تۇركىستاندا ءۇش قىزدى زورلاعان پەدوفيلگە سوت ۇكىمى شىقتى. جاسوسپىرىمدەرگە ازعىندىق كورسەتكەن سوتتالۋشى 25 جىلىن تۇرمەدە وتكىزەدى، دەپ حابارلايدى Ulys OTYRAR-عا سىلتەمە جاساپ.
سونىمەن قاتار سوت وعان قاتىستى حيميالىق كاستراسيالاۋ شاراسىن تاعايىندادى.
جاعا ۇستاتارلىق جايت وسىدان ەكى جىل بۇرىن وتىرار اۋدانى ارىس اۋىلىندا بولعان. سوتتالۋشى اعاسىنىڭ ءجاسوسپىرىم قىزىمەن بىرگە ويناۋعا كەلگەن قۇربىلارىنا قاتىستى بىرنەشە رەت جىنىستىق سيپاتتاعى زورلىق-زومبىلىق جانە زورلاۋ ارەكەتتەرىن جاساعان. وقيعانىڭ قالاي بولعانىن جەتكىنشەكتەردىڭ وزدەرى ايتىپ بەرگەن.
«قازاقستان رەسپۋبليكاسى قىلمىستىق كودەكسىنىڭ 120-بابىنىڭ 4-بولىگىمەن، 121-بابى 4-بولىگىمىن كىنالى دەپ تانىلىپ، وعان تۇپكىلىكتى پەداگوگيكالىق جانە كامەلەتكە تولماعاندارمەن جۇمىس ىستەۋگە بايلانىستى قىزمەتپەن اينالىسۋ قۇقىعىنان ءومىر بويىنا ايىرا وتىرىپ 25 جىل مەرزىمگە باس بوستاندىعىنان ايىرۋ جازاسى، جازانى قىلمىستىق-اتقارۋ جۇيەسىنىڭ قاۋىپسىزدىگى ورتاشا مەكەمەسىندە وتەۋ جازاسى تاعايىندالعان»، – دەيدى تۇركىستان وبلىستىق سوتىنىڭ باسپا ءسوز قىزمەتى.
