پرەمەر-مينيستر ولجاس بەكتەنوۆ ەكسپورتقا باعىتتالعان بيزنەس وندىرىستەردى مەملەكەتتىك قولداۋ شارالارى بويىنشا كەڭەس وتكىزدى. وعان جەكەلەگەن مينيسترلەر مەن ايماق اكىمدەرى، «بايتەرەك» ۇبح، «قازاقستان دامۋ بانكى» اق، «اتامەكەن» ۇكپ باسشىلىقتارى، سونداي-اق ءبىرقاتار سالاداعى بيزنەس وكىلدەرى قاتىستى. بۇل تۋرالى ۇكىمەتتىڭ باسپا ءسوز قىزمەتى حابارلادى.
نەگىزگى ماقسات – مەملەكەت باسشىسىنىڭ ەكونوميكانى ءارتاراپتاندىرۋ جانە ءوسىمنىڭ جاڭا مۇمكىندىكتەرىن دامىتۋ جونىندەگى تاپسىرمالارىن جۇزەگە اسىرۋ.
«بايتەرەك» حولدينگىنىڭ ەكونوميكانىڭ ءتۇرلى سالالارىندا پيلوتتىق جوبالاردى ىسكە اسىرۋداعى جاڭا تاسىلدەرى قاراستىرىلدى. بۇل ينۆەستيسيالىق جوبالاردى قاراۋ تالاپتارىن جەڭىلدەتۋ جانە بىرىزدەندىرۋ، سونداي-اق ءوتىنىم بەرگەننەن باستاپ، جوبالىق قۋاتقا شىققانعا دەيىن بيزنەس-باستامالارعا قولداۋ كورسەتۋگە باعىتتالعان.
ءبىرىنشى كەزەڭدە تاماق ونىمدەرىن ءوندىرۋ، تەرەڭدەتە وڭدەلگەن مەتاللۋرگيا ونىمدەرى جانە باسقا دا جوبالار قاراستىرىلدى.
«بايتەرەك» حولدينگى ەنگىزگەن ءبىرىڭعاي جانە جەڭىلدەتىلگەن وتىنىمدەردى قاراۋ رەگلامەنتى بيزنەسكە كورسەتىلەتىن مەملەكەتتىك قولداۋدىڭ اشىقتىعىن ءارى تيىمدىلىگىن ارتتىرادى، سونداي-اق ىشكى نارىقتا وتاندىق ءونىمنىڭ ءوسۋ قارقىنىن ارتتىرىپ، ەكسپورتتىق مۇمكىندىكتەردى كەڭەيتەدى.
پرەمەر-مينيستر بيزنەسكە كورسەتىلەتىن قولداۋ شارالارىنىڭ تيىمدىلىگىن ارتتىرۋ ءۇشىن اكىمشىلىك شىعىنداردى ازايتۋ قاجەتتىگىن اتاپ ءوتتى.
«مەملەكەتتىك ورگاندار مەن دامۋ ينستيتۋتتارى بيزنەسپەن بارىنشا قولايلى جاعداي رەجيمىندە جۇمىس ىستەپ، ەلىمىزگە قاجەت ەكسپورتقا باعىتتالعان وندىرىستەردى دامىتۋعا دايىن ءتيىمدى كاسىپكەرلەردى بەلسەندى ىزدەۋى كەرەك»، — دەپ اتاپ ءوتتى ولجاس بەكتەنوۆ.
ۇكىمەت باسشىسى ءىرى كاسىپورىنداردىڭ شاعىن جانە ورتا بيزنەسپەن تىعىز جۇمىس ىستەۋىنىڭ ماڭىزىن ەرەكشە اتاپ ءوتتى. وتاندىق وندىرۋشىلەردىڭ تاۋارلارى، قىزمەتتەرى مەن جۇمىستارىن ساتىپ الۋ بويىنشا ءوز ۋاقىتىندا وففتەيك-كەلىسىمدەر جاساۋ قاجەتتىگى ايتىلدى. وسىلايشا، قولداۋ شارالارى تەك بەلگىلى ءبىر كاسىپكەرلەرگە عانا ەمەس، جالپى قازاقستاندىق ءوندىرىستى دامىتۋعا وڭ اسەر ەتۋى ءتيىس.
ۇلتتىق ەكونوميكا مينيسترلىگىنە مۇددەلى مەملەكەتتىك ورگاندار مەن ايماق اكىمدىكتەرى، «بايتەرەك» حولدينگى مەن «اتامەكەن» ۇلتتىق پالاتاسىمەن بىرلەسە جاڭا پرواكتيۆتى جۇمىس فورماتىنا كوشۋدى جەدەل تۇردە قامتاماسىز ەتۋ تاپسىرىلدى.
