مەملەكەت باسشىسىنىڭ وكىمىمەن سىرىمبەت ەردەن ۇلى قاسكەيەۆ قازاقستان رەسپۋبليكاسىنىڭ ستراتەگيالىق جوسپارلاۋ جانە رەفورمالار اگەنتتىگى ءتوراعاسىنىڭ ورىنباسارى لاۋازىمىنا تاعايىندالدى، دەپ حابارلايدى اقوردا.
سىرىمبەت قاسكەيەۆ 2014 جىلى م. ۆ. لومونوسوۆ اتىنداعى ماسكەۋ مەملەكەتتىك ۋنيۆەرسيتەتىن قولدانبالى ماتەماتيكا جانە ينفورماتيكا ماماندىعى بويىنشا بىتىرگەن.
ءار جىلدارى حالىقارالىق ۆاليۋتا قورىنىڭ قارجىلىق باعدارلامالاۋ جانە ساياسات، فيسكالدىق تالداۋ جانە بولجاۋ بويىنشا بىلىكتىلىگىن ارتتىرۋ كۋرستارىنان ءوتتى.
2014-2016 جىلدار ارالىعىندا «ەكونوميكالىق زەرتتەۋلەر ينستيتۋتى» اق تالدامالىق زەرتتەۋلەر جانە بولجامداۋ ورتالىعىنىڭ اعا ساراپشىسى، ديرەكتوردىڭ ورىنباسارى لاۋازىمدارىن اتقاردى.
2016 جىلدان باستاپ 2017 جىلعا دەيىن «قازاقستاننىڭ دامۋ بانكى» اق-دا ستراتەگيا جانە جوسپارلاۋ دەپارتامەنتىنىڭ باس مەنەدجەرى لاۋازىمىندا جۇمىس ىستەدى.
2017-2020 جىلدارى «بايتەرەك ۇلتتىق باسقارۋشى حولدينگى» اق تالداۋ جانە زەرتتەۋلەر دەپارتامەنتىنىڭ باس مەنەدجەرى قىزمەتىن اتقاردى، 2020-2022 جىلدارى «بايتەرەك ۇلتتىق باسقارۋشى حولدينگى» اق جوبالىق قارجىلاندىرۋ جانە ينۆەستورلارمەن جۇمىس دەپارتامەنتى جوباسىنىڭ باسشىسى بولدى.
2022 جىلعى ساۋىردەن باستاپ قازاقستان رەسپۋبليكاسى ستراتەگيالىق جوسپارلاۋ جانە رەفورمالار جونىندەگى اگەنتتىگىنىڭ ماكروەكونوميكالىق ساياسات دەپارتامەنتىنىڭ ديرەكتورى بولىپ تابىلادى.
پرەزيدەنت جاستار كادرلىق رەزەرۆىنىڭ مۇشەسى.