تۇركيانىڭ ەلورداسى انكارا قالاسىندا قازاقستان رەسپۋبليكاسىنىڭ
تاۋەلسىزدىك كۇنى تويلاندى. باۋىرلاس مەملەكەتتەگى ەلشىلىگىمىزدىڭ
فەيسبۋكتەگى رەسمي پاراقشاسى تاراتقان مالىمەتتەرگە قاراعاندا، شارا
جوعارى دەڭگەيدە وتكەن.
قازاقستاننىڭ تۇركياداعى ەلشىلىگىنىڭ ۇيىمداستىرۋىمەن وتكەن رەسمي
قابىلداۋعا تۇركيا رەسپۋبليكاسى اتىنان باس قوناق رەتىندە تۇركيا ۇلى
ۇلتتىق ءماجىلىسى ءتوراعاسى پروفەسسور مۇستافا شەنتوپ پەن باۋىرلاس ەلدىڭ
ءبىر توپ زيالىسى مەن اتقامىنەرلەرى قاتىسقان. اتاپ ايتقاندا، تۇركيا
پرەزيدەنتىنىڭ باس كەڭەسشىسى يالچىن توپچۋ، كولىك ۆيسە-مينيسترلەرى ءو.
فاتيح سايان جانە س.دۋرسۋن، وتباسى، ەڭبەك جانە الەۋمەتتىك قىزمەتتەر ۆيسە-
ءمينيسترى ايشە ەرگەزەن، ەنەرگەتيكا جانە تابيعي رەسۋرستار ۆيسە-مينيسترى
الپارسلان بايراكتار، ساۋدا ۆيسە-مينيسترى سەزاي ۋچارماك، انكارا
گۋبەرناتورى ۆاسيپ شاحين، ەسكيشەحير گۋبەرناتورى وزدەمير چاكادجاك،
انكارا مەرى مانسۋر ياۆاش، بۇرىنعى ءماجىلىس ءتوراعاسى دجەميل چيچەك،
قازاقستان-تۇركيا پارلامەنتارالىق دوستىق توبىنىڭ ءتوراعاسى، مەحمەت الي
دجيەۆحەري، تۇركيا ءماجىلىسى دەپۋتاتتارى، ءبىرقاتار ۋنيۆەرسيتەت رەكتورلارى،
اۋدان اكىمدەرى، پارتيالاردىڭ باسشىلارى، بۇرىنعى مينيسترلەر، ەلشىلەر،
حالىقارالىق ۇيىم باسشىلارى، تۇركى كەڭەسى باس حاتشىسى باعدات امرەيەۆ،
قازاقستاننىڭ قۇرمەتتى كونسۋلدارى، ينۆەستورلار، ديپلوماتيالىق ميسسيا،
زيالى قاۋىم، ىسكەر توپ، دياسپورا مەن ب ا ق وكىلدەرى، قازاقستاندىق
تالىمگەرلەر جانە قوناقتار قاتىستى.
رەسمي قابىلداۋ الدىندا قوناقتار قازاقستاننان ارنايى جەتكىزىلگەن
«كازبەەف» ماركالى ەتتىڭ ءدامىن تاتتى. ونى تۇرىكتىڭ ايگىلى ازپازشىسى،
«ScarlEt Steakhouse» يەسى سۇلەيمەن ديلەك ءوزى دايىنداپ، قوناقتارعا ۇسىندى.
القالى قابىلداۋدىڭ بەتاشار ءسوزىن سويلەگەن قازاقستاننىڭ تۇركياداعى
ەلشىسى ابزال ساپاربەك ۇلى ەڭ باستى مەرەكە — تاۋەلسىزدىك كۇنىمەن جينالعان
قاۋىمدى قۇتتىقتادى. ەگەمەندىگىمىزدىڭ 28 جىلىندا قازاقستاننىڭ جەتكەن
جەتىستىكتەرىنە توقتالعان ول باۋىرلاس تۇركيانىڭ ءاردايىم كورسەتكەن
قولداۋىن اتاپ ءوتتى. ەلىمىزدەگى ساياسي رەفورمالاردى تىلگە تيەك ەتكەن ەلشىسى
ەلباسى نۇرسۇلتان نازاربايەۆقا تۇركيا پرەزيدەنتى رەجەپ تايىپ
ەردوعاننىڭ باستاماسىمەن تۇركى كەڭەسىنىڭ قۇرمەتتى ءتوراعاسى اتاعى
بەرىلگەنىن ەسكە سالدى. پرەزيدەنتىمىز قاسىم-جومارت توقايەۆتىڭ قوعامنىڭ
دەموكراتيالىق قۇقىقتارى مەن قاۋىپسىزدىگىن ساقتاۋ، حالىقپەن ءتيىمدى
بايلانىس ورناتۋ، ساياسي رەفورمالار، ۇلتتىق كودتى قالىپتاستىرۋ
جۇمىستارىن جالعاستىرۋ، كوپ ۆەكتورلى جانە تەڭگەرىمدى سىرتقى ساياسات جانە
جاستاردى بيلىككە تارتۋ سەكىلدى ساياسي باسىمدىقتارىنا نازار اۋدارعان ابزال
ساپاربەك ۇلى جۋىردا قازاقستان پرەمەر-مينيسترى اسقار ءماميننىڭ دە
تۇركياعا جاساعان ساپارى تۋرالى اڭگىمەلەدى. تاۋەلسىزدىگىمىزدىڭ جانە
باۋىرلاس قازاق-تۇرىك ىنتىماقتاستىعىنىڭ ماڭىزىنا توقتالعان ەلشى، ءسوزىن
بابالارىمىزدىڭ «بىرلىك بولماي – تىرلىك بولماس» دەگەن ماقالىمەن
ءتامامدادى.
ايتۋلى كەشتىڭ اشىلۋ سالتاناتىندا ءسوز سويلەگەن تۇۇم ءتوراعاسى مۇستافا
شەنتوپ «تۇركيا قازاقستاننىڭ تاۋەلسىزدىگىن مويىنداعان العاشقى مەملەكەت
بولعانىن ءاردايىم ماقتان تۇتادى. ەلدەرىمىز اراسىنداعى قارىم-قاتىناستار
ءبىز ءۇشىن وتە ماڭىزدى. العا قويىلعان 10 ملرد. دوللارلىق ساۋدا اينالىمى
مەجەسىنە جەتۋ ءۇشىن قىرۋار جۇمىس اتقارىلۋدا. قازاقستاننىڭ قۋانىشى
ءبىزدىڭ دە قۋانىشىمىز»،- دەدى. ەلباسى ن.نازاربايەۆتىڭ كورەگەن ساياساتىن
تىلگە تيەك ەتكەن م.شەنتوپ «نازاربايەۆتىڭ قايراتكەرلىگى تەك قازاقستان ءۇشىن
عانا ەمەس، بارشا تۇركى الەمى جانە ايماقتاعى ەلدەردىڭ دامۋىنا باعىت
كورسەتەتىن جۇمىستارى دا قىزىعۋشىلىق تۋدىراتىنىنا» توقتالعان ول
قازاقستان مەملەكەتى تاۋەلسىزدىگىنىڭ 28ء-شى جىلدىعىمەن قۇتتىقتادى.
سونداي-اق القالى كەشتە تۇۇم ءتوراعاسى م.شەنتوپ ەلشى ا.ساپاربەكۇلىنا
ەلباسى نۇرسۇلتان نازاربايەۆ اتىنا تۇركى الەمى جازۋشىلار جانە
ونەرپازداردىڭ «Türksav» قورى اتىنان 1919 جىلى 19-مامىردا اتاتۇرىك
باستاعان ۇلت-ازاتتىق سوعىستىڭ 100 جىلدىعى قۇرمەتىنە تاعايىندالعان «19
مامىر تۇركى الەمىنىڭ جاڭعىرۋى» ماراپاتىن تابىس ەتتى.
تۇركى الەمىنىڭ ادەبيەت جانە ونەر سالالارىنداعى ىنتىماقتاستىعىن
ارتتىرۋعا باعىتتالعان جۇمىستار جۇرگىزەتىن «Türksav» قورىنىڭ بۇدان
بۇرىن ەلباسىنا «تۇركى الەمىنە قىزمەت سىيلىعىن» بەرگەنىن ايتا كەتكەن
ءجون.
رەسمي قابىلداۋ نۇر-سۇلتان قالاسىنىڭ اكىمدىگى مەملەكەتتىك اكادەميالىق
فيلارمونياسىنىڭ قازاق وركەسترى، «قورقىت اتا» كونە اسپاپتار ساز توبىنىڭ
كونسەرتىمەن جانە قازاقتىڭ ۇلتتىق تاعامىمەن كومكەرىلگەن مول داستارحانعا
ۇلاستى.
سۋرەتتەر قازاقستاننىڭ تۇركياداعى ەلشىلىگىنىڭ فەيسبۋكتەگى رەسمي
پاراقشاسىنان الىندى.
