قازاقستان پرەزيدەنتى قاسىم-جومارت توقايەۆ 14-15 ءساۋىر كۇندەرى العاشقى مەملەكەتتىك ساپارمەن باۋىرلاس وزبەكستان رەسپۋبليكاسىنا بارادى.
پرەزيدەنتتىڭ باسپا ءسوز حاتشىسى بەرىك ءۋاليدىڭ فەيسبۋك پاراقشاسىندا جايالاعان حابارلاندىرۋىنا قاراعاندا، كەلىسسوز بارىسىندا مەملەكەت باسشىسى قاسىم-جومارت توقايەۆ وزبەكستان پرەزيدەنتى شاۆكات ميرزيويەۆپەن ساۋدا-ەكونوميكالىق، الەۋمەتتىك-گۋمانيتارلىق جانە كولىك-ترانزيتتىك سالالارداعى ىنتىماقتاستىقتى ودان ءارى نىعايتۋعا باعىتتالعان ەكىجاقتى ىقپالداستىقتىڭ وزەكتى ماسەلەلەرىن، سونداي-اق، وڭىرلىك جانە حالىقارالىق كۇن تارتىبىندەگى باستى تاقىرىپتاردى تالقىلايدى. سونىمەن قاتار، ءبىرقاتار ماڭىزدى قۇجاتتارعا قول قويىلۋ جوسپارلانىپتى. بۇدان سوڭ ق.توقايەۆ پەن ش.ميرزيويەۆ وزبەكستانداعى قازاقستان جىلىنىڭ سالتاناتتى اشىلۋ راسىمىنە قاتىسادى.
راسىندا دا، سوڭعى جىلدارى قازاقستان مەن وزبەكستان اراسىنداعى بايلانىس كۇشەيىپ كەلەدى. بۇل جەردە ەلباسى نۇرسۇلتان نازاربايەۆ پەن باۋىرلاس ەلدىڭ قازىرگى باسشىسى شاۆكات ميرزيەيەۆتىڭ ۇلەسى زور. ول يسلام كارىموۆ تۇسىنداعى ءبىراز ولقىلىقتاردى وڭالتۋ ءۇشىن ۇلكەن قاجىر جۇمساۋدا. بىلتىر قازاقستاندا وزبەكستان جىلى جوعارى دەڭگەيدە وتكىزىلدى. ەندى مىنە، بيىل وزبەكستاندا قازاقستان جىلى باستالادى. مادەني-رۋحاني سالاداعى مۇنداي بايلانىستار دا بىرلىگىمىزدى بەكەمدەي تۇسەرى انىق. سونىمەن قاتار، ورتالىق ازياداعى ىرگەلى ەكى ەل ايماقتاعى ينتەگراسياعا دا جاڭا سەرپىن بەردى. اتاپ ايتقاندا، بىلتىر العاش رەت استانادا ورتالىق ازيا ەلدەرى باسشىلارىنىڭ كونسۋلتاتيۆتىك جۇمىس كەزدەسۋى وتكەن بولاتىن. ورتاق مەرەكە ناۋرىز قارساڭىندا ۇيىمداستىرىلعان ماڭىزدى جيىنعا سول كەزدەگى قازاقستان باسشىسى نۇرسۇلتان نازاربايەۆ، قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ، تاجىكستان رەسپۋبليكاسىنىڭ پرەزيدەنتى ەمومالي راحمون، وزبەكستان رەسپۋبليكاسىنىڭ پرەزيدەنتى شاۆكات ميرزيويەۆ پەن تۇرىكمەنستان مەدجليسىنىڭ ءتورايىمى اكدجا نۇربەردىيەۆا قاتىسقان بولاتىن. تۇركىمەنستان باسشىسى گۋربانگۋلى بەردىمۇحاممەدوۆ جيىنعا كەلە الماسا دا، ورنىنا ءماجىلىس سپيكەرىن جىبەردى. الا اتالعان كەزدەسۋ وسى ايدا وزبەكستاننىڭ استاناسىندا تاعى دا ءوتۋى ءتيىس. جالپى قاسىم-جومارت توقايەۆتىڭ بۇل ساپارى باۋىرلاستىق بايلانىستى ءتىپتى بەكەمدەي تۇسەرىنە سەنىم مول.