قاسىم-جومارت توقايەۆ ۇلتتىق قۇراما سپورتشىلارىمەن كەزدەسۋدە پاريجدە باستالاتىن ءدۇبىرلى دودانى بۇكىل الەم اسىعا كۇتەتىنىن ءارى وعان تورتكۇل دۇنيە تۇگەل كوز تىگىپ وتىرعانىن ايتتى. سونىمەن قاتار ۇزدىكتەردىڭ ۇزدىگى ب ا ق سىنايتىن بايراقتى باسەكەگە ەڭ مىقتى سپورتشىلارىمىز بارا جاتقانىن اتاپ ءوتىپ، ەل نامىسىن قورعاۋ ابىرويلى مىندەت ەكەنىنە توقتالدى. 

– ءبىز سىزدەرگە زور ءۇمىت ارتامىز. بۇكىل حالقىمىز – سىزدەرگە جانكۇيەر. جالپى، قازاق سپورت مەكتەبىنىڭ مارتەبەسى قاشاندا بيىك. سپورتشىلارىمىز ءاردايىم ەلگە جۇلدەمەن ورالىپ ءجۇر. وسى داڭقتى جولدى ابىرويمەن جالعايسىزدار دەپ سەنەمىن. شىن مانىندە، سىزدەردىڭ جەڭىستەرىڭىز تۇتاس قازاقستاننىڭ جەڭىسى بولماق. كوك تۋىمىز جەلبىرەسە، ۇلتىمىزدىڭ رۋحى اسقاقتايدى، – دەدى مەملەكەت باسشىسى.

پرەزيدەنت سپورتشىلارىمىزعا بارلىق قاجەتتى جاعداي جاسالىپ جاتقانىنا توقتالدى.

– ەلدى مەكەندەردە ارنايى الاڭدار سالىنىپ جاتىر. وتكەن جىلدىڭ وزىندە 70-كە جۋىق سپورت ورتالىعى اشىلدى. بيىل تاعى 200-گە جۋىق نىسان سالىنادى. بارشاڭىزعا ءمالىم، ۇلتتىق وليمپيادا كوميتەتىندە وزگەرىستەر بولدى. وليمپيادا ويىندارىنا دايىندىق شتابى قۇرىلدى. تاجىريبەلى مامانداردى شاقىردىق. بەلگىلى سپورتشى گەنناديي گولوۆكين كەلدى. ءار سالادا وسىنداي ءوز ءىسىنىڭ ناعىز شەبەرى بولۋعا ءتيىس. سوندا عانا ناتيجە بولادى. ءبىز – سپورتشىلارعا ايرىقشا قۇرمەت كورسەتەتىن ەلمىز، – دەدى مەملەكەت باسشىسى.
قازاقستان پرەزيدەنتى سپورت تاريحىندا وشپەس ءىز قالدىرعان ساڭلاقتارىمىزدىڭ ەڭبەگى ءارقاشان جوعارى باعالاناتىنىن جەتكىزدى.

– بالۋان شولاق، قاجىمۇقان مۇڭايتپاسوۆ، جاقسىلىق ۇشكەمپىروۆ، الەكساندر ۆينوكۋروۆ، بەكزات ساتتارحانوۆ، ولگا رىپاكوۆا اتىنداعى سپورت نىساندارى – سونىڭ ايقىن كورىنىسى. سىزدەر دە بيىك بەلەستى باعىندىرا الاسىزدار. مەن بۇعان كامىل سەنەمىن. بۇگىنگى جاستارىمىز سىزدەرگە قاراپ بوي تۇزەيدى. بۇل – ۇلكەن ابىروي، – دەدى قاسىم-جومارت توقايەۆ.

مەملەكەت باسشىسى بەيبىتشىلىك جانە ىنتىماقتاستىق ساياساتىنا ەلىمىزدىڭ قاشاندا بەيىلدى ەكەنىنە نازار اۋداردى.

– وتكەن اپتادا استانادا شىۇ ءسامميتى تابىستى ۇيىمداستىرىلدى. بۇل ماڭىزى زور شارانىڭ باستى ماقساتى مەملەكەتتەر مەن حالىقتار اراسىنداعى ديالوگتى، دوستىق پەن سەنىمدى نىعايتۋ بولدى. مۇنداي باسىمدىقتار كۇللى سپورت الەمىنە دە ءتان. ويتكەنى كەز كەلگەن سپورت سايىسى، ەڭ الدىمەن، ىنتىماقتاستىقتى، العا ۇمتىلىستى جانە ادامداردىڭ بىرلىگىن كورسەتەدى. وليمپيادا ويىندارىنىڭ قۇندىلىقتارى قاراپايىم سپورت جەتىستىكتەرىنەن اسىپ تۇسەدى. ول – جەكەلەگەن سپورتشىلاردىڭ دا، تۇتاس مەملەكەتتەردىڭ دە تەڭدىگىنىڭ، ءوزارا قۇرمەتى مەن ادال باسەكەلەستىگىنىڭ جارقىن بەينەسى، – دەدى پرەزيدەنت.

قاسىم-جومارت توقايەۆ ەل نامىسىن ابىرويمەن قورعاۋدا سپورتشىلارعا جاۋاپتى ميسسيا جۇكتەلگەنىن ايتىپ، ولارعا ساتتىلىك تىلەدى.

– ءبارىڭىز وليمپيادا جولداماسىن يەلەنۋ ءۇشىن كوپ كۇش جۇمسادىڭىزدار. وزدەرىڭىزدىڭ اسقان شەبەرلىكتەرىڭىزدى كورسەتىپ، جاقسى ناتيجەلەرگە قول جەتكىزەتىندەرىڭىزگە سەنىمدىمىن. سىزدەرگە بارشا قازاقستان حالقى قولداۋ كورسەتەدى. ارينە، چەمپيون بولۋ وڭاي ەمەس. قازاقتا «نامىسقا شاپساڭ – الىسقا شاباسىڭ» دەگەن ءسوز بار. سوندىقتان جەڭىمپاز بولاسىزدار دەپ سەنەمىن، – دەدى مەملەكەت باسشىسى.

پرەزيدەنت قازاقستان رەسپۋبليكاسىنىڭ مەملەكەتتىك تۋىن ۇلتتىق قۇرامانىڭ كاپيتانى اسلانبەك شىمبەرگەنوۆكە تابىستادى. 

قازاقستان قۇراما كومانداسىنىڭ نەگىزگى بولىگى كەزدەسۋگە الماتى وبلىسىنداعى «اقبۇلاق» وليمپيادالىق ورتالىعىنان تەلەكوپىر ارقىلى قاتىستى. وندا سپورتشىلار پاريج وليمپياداسى الدىنداعى سوڭعى جاتتىعۋ جيىندارىن وتكىزىپ جاتىر.

ءىس-شارادا بوكستان الەم چەمپيونى اسلانبەك شىمبەرگەنوۆ، جەڭىل اتلەتيكادان ازيا ويىندارىنىڭ جەڭىمپازى ولگا سافرونوۆا، دزيۋدودان وليمپيادا ويىندارىنىڭ جۇلدەگەرى ەلدوس سمەتوۆ ءسوز سويلەدى. 

ايتا كەتەيىك، بۇعان دەيىن قازاق سپورتشىلارى وليمپيادادا قانداي سپورت تۇرلەرىنەن سىنعا تۇسەتىنىن جازعان ەدىك. 

سونداي-اق، وليمپيادا ويىندارىنا ەڭ كوپ جولدامانى ەلىمىزدەگى قاي ءوڭىردىڭ سپورتشىلارى جەڭىپ العانى بەلگىلى بولدى.