بۇگىن تۇرىكمەنستانعا جاساعان رەسمي ساپارى بارىسىندا قازاقستان پرەزيدەنتى قاسىم-جومارت توقايەۆ پەن تۇرىكمەنستان پرەزيدەنتى سەردار بەردىمۇحامەدوۆ قازاقستان رەسپۋبليكاسى مەن تۇرىكمەنستان اراسىنداعى دوستىقتى نىعايتۋ جانە كوپجاقتى ستراتەگيالىق سەرىكتەستىكتى تەرەڭدەتۋ تۋرالى دەكلاراسيانى قابىلدادى. بۇل تۋرالى اقوردا جازدى.

سونىمەن قاتار ەكى ەلدىڭ دەلەگاسيا مۇشەلەرى ۇكىمەتارالىق، ۆەدومستۆوارالىق جانە ءوڭىرارالىق دەڭگەيدەگى مىناداي قۇجاتتارعا قول قويدى:

1. قازاقستان رەسپۋبليكاسى مەن تۇرىكمەنستان اراسىنداعى دوستىقتى نىعايتۋ جانە كوپجاقتى ستراتەگيالىق سەرىكتەستىكتى تەرەڭدەتۋدىڭ 2025 – 2027 جىلدارعا ارنالعان كەشەندى باعدارلاماسى؛

2. قازاقستان رەسپۋبليكاسىنىڭ ۇكىمەتى مەن تۇرىكمەنستان ۇكىمەتى اراسىنداعى ينۆەستيسيالاردى ءوزارا قورعاۋ جانە ىنتالاندىرۋ تۋرالى كەلىسىم؛

3. قازاقستان رەسپۋبليكاسىنىڭ ۇكىمەتى مەن تۇرىكمەنستان ۇكىمەتى اراسىنداعى كولىك، لوگيستيكا جانە ترانزيت سالاسىنداعى ستراتەگيالىق ىنتىماقتاستىق تۋرالى كەلىسىم؛

4. 1997 جىلعى 27 اقپاندا جاسالعان قازاقستان رەسپۋبليكاسى ۇكىمەتى مەن تۇرىكمەنستان ۇكىمەتى اراسىنداعى جولاۋشىلار مەن جۇكتەردى اۆتوموبيلمەن حالىقارالىق تاسىمالداۋ تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاما؛

5. قازاقستان رەسپۋبليكاسىنىڭ ۇكىمەتى مەن تۇرىكمەنستان ۇكىمەتى اراسىنداعى قىلمىسقا قارسى كۇرەس بويىنشا ىنتىماقتاستىق تۋرالى كەلىسىم؛

6. قازاقستان رەسپۋبليكاسىنىڭ اۋىل شارۋاشىلىعى مينيسترلىگى مەن تۇرىكمەنستاننىڭ اۋىل شارۋاشىلىعى مينيسترلىگى اراسىنداعى وسىمدىكتەر كارانتينى سالاسىنداعى ىنتىماقتاستىق تۋرالى كەلىسىم؛

7. قازاقستان رەسپۋبليكاسىنىڭ تۋريزم جانە سپورت مينيسترلىگى مەن تۇرىكمەنستاننىڭ مادەنيەت مينيسترلىگى اراسىنداعى تۋريزم سالاسىنداعى ىنتىماقتاستىق تۋرالى كەلىسىم؛

8. قازاقستان رەسپۋبليكاسىنىڭ مادەنيەت جانە اقپارات مينيسترلىگى مەن تۇرىكمەنستاننىڭ مينيسترلەر كابينەتى جانىنداعى باس ارحيۆ باسقارماسى اراسىنداعى ارحيۆ ءىسى بويىنشا ىنتىماقتاستىق تۋرالى كەلىسىم؛

9. قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى مەن تۇرىكمەنستاننىڭ قارجى جانە ەكونوميكا مينيسترلىگى اراسىنداعى ءوزارا تۇسىنىستىك تۋرالى مەموراندۋم؛

10. قازاقستان رەسپۋبليكاسىنىڭ كولىك مينيسترلىگى مەن تۇركىمەنستاننىڭ مينيسترلەر كابينەتى جانىنداعى كولىك جانە كوممۋنيكاسيا اگەنتتىگى اراسىنداعى ءوزارا تۇسىنىستىك تۋرالى مەموراندۋم؛

قازاقستاننىڭ سىرتقى ىستەر مينيسترلىگىندە اتالعان ۆەدومستۆوسىنىڭ باسشىسى بەيبىت اتامقۇلوۆتىڭ ورتالىق ازيا ءسىم باسشىلارى مەن اقش وكىلىنىڭ «س5+1» فورماتىنداعى كەزدەسۋىنە قاتىسۋ ءۇشىن نۇر-سۇلتان قالاسىنا كەلگەن تۇرىكمەنستان مينيسترلەر كابينەتى ءتوراعاسىنىڭ ورىنباسارى - سىرتقى ىستەر ءمينيسترى راشيد مەرەدوۆپەن كەلىسسوز ءوتتى.

سىرتقى ىستەر مينيسترلىگىنىڭ رەسمي سايتىندا جاريالانعان دەرەك بويىنشا، كەزدەسۋ بارىسىندا تاراپتار ەكىجاقتى ساۋدا-ەكونوميكالىق ىنتىماقتاستىقتى كەڭەيتۋدىڭ ايتارلىقتاي الەۋەتىن اتاپ ءوتتى. ءوزارا ساۋدانى ارتتىرۋ پەرسپەكتيۆالارى، سونداي-اق ترانزيتتىك-كولىك جانە ەنەرگەتيكا سالالارىنداعى ءوزارا ءتيىمدى ىنتىماقتاستىقتى ودان ءارى دامىتۋ ماسەلەلەرى ناقتى قارالدى. وعان قوسا جوعارى دەڭگەيدەگى الداعى كەزدەسۋلەردىڭ كەستەسى تالقىلاندى.

قازاقستان ءسىم باسشىسى تۇرىكمەن ارىپتەسىن 2019 جىلى 12 تامىزدا تۇرىكمەنباشى قالاسىندا وتكەن العاشقى كاسپيي ەكونوميكالىق فورۋمىنىڭ تابىستى وتۋىمەن قۇتتىقتادى. فورۋم وتكەن جىلدىڭ 12 تامىزىندا اقتاۋداعى كاسپيي ماڭى مەملەكەتتەرى باسشىلارىنىڭ 5ء-شى ءسامميتىنىڭ ماڭىزدى قورىتىندىلارىنىڭ تاعى ءبىر دالەلى بولدى، ونىڭ بارىسىندا كاسپيي ءوڭىرى مەملەكەتتەرى اراسىنداعى قارىم-قاتىناستىڭ جاڭا بەتىن اشقان كاسپيي تەڭىزىنىڭ قۇقىقتىق مارتەبەسى تۋرالى تاريحي كونۆەنسياعا قول قويىلدى.

ءوز كەزەگىندە ر. مەرەدوۆ قازاقستاندىق ارىپتەسىن «س5+1» فورماتىنداعى كەزدەسۋدىڭ ءساتتى وتۋىمەن قۇتتىقتاپ، حالىقارالىق جانە ايماقتىق ۇيىمدار اياسىندا قازاقستان مەن تۇرىكمەنستان اراسىنداعى سىندارلى ءوزارا ءىس-قيمىلدى اتاپ ءوتتى.

سۋرەتتەر http://mfa.gov.kz سايتىنان الىندى.

پرەزيدەنت قاسىم-جومارت توقايەۆتىڭ تۇرىكمەنستانعا رەسمي ساپارى تۇرىكمەنستان حالك ماسلاحاتىنىڭ ءتوراعاسى گۋربانگۋلى بەردىمۇحامەدوۆپەن كەزدەسۋدەن باستالدى. بۇل تۋرالى اقوردانىڭ باسپا ءسوز قىزمەتى ءمالىم ەتتى. 

قاسىم-جومارت توقايەۆتى تۇرىكمەن حالقىنىڭ كوشباسشىسى اشحاباد اۋەجايىنان قارسى الدى. پرەزيدەنت ۇشاعىنىڭ تراپى الدىندا قۇرمەت قاراۋىلى ساپ تۇزەپ تۇردى. قۇرمەت قاراۋىلىنىڭ باستىعى راپورت بەرگەننەن كەيىن ەكى ەلدىڭ ءانۇراندارى ورىندالدى.

مەملەكەت باسشىسى قوناقجايلىق تانىتقانى ءۇشىن حالك ماسلاحاتىنىڭ ءتوراعاسىنا ريزاشىلىق ءبىلدىردى. سونداي-اق گۋربانگۋلى بەردىمۇحامەدوۆتىڭ قازاقستان مەن تۇرىكمەنستان اراسىنداعى قارىم-قاتىناستى نىعايتۋعا زور ۇلەس قوسقانىن اتاپ ءوتتى.

پرەزيدەنت قازاق-تۇرىكمەن ىنتىماقتاستىعى دوستىق، تاتۋ كورشىلىك جانە ءوزارا قولداۋ رۋحىندا قارقىندى دامىپ كەلە جاتقانىنا ەرەكشە نازار اۋدارىپ، تۇرىكمەنستانعا رەسمي ساپارىنىڭ ماقساتى ەكى ەلدىڭ ستراتەگيالىق سەرىكتەستىگىن جاڭا دەڭگەيگە شىعارۋ ەكەنىن ايتتى.

– ءسىزدىڭ ەلىڭىزبەن ىنتىماقتاستىقتى دامىتۋ ماسەلەسىنە زور جاۋاپكەرشىلىكپەن قارايمىز. ءبىز – ستراتەگيالىق سەرىكتەس ەلدەرمىز. جاڭا بىرلەسكەن ۇكىمەتارالىق كوميسسيانىڭ جۇمىسى تۋرالى ايتىپ ءوتتىڭىز. مەن دە ونىڭ قىزمەتىن باقىلاپ، ۇكىمەتكە باعىت-باعدار بەرىپ، قانداي شەشىم قابىلداۋ كەرەك ەكەنىن نۇسقاپ وتىرامىن. ويتكەنى ءبىز ءۇشىن تۇرىكمەنستانمەن دوستىق بايلانىس باستى باسىمدىقتاردىڭ ءبىرى سانالادى، – دەدى قاسىم-جومارت توقايەۆ.

ءوز كەزەگىندە گۋربانگۋلى بەردىمۇحامەدوۆ قازاقستان پرەزيدەنتىنە ءىلتيپات ءبىلدىرىپ، ونىڭ تۇرىكمەنستانعا رەسمي ساپارى اياسىندا قول جەتكىزىلەتىن ۋاعدالاستىقتار ەكى ەل اراسىنداعى ستراتەگيالىق سەرىكتەستىكتى تەرەڭدەتۋگە ىقپال ەتەتىنىنە سەنىم ءبىلدىردى.

اڭگىمەلەسۋ بارىسىندا ساياسي، ساۋدا-ەكونوميكالىق جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ باسىم باعىتتارى ەگجەي-تەگجەيلى تالقىلاندى.