قىرعىز رەسپۋبۋليكاسىنىڭ پرەزيدەنتى سوورانباي جەەنبەكوۆ تۇركى كەڭەسىنىڭ باس حاتشىسى باعدات امىرەيەۆتى قابىلدادى. بۇل تۋرالى قىرعىز رەسپۋبليكاسى پرەزيدەنتىنىڭ باسپا ءسوز قىزمەتى حابارلادى.
قىرعىز پرەزيدەنتى الدىمەن باعدات قۇلتايۇلىن قازىرگى قىزمەتىنە تاعايىندالۋىمەن قۇتتىقتاپ، تابىس تىلەدى. سوسىن سوورانباي جەەنبەكوۆ قىرعىز ەلى تۇركى كەڭەسىنە ءتوراعالىق كەزىندە جاقسى باستامالارعا سەبەپ بولاتىن ماڭىزدى شارالار وتكىزۋگە نيەتتى ەكەنىن اتاپ ءوتتى. ەكونوميكالىق ارىپتەستىككە باسىمدىق بەرىلسە دەگەن ويىن اشىق جەتكىزدى. «تۇركى كەڭەسىنە مۇشە ەلدەر اراسىندا ساۋدا-ەكونوميكالىق ىنتىماقتاستىقتى دامىتۋعا باعىتتالعان شارالاردى ۇيىمداستىرۋ قاجەت، بيزنەس-فورۋمدار وتكىزۋ مۇمكىندىگىن قاراستىرۋ كەرەك»،-دەگەن ۇسىنىسىن ءبىلدىردى. ال ءوز كەزەگىندە تۇركى كەڭەسىنىڭ باس حاتشىسى بىلتىر جازدا تۇركى كەڭەسى باسشىلارى ءسامميتى قىرعىزداردىڭ توراعالىعىمەن جوعارى دەڭگەيدە وتكەنىنە ايرىقشا توقتالدى. سوسىن «تۇركى كەڭەسىنە قىرعىز رەسپۋبليكاسىنىڭ ءتوراعالىعى كەزىندە باۋىرلاس مەملەكەتتەر اراسىنداعى بايلانىستار بۇدان دا جوعارى دەڭگەيگە كوتەرىلەرىنە سەنىمدىمىن»،-دەدى. تۇركى كەڭەسىنىڭ باس حاتشىسى باعدات امىرەيەۆ سونداي-اق قىرعىزستانعا رەسمي ساپارى بارىسىندا بۇدان وزگە دە ماڭىزدى تۇلعالارمەن كەلەلى كەزدەسۋلەر مەن كەڭەستەر وتكىزىپ، مەملەكەتتىك اقپارات قۇرالدارىنا سۇحبات بەردى. قىرعىز رەسپۋبۋليكاسىنىڭ پرەزيدەنتى سوورانباي جەەنبەكوۆ سونىمەن قاتار، اتالعان كۇنى تۇركىتىلدەس ەلدەر پارلامەنتتىك اسسامبلەياسىنىڭ باس حاتشىسى التىنبەك مامايۋسۋپوۆتى تا قابىلداعانىن ايتا كەتكەن ءجون.
سۋرەتتەر: قىرعىز رەسپۋبليكاسى پرەزيدەنتىنىڭ رەسمي سايتىنان الىندى
