قازاقستان رەسپۋبليكاسى پرەزيدەنتى قاسىم-جومارت توقايەۆتىڭ قاراشا ايىندا قىرعىز رەسپۋبليكاسىنا مەملەكەتتىك ساپار جاساۋى جوسپارلانعان. سونىڭ قارساڭىندا وتكەن سىرتقى ىستەر مينيسترلىكتەرى اراسىنداعى كونسۋلتاسيالار تاراپتارعا وزەكتى ماسەلەلەر بويىنشا ارەكەتتەردى سايكەستەندىرۋگە جانە ودان ارعى ءوزارا ءىس-قيمىل پەرسپەكتيۆالارىن جوسپارلاۋعا مۇمكىندىك بەردى.
ەلىمىزدىڭ سىرتقى ىستەر ۆەدومستۆاسى باسپا ءسوز قىزمەتىنىڭ حابارلاۋىنشا، قازاقستان-قىرعىز سىرتقى ىستەر مينيسترلىكتەرى اراسىنداعى كونسۋلتاسيا بىشكەك قالاسىندا وتكەن. وعان قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى مارات سىزدىقوۆ پەن قىرعىز رەسپۋبليكاسىنىڭ سىرتقى ىستەر ءمينيسترىنىڭ ءبىرىنشى ورىنباسارى نۋران نيازالييەۆ دەڭگەيىندە جانە تاراپتاردىڭ جاۋاپتى مەملەكەتتىك ورگاندار وكىلدەرى قاتىسقان.
كونسۋلتاسيالار بارىسىندا ساياسي، ساۋدا-ەكونوميكالىق، سۋ-ەنەرگەتيكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىق، سونداي-اق ەكى ەل اراسىندا ءتۋريزمدى دامىتۋ بويىنشا وزەكتى ماسەلەلەر كەڭىنەن تالقىلاندى.
سونىمەن قاتار، تاراپتار جوعارى جانە بيىك دەڭگەيلەردە، ونىڭ ىشىندە پارلامەنتارالىق ىنتىماقتاستىق شەڭبەرىندە بولاتىن الداعى كەزدەسۋلەر مەن ساپارلاردىڭ كۇنتىزبەلىك جوسپارىن قاراستىرىپ، حالىقارالىق جانە وڭىرلىك ۇيىمدار شەڭبەرىندە ءوزارا ءىس-قيمىل ماسەلەلەرى جونىندە پىكىر الماسقان.
كەلىسسوزدەر قورىتىندىسى بويىنشا تاراپتار دوستىق جانە تاتۋ كورشىلىك، وداقتاستىق جانە ستراتەگيالىق سەرىكتەستىك رۋحىندا ءوزارا ءتيىمدى ىنتىماقتاستىقتى جالعاستىرۋ تۋرالى ۋاعدالاسقان.
سۋرەتتەر mfa.gov.kz سايتىنان الىندى.
