باۋىرلاس تۇركيانىڭ ايىنا ءبىر رەت شىعاتىن «تۇرىك ادەبيەتى» (Türk Edebiyatı) جۋرنالى شىلدە ايىندا شىققان سانىن تۇتاستاي قازاق ادەبيەتىنە ارنادى.
قازاق ادەبەيتىن تۇرىك تىلىنە اۋدارىپ، باۋىرلاس ەلدەردىڭ بايلانىسىن تەرەڭدەتىپ جۇرگەن جاس تۇركولوگ در. (PhD) ومەر كۋچۋكمەحمەتوگلۋ ءوزىنىڭ فەيسبۋك پاراقشاسىندا ءسۇينشىلى حابار تۋرالى جازدى. «مەن رەداكتورلىق ەتەتىن باسىلىمنىڭ قازاق ادەبيەتىنە ارنالعان ارنايى سانى تۇركيانىڭ ستامبۇل قالاسىندا جارىق كوردى. اتالعان سانعا قازاق ادەبيەتىنىڭ الىپتارى: اباي، مۇحتار اۋەزوۆ، ماعجان جۇمابايەۆ، بەيىمبەت مايلين، ءمىرجاقىپ دۋلاتوۆ شىعارمالارىمەن قاتار حح عاسىردىڭ ورتاسى مەن ءححى عاسىر ادەبيەتىنىڭ كورنەكتى وكىلدەرى: جۇماعالي سايىن، باۋبەك بۇلقىشيەۆ، مۇقاعالي ماقاتايەۆ، بەرىك شاحانوۆ، ءسابيت دوسانوۆ، تالعات كەڭەسبايەۆ، ۇلىقبەك ەسداۋلەت، ەرلان ءجۇنىس جانە اقبەرەن ەلگەزەك سىندى قالامگەرلەردىڭ شىعارمالارى ەندى. بۇل جۇمىستى مەن قازاقستاننىڭ مادەني استاناسى سانالاتىن تۇركىستانداعى قوجا احمەت ياسساۋي ۋنيۆەرسيتەتىنىڭ تۇركولوگيا ينستيتۋتىندا ديرەكتورلىق اتقارعان كەزدە قولعا العان بولاتىنمىن. قىرۋار شارۋاعا قاراماستان ءبىز وسى باسىلىمنىڭ ساپالى شىعۋى ءۇشىن كىتاپحانالاردا وتىرىپ، ءبىراز ىزدەندىك. وسى ورايدا ماعان قول ۇشىن سوزىپ، كومەك بەرگەن بارشاڭىزعا العىسىمدى بىلدىرەمىن.
سونىمەن بىرگە، اتالعان سانىمىزدا شىعارمالارى، ماقالالارى مەن اۋدارمالارى جارىق كورگەن عالىمدار مەن قالامگەرلەردى، ارىپتەس اۋدارماشىلاردى قۇتتىقتايمىن! سونداي اق، باحتيار اسلان باسشىلىق ەتەتىن «تۇرىك ادەبيەتى» جۋرنالىنا ەرەكشە قۇرمەتىمدى بىلدىرەمىن!
تۇركيا مەن قازاقستان قالامگەرلەرىنىڭ شىعارماشىلىق بايلانىستارى جاندانا بەرسىن دەگەن ۇلكەن ۇمىتپەن ...» دەپ جازدى تۇركولوگ.
