زاڭسىز اكتيۆتەردى قايتارۋ جونىندەگى كوميسسيا «زاڭسىز يەمدەنىلگەن اكتيۆتەردى مەملەكەتكە قايتارۋ تۋرالى» زاڭ شەڭبەرىندە جۇمىسىن جالعاستىرۋدا. بارلىق قاراجات الەۋمەتتىك پايدالى ماقساتتارعا ودان ءارى قايتا ءبولۋ ءۇشىن ارناۋلى مەملەكەتتىك قورعا جىبەرىلەدى. بۇل تۋرالى ۇكىمەتتىڭ باسپا ءسوز قىزمەتى حابارلادى.

ۇكىمەت مەملەكەت باسشىسىنىڭ تاپسىرماسى بويىنشا اقمولا وبلىسىنىڭ زەرەندى اۋىلىندا قۇنى 2،1 ملرد تەڭگە بولاتىن سپورت كەشەنىن جانە تۇركىستان وبلىسىنىڭ تەمىرلان اۋلىندا 890 ملن تەڭگە سوماعا مۋزىكا مەكتەبىن سالۋ جونىندەگى العاشقى ەكى الەۋمەتتىك جوبانى ىسكە اسىرۋعا ارناۋلى مەملەكەتتىك قوردان قاراجات ءبولۋ تۋرالى شەشىم قابىلدادى.

بۇل باستامالار تۇرعىنداردى ءبىلىم بەرۋ جانە سپورتتىق قىزمەتتەرمەن قامتۋدى ارتتىرۋ ءۇشىن اۋىلدىق جەرلەردە الەۋمەتتىك ينفراقۇرىلىمدى دامىتۋعا باعىتتالعان.

ماسەلەن، اقمولا وبلىسىنىڭ زەرەندى اۋىلىندا اۋدانى 6 مىڭ م2 اساتىن، ءبىر اۋىسىمدا 80 ادامدى قابىلدايتىن سپورت كەشەنىن سالۋ جوسپارلانىپ وتىر. نىسان بەلسەندى تۇرعىندارعا بوس ۋاقىتىتىن ءتيىمدى وتكىزۋگە مۇمكىندىك بەرەدى – اۋداندا 14،5 مىڭنان استام ادام جۇيەلى تۇردە سپورتپەن شۇعىلدانادى. جوباعا سايكەس، ورتالىقتا كۇرەس، بوكس، شاڭعى تەبۋ سىندى سپورت تۇرلەرىمەن اينالىسۋ ءۇشىن جابدىقتالادى، 2 جاتتىعۋ زالى قاجەتتى قۇرال-جابدىقتارمەن قامتىلادى. سونداي-اق كەشەندە سپورتشىلاردى جاتتىقتىرۋ مەن ساۋىقتىرۋ جۇمىستارىن ساپالى ءارى ءتيىمدى جۇزەگە اسىرۋ ءۇشىن قاجەتتى قۇرال-جابدىق جانە باسقا دا قوسالقى ءۇي-جايلار قاراستىرىلعان.

تۇركىستان وبلىسىنداعى تەمىرلان اۋلىندا 300 ورىندىق جاڭا ونەر مەكتەبىن سالۋ جوسپارلانىپ وتىر. 1974 جىلى قابىرعاسى كاركاستان سالىنعان قازىرگى عيمارات زاماناۋي سانيتارلىق جانە ءورت قاۋىپسىزدىگى تالاپتارىنا ساي ەمەس، كۇردەلى جوندەۋگە جارامايدى. سوعان قاراماستان بۇگىنگى تاڭدا كەشەن جۇمىس ىستەپ تۇر – ورتالىقتا 420-عا دەيىن بالا وقيدى، بۇل ونىڭ قازىرگى قابىلداۋ مۇمكىندىگىنەن 2 ەسەگە ارتىق، 45 ءمۇعالىم ساباق بەرەدى. جاڭا جوبا اۋىلدا ونەر سالاسىندا قوسىمشا ساپالى ءبىلىم الۋعا جاعداي ءجاسايدىى. بالالار جايلى ورتادا مۋزىكامەن، حورەوگرافيامەن اينالىسۋعا مۇمكىندىك الادى.    

بۇگىنگى تاڭدا ارناۋلى مەملەكەتتىك قوردا 177 ملرد تەڭگە جيناقتالعان. بۇل قاراجاتتىڭ بارلىعى الەۋمەتتىك جانە ينفراقۇرىلىمدىق نىساندار سالۋعا، باسقا دا الەۋمەتتىك ماڭىزدى ماقساتتارعا، سونىڭ ىشىندە دەنساۋلىق ساقتاۋ، ءبىلىم بەرۋ، بۇقارالىق سپورت جانە وزگە سالالارداعى جوبالاردى ىسكە اسىرۋعا باعىتتالادى. 

زاڭسىز يەمدەنىلگەن اكتيۆتەردى مەملەكەتكە قايتارۋ ماسەلەلەرى جونىندەگى كوميسسيانى ق ر پرەمەر-مينيسترى باسقارادى، جۇمىس ورگانى – ق ر باس پروكۋراتۋرانىڭ اكتيۆتەردى قايتارۋ جونىندەگى كوميتەتى.

ۇكىمەت بيىل اۋىل شارۋاشىلىعىن قارجىلاندىرۋ ءۇشىن رەكوردتى كولەمدە 580 ملرد تەڭگە ءبولدى. بۇل قاراجات ەگىنشىلەرگە تىكەلەي نەسيە بەرۋگە، پايىزدىق مولشەرلەمەنى تومەندەتۋگە، فورۆاردتىق ساتىپ الۋعا باعىتتالدى. بۇل تۋرالى ۇكىمەتتىڭ باسپا ءسوز قىزمەتى حابارلايدى.

ناتيجەسىندە، ەگىنشىلەر ءداندى داقىلدار بويىنشا رەكوردتىق كولەمدە ءونىم جينادى: ورتاشا ونىمدىلىك گەكتارىنا 16،1 سەنتنەر بولىپ، 26،7 ملن توننا استىق باستىرىلدى. 2023 جىلى ورتاشا ونىمدىلىك 10 س/گا قۇراعان بولاتىن. سونىمەن قاتار، 3،2 ملن توننا مايلى داقىل باستىرىلدى، 2،9 ملن توننا كارتوپ، 3،9 ملن توننا كوكونىس جانە 2،6 ملن توننا باقشا داقىلدارى جينالدى.

«اگروتەحنولوگيالاردى دۇرىس قولدانۋ، ساپالى تۇقىمدار، مينەرالدى تىڭايتقىشتار جانە وسىمدىكتەردى ءتيىمدى قورعاۋدىڭ ارقاسىندا جوعارى ونىمدىلىككە قول جەتكىزىلدى.

الداعى ۋاقىتتا اۋىل شارۋاشىلىعى داقىلدارىن ءارتاراپتاندىرۋ جۇمىستارى جالعاسىن تابادى. پرەزيدەنت تاپسىرمالارى بويىنشا ازىرلەنگەن جول كارتاسى اياسىندا 2024-2028 جىلدار ارالىعىندا اۋىل شارۋاشىلىعىنىڭ جالپى ءونىم كولەمىن ەكى ەسەگە ارتتىرۋ مىندەتى قويىلدى. جالپى، قازاقستان رەسپۋبليكاسىنىڭ اگروونەركاسىپ كەشەنىن دامىتۋدىڭ 2021-2030 جىلدارعا ارنالعان تۇجىرىمداماسى شەڭبەرىندە 2030 جىلعا قاراي بيداي ونىمدىلىگىن گەكتارىنا 20 سەنتنەرگە دەيىن ارتتىرۋ جوسپارلانىپ وتىر. ايتا كەتۋ كەرەك، مەملەكەت باسشىسىنىڭ تاپسىرماسى بويىنشا 2025 جىلعا ارنالعان كوكتەمگى ەگىس جانە كۇزگى جيىن-تەرىم جۇمىستارىن قارجىلاندىرۋ بيىلدىڭ وزىندە باستالىپ كەتتى»، - دەلىنگەن حابارلامادا.

ۇكىمەت سۋ تاسقىنىنىڭ الدىن الۋ ءۇشىن وزەن-سۋلارداعى سۋ دەڭگەيىن انىقتايتىن باتيمەتريالىق زەرتتەۋلەرگە 576 ملن تەڭگە ءبولدى، دەپ حابارلايدى Ulys.

قاۋلىعا پرەمەر-مينيستر ولجاس بەكتەنوۆ قول قويعان. اقشانى سۋ رەسۋرستارى جانە يرريگاسيا مينيسترلىگى الادى.

«قارجىلاندىرۋدىڭ نەگىزگى بولىگى جابدىقتار مەن تەحنيكالىق جاراقتاردى ساتىپ الۋعا، سونداي-اق زەرتتەۋلەرگە باعىتتالادى. اتاپ ايتقاندا، وسى اقشانى «قازسۋشار» كومپانياسىنىڭ «سۋ مەترولوگيا» فيليالىنا بەرىپ، ەلىمىزدىڭ سولتۇستىك، باتىس جانە ورتالىق وڭىرلەردەگى سۋ تاسقىنى ءقاۋپى بار ۋچاسكەلەرىنە باتيمەتريالىق زەرتتەۋ جۇرگىزۋ كوزدەلىپ وتىر»، - دەپ حابارلايدى ۇكىمەت. 

وزەن-سۋلار بيىل دا، 2025 جىلى دا زەرتتەلۋى كەرەك. زەرتتەۋدىڭ دەرەكتەرى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگى مەن «قازاقستان عارىش ساپارى» كومپانياسىنا بەرىلەدى.