پرەزيدەنت جۇڭگو حالىق رەسپۋبليكاسىنىڭ ءتوراعاسىنا قۇتتىقتاۋ جەدەلحاتىن جولدادى، دەپ حابارلايدى اقوردا.
قاسىم-جومارت توقايەۆ قازاقستاندىقتاردىڭ جانە جەكە ءوزىنىڭ اتىنان سي سزينپين مەن جۇڭگو حالقىن قحر-دىڭ قۇرىلعانىنا 75 جىل تولۋىمەن قۇتتىقتادى.
مەملەكەت باسشىسى قۇتتىقتاۋ جەدەلحاتىندا ەل بىرلىگى مەن تۇتاستىعىنىڭ بىرەگەي نىشانى سانالاتىن بۇل كۇننىڭ ورنى ەرەكشە ەكەنىنە توقتالدى. سونىمەن قاتار قىتايدى الەمدەگى كوشباسشى، ءارى جاھاندىق ورنىقتى دامۋعا، حالىقارالىق تۇراقتىلىق پەن قاۋىپسىزدىكتى قامتاماسىز ەتۋگە زور ۇلەس قوسىپ وتىرعان قۋاتتى مەملەكەت رەتىندە اتاپ ءوتتى.
پرەزيدەنت قازاقستان مەن جۇڭگو اراسىنداعى سان قىرلى ىنتىماقتاستىق ستراتەگيالىق سەرىكتەستىك رۋحىندا قارقىندى دامىپ كەلە جاتقانىنا نازار اۋداردى. ەكى ەلدىڭ مىزعىماس دوستىق پەن تاتۋ كورشىلىككە نەگىزدەلگەن بايلانىسى قوس حالىقتىڭ يگىلىگى جولىندا ۇدايى نىعايا بەرەتىنىنە سەنىم ءبىلدىردى.
قاسىم-جومارت توقايەۆ سي ءسزينپيننىڭ اسا جاۋاپتى قىزمەتىنە تولايىم تابىس، ال دوستاس جۇڭگو حالقىنا باق-بەرەكە تىلەدى.