىنشى جاعىنان فاو-نىڭ 2024 جىلعى ماۋسىمنىڭ سوڭىندا استىق تۇرلەرى مەن الەمدەگى استىق قورلارىنىڭ وسۋىنە قاتىستى بولجامداردى كورسەتەدى.
