پرەزيدەنت قاسىم-جومارت توقايەۆ ۇلتتىق بانك ءتوراعاسى تيمۋر سۇلەيمەنوۆتى قابىلدادى. بۇل تۋرالى اقوردا حابارلادى.
مەملەكەت باسشىسىنا ۇلتتىق بانكتىڭ بىلتىر جۇزەگە اسىرعان اقشا-كرەديت ساياساتىنىڭ قورىتىندىسى تۋرالى ەسەبى مەن 2025 جىلعا ارنالعان مونەتارلىق رەتتەۋ جوسپارى باياندالدى.
پرەزيدەنتكە قازاقستان ەكونوميكاسى مەن قارجى جۇيەسىنىڭ احۋالى، ىسكەرلىك بەلسەندىلىك، ينفلياسيا فاكتورلارى، سونداي-اق باعانى تۇراقتاندىرۋ جانە ينفلياسيا دەڭگەيىن ورتامەرزىمدى ماقساتقا سايكەس 5 پايىزعا جەتكىزۋ ءۇشىن قابىلدانىپ جاتقان شارالار جونىندە مالىمەت بەرىلدى.
قاسىم-جومارت توقايەۆقا 2024 جىلدىڭ قورىتىندىسى بويىنشا ينفلياسيا ۇلتتىق بانكتىڭ بولجاعان شەگىندە قالىپتاسقانى، ياعني 8،6% پايىزدى قۇراعانى ايتىلدى. تيمۋر سۇلەيمەنوۆتىڭ ايتۋىنشا، سىرتقى ينفلياسيالىق قىسىم كۇشەيىپ، ىشكى ينفلياسيالىق تاۋەكەلدەر ءالى دە ساقتالىپ وتىر.
سونىمەن قاتار مەملەكەت باسشىسى ۇلتتىق قوردىڭ اكتيۆتەرى، التىن-ۆاليۋتا رەزەرۆتەرى جانە ءبىرىڭعاي جيناقتاۋشى زەينەتاقى قورىنىڭ جاي-كۇيى جونىندە اقپاراتتى تىڭدادى. اتاپ ايتقاندا، 2024 جىلى ۇلتتىق قور اكتيۆتەرىن باسقارۋدان تۇسكەن تابىس 7،5 پايىزعا ارتىپ، 4،5 ميلليارد دوللاردى قۇراعان. ال ۇلتتىق بانكتىڭ التىن-ۆاليۋتا رەزەرۆتەرى 45،8 ميلليارد دوللارعا جەتىپ، 27،4 پايىزعا ۇلعايعان. بجزق-نىڭ زەينەتاقى اكتيۆتەرىن باسقارۋدان تۇسكەن ينۆەستيسيالىق تابىس 3،4 تريلليون تەڭگەنى قۇرادى. ال كىرىس كورسەتكىشى ينفلياسيادان ەكى ەسە اسىپ ءتۇسىپ، 17،8 پايىزعا جەتتى.
پرەزيدەنتكە ۆاليۋتا نارىعىنداعى جاعداي تانىستىرىلىپ، تەڭگەنىڭ تۇراقتىلىعىن قامتاماسىز ەتۋ ءۇشىن جۇزەگە اسىرىلىپ جاتقان شارالار تۋرالى باياندالدى.
بۇدان بولەك، تيمۋر سۇلەيمەنوۆ بانك سەكتورىنداعى جاعدايدىڭ تۇراقتىلىعى، دەپوزيتتەر بازاسىنىڭ قالىپتى ءوسىمىنىڭ جالعاسۋى، سونداي-اق قارجى تۇراقتىلىعىن قامتاماسىز ەتۋ شارالارى مەن ماكروپرۋدەنسيالىق ساياساتتىڭ تيىمدىلىگىن ارتتىرۋ جوسپارى جونىندە ايتتى.
ۇلتتىق بانك ءتوراعاسى پرەزيدەنتكە ۇلتتىق سيفرلىق قارجى ينفراقۇرىلىمىن دامىتۋ ناتيجەلەرى مەن انتيفرود-ورتالىعىنىڭ قىزمەتىن تانىستىردى.
كەزدەسۋ سوڭىندا مەملەكەت باسشىسى ينفلياسيانى تەجەپ، قارجى سەكتورىنىڭ تۇراقتىلىعىن قامتاماسىز ەتۋ ماڭىزدى ەكەنىنە نازار اۋداردى. بۇل رەتتە قاسىم-جومارت توقايەۆ ۇلتتىق بانك پەن ۇكىمەت ماكروەكونوميكالىق ساياساتتى ۇيلەسىمدى جۇرگىزۋى قاجەت ەكەنىن اتاپ ءوتىپ، ۇلتتىق بانك قىزمەتىنە قاتىستى ءبىرقاتار ناقتى تاپسىرما بەردى.
