2 كۇن بۇرىن ماڭعىستاۋ وبلىسىنىڭ پروكۋراتۋراسى «كاسپيي» فۋتبول كلۋبىندا وقۋ-جاتتىعۋ جيىندارىنا بولىنگەن 27 ملن تەڭگەدەن استام قاراجات ۇرلانعانىن انىقتادى.
باس پروكۋراتۋرانىڭ مالىمەتىنشە، وبلىستىڭ سىبايلاس جەمقورلىققا قارسى قىزمەتى ۇقكد-مەن بىرلەسىپ، وسى فاكتىنى تەرگەۋ بارىسىندا كلۋبتىڭ بۇرىنعى باسشىسى ءوزىنىڭ 2 تانىسىمەن بىرگە، كۇش قولدانۋ ارقىلى كلۋبتىڭ قىزمەتكەرىن ايعاقتاردى وزگەرتۋگە ماجبۇرلەگەنى بەلگىلى بولعان.
«15 ملن تەڭگە قورقىتىپ الۋعا ارەكەتتەنگەن. وسى جىلدىڭ 3 جەلتوقسانىندا فۋتبول كلۋبىنىڭ ەكس-باسشىسىن، «ك» جانە «و» ازاماتتارىن قاماۋعا الۋعا سانكسيا بەرىلدى»، دەلىنگەن حابارلامادا.
بىلتىر جەلتوقسان ايىندا ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتى «كاسپيي» فۋتبول كلۋبىنىڭ سپورتشىلاردىڭ وقۋ-جاتتىعۋ جيىنىن ۇيىمداستىرعان كومپانياعا قارىزى جوق دەگەن شەشىم شىعارعان ەدى.
سۋديانىڭ ايتۋىنشا، تۇرىك كومپانياسى اقتاۋ كومانداسىنا وقۋ-جاتتىعۋ جيىنىن ۇيىمداستىرماس بۇرىن مەملەكەتتىك ساتىپ الۋعا قاتىسۋ كەرەك ەدى.
«سونىمەن قاتار، سوتقا «كاسپيي» فۋتبول كلۋبى جانىنداعى مكقك باسشىسىنىڭ مىندەتىن اتقارۋشى ەرجان دجامبيروۆ تاپسىرىس بەرۋشى رەتىندە تۇركيا رەسپۋبليكاسىنىڭ انتاليا قالاسىندا قانداي جاعدايدا جانە قانداي نەگىزدە شارت جاساسقانى بەلگىسىز. تۇركيالىق كومپانيا سوت وتىرىسىنا قاتىسۋدان باس تارتقاندىقتان تالاپ قاناعاتتاندىرۋسىز قالدى»، – دەپ مالىمدەدى ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتى.
بۇدان بولەك بيىل جىل باسىندا، ناقتىلاپ ايتقاندا قاڭتار ايىندا Arena Sports & Travel اگەنتتىگى اپەللياسيالىق شاعىم ءتۇسىرىپ، فيفا مەن ۋەفا-عا شاعىمدانىپ، «كاسپيي» فۋتبول كلۋبىنا قارسى سانكسيا ەنگىزەمىن دەپ قورقىتتى. ءساۋىر ايىندا اپەللياسيالىق سوت ءبىرىنشى ساتىداعى سوت شەشىمىن بۇزىپ، تۇرىك كومپانياسىنىڭ شاعىمىن ءىشىنارا قاناعاتتاندىردى.
«ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسىنىڭ «كاسپيي» فۋتبول كلۋبى" رمك-داعى مەملەكەتتىك كوممۋنالدىق كاسىپورنىنان ARENA HALKLA ILISKILER ENERJI ORG.TEKS.VE TIC.LTD.STL ج ش س پايداسىنا 230 521 ەۋرو قارىز جانە 1000 ەۋرو كولەمىندە ايىپپۇل ءوندىرىلسىن. سونداي-اق سوتتىڭ شىعىنى رەتىندە مەملەكەتكە 3 384 813 تەڭگە كولەمىندە وتەماقى جانە وكىلدىڭ كومەگى ءۇشىن 3 900 000 تەڭگە تولەۋى كەرەك»، – دەلىنگەن حابارلامادا.
بۇل رەتتە «كاسپيي» فۋتبول كلۋبى جوعارعى سوتقا شاعىم تۇسىرگەن. الايدا كاسساسيالىق القا فۋتبول كلۋبى ءوتىنىشتى كەشىكتىرگەنىن ايتىپ، ونى كەرى قايتارۋ تۋرالى شەشىم قابىلدادى.
جالپى ايتاتىن بولساق تۇركياداعى وقۋ-جاتتىعۋ جيىنى اقتاۋلىق فۋتبولشىلارعا ەش ناتيجە بەرگەن جوق. 2023 جىلى «كاسپيي» فۋتبول كلۋبى قازاقستان چەمپيوناتىنىڭ تۋرنيرلىك كەستەسىندە سوڭعى ورىندى يەلەنىپ، قازاقستان پرەمەر-ليگاسىنان ءتۇسىپ قالدى.
بۇل شۋلى وقيعاعا بەلگىلى ماڭعىستاۋلىق بلوگەر ازامات سارسەنبايەۆ ءوزىنىڭ الەۋمەتتىك جەلىدەگى پاراقشاسىندا پىكىر ءبىلدىردى.
