ءماجىلىس دەپۋتاتى نارتاي سارسەنعالييەۆ باس پروكۋرور مەن ءىىم اتىنا جولداعان دەپۋتاتتىق ساۋالىندا اتى ادام بولعانمەن ارەكەتى ادامدىقتان ادا قىلمىسكەرلەر حاقىندا ايتتى. دەپۋتات پرەزيدەنتتىڭ تاپسىرمالارىن العا تارتىپ، پوليسياعا دەگەن حالىقتىڭ سەنىمىن ارتتىرىپ، زاڭ ۇستەمدىگىنە يەك ارتۋ كەرەگىن جەتكىزدى، دەپ حابارلايدى Ulys.
«قوعامدى قامىقتىراتىنى سول، سوڭعى ۋاقىتتا جاسوسپىرىمدەردىڭ ءبىر-بىرىن اياۋسىز سوققىعا جىعۋى، قورلاۋى، ەڭ سوراقىسى ارتى ولىمگە اپاراتىن قايعىلى جايتتار جيىلەپ كەتتى. تەلەارنانى قوسىپ قالعاندا، گازەت بەتىن اشىپ قالعاندا، راديونى باسىپ قالعاندا ازاماتتار ءبىرى-بىرىن ۇردى، سوقتى دەگەن اقپاراتتان كوز اشپايتىن بولدىق. «ءبىزدىڭ قوعام قايدا بارا جاتىر؟» دەگەن سۇراقتىڭ كوپشىلىكتىڭ كوكەيىندە كولكىپ تۇرۋى زاڭدىلىق وسىندايدا. كەشە عانا تالعارداعى دۇكەندە بولعان جاعداي ەسىمىزدى ەكەۋ، ءتۇسىمىزدى تورتەۋ قىلدى. تالعارداعى تەكسىزدەردىڭ تەنتەكتىگىنەن 16 جاستاعى بالا، ءبىر اۋلەتتىڭ ايماڭداي ازاماتى شەرزات كوز جۇمدى. اكەسى مەن باۋىرى سوققىعا جىعىلدى. بالانىڭ اجالىنا نە سەبەپ دەگەن سۇراق تۋادى. سونداعىسى ءبىر بوتەلكە سىرا. قازاق «اراقپەن دوستاستىم دەگەنشە، ادامگەرشىلىكپەن قوشتاستىم دە» دەيدى. ىشكىشتىڭ ءوزى ادامگەرشىلىگىمەن قوشتاسىپ قانا قويماي، كىناسىز كىسىلەردىڭ ومىرىمەن قوشتاسۋىنا سەبەپ بولعانى قاتتى قاپالاندىرادى»، - دەيدى دەپۋات.
ونىڭ ايتۋىنشا، وسىندايدا ءبىزدىڭ قوعام ءقاۋىپسىز بە ءوزى، زاڭ كىمنىڭ جاعىندا دەگەن سۇراق تۋادى.
«سەبەبى شەرزاتتىڭ اكەسى تەرگەۋدىڭ تۇرالاپ تۇرعانىن، اۋدانداعى قۇزىرلى ورىن وكىلدەرىنىڭ ءىستى سوزباققا سالىپ جاتقانىن، قىلمىسكەردى قويىپ بالاسىنان ايىرىلعان وتباسىن تۇندە تەرگەۋگە شاقىرىپ الىپ وكتەم سويلەگەنىن ايتىپ بەينەۇندەۋ جاسادى. ەل ورە تۇرەگەلدى، ارتىنشا «ءىستى ءىىم ءوز باقىلاۋىنا الدى» دەگەن اقپارات تارادى. قوعامدى قورقىتاتىنى وسى، قىلمىسكەردى جازالاۋ ءۇشىن، ادىلدىككە جەتۋ ءۇشىن بەينەۇندەۋ جاساپ ءار ءىستى ءبىر ءمينيستردىڭ باقىلاۋعا العانىن كۇتىپ وتىرۋ كەرەك پە؟ نەگە جەرگىلىكتى جەردەگى قۇقىق قورعاۋ ورىندارى دەرەۋ ءىستىڭ اق-قاراسىن انىقتاپ ءادىل تەرگەۋ وتكىزبەيدى؟»، - دەيدى دەپۋتات.
سارسەنعالييەۆ مۇنداي جاعدايدا ءبىز تەك قانا زاڭ ۇستەمدىگىنە يەك ارتۋىمىز ءتيىس. پرەزيدەنتتىڭ: «ءبىزدىڭ ەلىمىزگە زاڭ ۇستەمدىگى جانە ازاماتتىق ءتارتىپ اسا قاجەت» دەگەن.
«سوندىقتان قىلمىس ورىن العاندا قۇقىق قورعاۋ ورگاندارى بىردەن ارەكەت ەتۋى كەرەك. ايتپەسە، جاپا شەككەن وتباسىنىڭ مۇشەلەرى اشۋعا بوي الدىرىپ، قىلمىسكەردى جازالاۋعا وزدەرى بەكىنۋى مۇمكىن. سوندىقتان وعان قوسا مەملەكەتتىك دەڭگەيدە پوليسيا مەن قۇقىق قورعاۋ ورگاندارىنا دەگەن سەنىمدىلىكتى ارتتىراتىن جۇمىستاردى ىسكە اسىرۋ ماڭىزدى دەپ بىلەمىن. قاپەرلەرىڭىزگە تاعى ءبىر جايتتى سالايىن، وسى جىلدىڭ قىركۇيەگىندە اقتوبە وبلىسىندا 14 جاستاعى سىدىق نۇرجاندى جوعارعى سىنىپتا وقيتىن ونشاقتى وقۋشى جابىلىپ ساباعان، سالدارىنان بالا كوز جۇمدى. ول كەزدە دە مارقۇمنىڭ اپكەسى الەۋمەتتىك جەلىگە شىعىپ ادىلدىك ىزدەپ قۇزىرلى ورگاندارعا جۇگىندى. قىلمىسكەرلەر جازاسىز قالمايتىنىنا سەنسە جۇرت بۇلاي شارق ۇرماس ەدى. سول الماتى وبلىسىنىڭ تالعار اۋدانىندا قىركۇيەك ايىنىڭ سوڭىندا ءبىر تاربيەسىز بۇزاقىنىڭ كىشكەنتاي بالانى اياۋسىز ساباعانى تۇسىرىلگەن بەينەجازبا تاراعان ەدى. ول كەزدە الماتى وبلىسىنىڭ پوليسەيلەرى ءىستى باقىلاۋعا الدىق دەدى. الايدا ارادا اپتا وتكەندە سول تالعاردا 16 جاستاعى ۇلدى ءبىر توپ قىلمىسكەر ءولتىرىپ كەتكەنىن ەستىپ-بىلىپ وتىرمىز»، - دەيدى ول.
سارسەنعالييەۆ جاسوسپىرىمدەر جاپا شەككەن جاعدايلاردى ءتىزدى.
«قىركۇيەكتە پاۆلودار وبلىسىنىڭ كەنجەكول اۋىلىندا ءبىر توپ بۇزاقى ءبىر ءجاسوسپىرىمدى اياۋسىز ساباپ تاستادى. اقتاۋدا جاسوپىرىمدەردىڭ جاپپاي توبەلەسى تۇسىرىلگەن ۆيدەو تارادى وسى اپتادا، ول جەردە توپ-توپقا بولىنگەن بالالار ءبىر-بىرىن اياۋسىز ساباپ جاتىر. ارتىنشا سول اقتاۋدا بىرنەشە قىزدىڭ ءبىر قىزدى ۇرىپ قورلاپ جاتقانى تۇسىرىلگەن بەينەجازبا جەلىنى كەزىپ كەتتى. بۇل تەك سوڭعى ايداعى جايتتار»، - دەيدى ول.
قورىتىندىلاي كەلە دەپۋتات ءبىرقاتار باستاما ۇسىندى:
- الماتى وبلىسى تالعار اۋدانىندا 16 جاسار ازاماتتى ولتىرگەن، جاقىندارىن اياۋسىز ساباعان قىلمىسكەرلەر قاماۋعا الىنىپ، ولارعا زاڭعا سايكەس ءادىل جازا بەرىلۋى ءتيىس.
- اتالعان ءىس بويىنشا بارلىق قۇقىق قورعاۋ ورگاندارى تىزە قوسىپ، وقيعانىڭ زاڭدى قۇقىقتىق باعاسىن تەز ارادا بەرۋى قاجەت.
- ءبىلىم بەرۋ ۇيىمدارىندا «قۇقىق نەگىزدەرى» اتتى ءپان بار. ءبىراق ونىڭ ساپاسىنا قاتىستى سىن كوپ. اتالعان ءپاننىڭ باعدارلاماسىن قايتا جاساپ، بالالار ومىردە بەتپە-بەت كەلەتىن جايتتار مەن ومىردەن الىنعان ناقتى كەيستەرگە سۇيەنىپ وقىتۋ كەرەك.
- مەملەكەت باسشىسى ۇسىنعان زاڭ مەن ءتارتىپ قاعيداتىنا سۇيەنە وتىرىپ، ەلدەگى قۇقىق قورعاۋ جۇيەسىنە، پوليسياعا دەگەن حالىق سەنىمىن كۇشەيتۋ، قوعام كوزقاراسىن وزگەرتۋ بويىنشا جالپىمەملەكەتتىك دەڭگەيدە كەشەندى شارالار قابىلداۋ قاجەت. ول ءۇشىن حالىققا ادال قىزمەت ەتۋ كەرەك، ادال قىزمەت بولماسا، سەنىم بولمايدى، ال سەنىمسىز اتقارىلعان ءىستىڭ ءبارى ەش كەتەتىنى امبەگە ايان.
