تاۋەلسىزدىك كۇنىنە وراي جەتىسۋدا دەنساۋلىق ساقتاۋ، مادەنيەت جانە سپورت سالالارىندا جالپى سانى 5 جاڭا نىسان اشىلدى، - دەپ حابارلايدى جەتىسۋ وبلىسى اكىمىنىڭ باسپا ءسوز قىزمەتى.
اتاپ ايتقاندا، قاراتال اۋدانىنىڭ ورتاتوبە جانە قانابەك اۋىلدارىندا فەلدشەرلىك-اكۋشەرلىك پۋنكت، تاستوبە اۋىلىندا مادەنيەت ءۇيى، قاراجيدە اۋىلىندا سپورت كەشەنى اشىلدى. مۇنداي نىساندار اتالعان ەلدى مەكەندەردە بۇعان دەيىن بولماعان. سوندىقتان جاڭا عيماراتتاردىڭ اشىلۋى تۇرعىنداردىڭ ءومىر ءسۇرۋ ساپاسىن جاقسارتۋعا باعىتتالعان يگى قادامداردىڭ ءبىرى دەۋگە بولادى. بۇل قۋانىشتى جاڭالىققا وراي اۋىل تۇرعىندارى پىكىر ءبىلدىردى.
- اۋىلىمىزدا فەلدشەرلىك-اكۋشەرلىك پۋنكتتىڭ اشىلعانىنا وتە قۋانىشتىمىن. بۇرىن تولىققاندى ەم الۋ ءۇشىن كورشى اۋىلعا بارۋعا ءماجبۇر بولاتىنبىز. ويتكەنى بىزدە ەسكى عيماراتتا وتىرعان مەديسينالىق پۋنكت قانا بولدى. ەندى قاجەتتى ساپالى مەديسينالىق كومەكتى ءوز اۋىلىمىزدان الا الامىز. بۇل - ءبىز ءۇشىن ۇلكەن جەڭىلدىك، جاقسى جاڭالىق، - دەدى قانابەك اۋىلىنىڭ تۇرعىنى ديلنار بۇيرەكباي.
ال سپورت كەشەنىنىڭ جاستار ءۇشىن جاڭا مۇمكىندىكتەرگە جول اشاتىنىن قاراجيدەلىكتەر قۋانا جەتكىزدى.
- بۇگىن جاڭا سپورت كەشەنى اشىلىپ وتىر. بۇرىن اۋىلىمىزدا مۇنداي نىسان بولماعان. ەندى بالالارىمىز بەن نەمەرەلەرىمىز وسى سپورت كەشەنىندە سپورت تۇرلەرىنەن جاتتىعىپ، دەنساۋلىقتارىن شىڭداۋعا مۇمكىندىك الدى. وسىنداي يگى ءىستى جۇزەگە اسىرعان بارشا ازاماتتارعا العىس ايتامىن، - دەيدى قاراجيدە اۋىلىنىڭ تۇرعىنى اقپار ءابيروۆ.
قۋانىشتى جاڭالىق كوكسۋ اۋدانىنا دا جەتىپ، مۇندا بوزتوعان اۋىلىندا 150 ورىندىق مادەنيەت ءۇيى اشىلدى. نىساننىڭ قۇرىلىسى وتكەن جىلدىڭ كوكتەمىندە باستالعان بولاتىن. بۇعان دەيىن 1100-دەن استام تۇرعىنى بار بۇل ەلدى مەكەندە مۇنداي مادەني وشاق بولماعان، ال بالالارعا ارنالعان بارلىق ۇيىرمە ساباقتارى جەرگىلىكتى مەكتەپ عيماراتىندا وتكىزىلىپ كەلگەن.
وبلىستىق مادەنيەت، ارحيۆتەر جانە قۇجاتتاما باسقارماسىنىڭ باسشىسى قۋانىش سۇلەيمەنوۆتىڭ ايتۋىنشا، جاڭا مادەنيەت ءۇيى اۋىل جاستارى ءۇشىن ماڭىزدى دامۋ ورتالىعىنا اينالادى:
– مۇنداي نىساندار – جاي عانا عيمارات ەمەس، تالانتتاردى دامىتۋعا، ءداستۇردى ساقتاۋعا، رۋحاني قۇندىلىقتاردى نىعايتۋعا ارنالعان كەڭىستىك. بوزتوعان اۋىلىنداعى مادەنيەت ءۇيى جاستار ءۇشىن رۋحاني دامۋ ورتالىعىنا اينالاتىنىنا سەنىمدىمىن. مۇندا ۇيىرمەلەر، شىعارماشىلىق ستۋديالار جۇمىس ىستەپ، كونسەرتتەر، كەزدەسۋلەر مەن مەرەكەلىك شارالار وتەتىن بولادى. اۋىل ءۇشىن بۇل – مادەني ءومىردىڭ جاڭا پاراعى، – دەدى ول.
جەرگىلىكتى تۇرعىن داريعا جامانبالانوۆا دا قۋانىشىن ءبولىستى:
– ءبىز بۇل كۇندى ۇزاق كۇتتىك. قۇرىلىسقا كۇش-جىگەرى مەن قاراجاتىن سالعان بارشا ازاماتتارعا العىسىمىز شەكسىز. ەندى بالالارىمىز ءۇيدىڭ قاسىندا مۋزىكامەن، بيمەن اينالىسىپ، ونەرىن شىڭدايتىن بولادى. بۇل – جاستارىمىزدىڭ بولاشاعىنا جاسالعان ماڭىزدى ينۆەستيسيا، – دەدى ول شىنايى ريزاشىلىعىن ءبىلدىرىپ.
