ۆاليۋتا باعامى
  • USD -

    518.9
  • EUR -

    587
  • RUB -

    6.23
سقو-دا تاسقىنعا قارسى جۇمىستارعا 3 مىڭنان استام جۇمىلدىرىلدى
08 ءساۋىر 2024
سقو-دا تاسقىنعا قارسى جۇمىستارعا 3 مىڭنان استام جۇمىلدىرىلدى

قازاقستان پرەمەر-مينيسترى ولجاس بەكتەنوۆ پەتروپاۆلدا ەسىل وزەنى ارناسىنان اسىپ كەتكەن جاعدايدا قالانى جانە جاقىن ماڭداعى ەلدى مەكەندەردى سۋ تاسقىنىنان قورعاۋعا ارنالعان بوگەتتەردى نىعايتۋ جۇمىستارىن تەكسەردى. بۇل تۋرالى ۇكىمەتتىڭ باسپا ءسوز قىزمەتى حابارلادى.

ۇكىمەت باسشىسى تەپليچنوە جانە كوجيەۆەننايا اۋىلدارىنداعى قورعانىش ۇيىندىلەرىنىڭ جاعدايىن قاراپ، 2017 جىلعى سۋ تاسقىنىنان كەيىن جۇرگىزىلگەن جۇمىستاردىڭ ەسەبىن تىڭدادى.

قازىرگى ۋاقىتتا سەرگەيەۆ سۋ قويماسىنداعى سۋ دەڭگەيىنىڭ جوعارىلاۋىن ەسكەرە وتىرىپ، قولدانىستاعى بوگەتتەردى نىعايتۋ جانە ولاردىڭ ۇزىندىعى مەن بيىكتىگىن ارتتىرۋ بويىنشا جۇمىستار جۇرگىزىلۋدە. جالپى، قارعىن سۋدى وتكىزۋ ءۇشىن اۆتوجولداردا جول توسەمىن ارشۋ جۇمىستارى 6 رەت جۇرگىزىلدى. بالامالى باعىت قاراستىرىلىپ، بەلگىلەر قويىلىپ، كەزەكشىلىك ۇيىمداستىرىلعان. سۋ تاسقىنى كەزەڭى باستالعالى بەرى ەلدى مەكەندەردىڭ كوشەلەرى مەن اۋلا اۋماقتارىنان 440 مىڭ م3 سۋ سورىلدى. 165 شاقىرىمنان استام ارىق تازارتىلدى، 2.7 شاقىرىم كانالدار كەڭەيتىلىپ، تەرەڭدەتىلدى.

ولجاس بەكتەنوۆ سۋ تاسقىنىنان زارداپ شەككەندەردى قولداۋ شارالارى مەن جۇرگىزىلىپ جاتقان جۇمىستار تۋرالى تۇرعىندار سۇراقتارىنا جاۋاپ بەردى، ەرىكتىلەر مەن ساراپشىلارعا كورسەتكەن كومەكتەرى مەن قولداۋلارى ءۇشىن العىسىن ءبىلدىردى.

ۇكىمەت باسشىسى تارتىلعان قوسىمشا كۇشتەر مەن تەحنيكانى ەسكەرە وتىرىپ، بوگەتتەردى نىعايتۋ جۇمىستارىنىڭ قارقىنىن جەدەلدەتۋ، ونىڭ ىشىندە بيىكتىگىن ارتتىرۋ قاجەتتىگىن اتاپ ءوتتى.

«جۇمىسقا جەكە قۇرام مەن ۇلتتىق ۇلان جۇمىلدىرىلدى. پولك تە كۇشەيتىلەدى. قورعانىس مينيسترلىگى قوسىلدى، سوندىقتان كۇش جەتكىلىكتى بولۋى كەرەك. ءقازىر كۇش بىرىكتىرۋىمىز قاجەت. الداعى 2-3 كۇندە اۋىر زارداپتاردىڭ الدىن الۋ ءۇشىن كوپ جۇمىس ىستەۋ كەرەك. ەڭ الدىمەن ادامدار زارداپ شەكپەۋى ماڭىزدى»، — دەپ اتاپ ءوتتى ولجاس بەكتەنوۆ.

قازىرگى تاڭدا سۋ تاسقىنىنا قارسى ءىس-شارالارعا اكىمدىكتىڭ، پد، ۇلتتىق ۇلان بولىمشەسىنىڭ جانە جەكە ۇيىمداردىڭ 1432 قىزمەتكەرى، 1200 ەرىكتى قاتىسۋدا. پرەمەر-مينيستردىڭ تاپسىرماسى بويىنشا بۇگىن قورعانىس مينيسترلىگىنىڭ 300 اسكەري قىزمەتشىسى كەلدى. وسىلايشا بارلىعى 3000-عا جۋىق ادام جۇمىلدىرىلدى.

سولتۇستىك قازاقستان وبلىسىنداعى سۋ تاسقىنى جاعدايى ەرەكشە باقىلاۋدا.  پرەمەر-مينيستردىڭ ءبىرىنشى ورىنباسارى رومان سكليار دا وسىندا. جەدەل شتابتار تاۋلىك بويى جۇمىس ىستەيدى.

RELATED NEWS
قازاقستاننىڭ 20-دان استام ەلدى مەكەنىندە سۋ تاسقانى بولۋى مۇمكىن
05 اقپان 2025
قازاقستاننىڭ 20-دان استام ەلدى مەكەنىندە سۋ تاسقانى بولۋى مۇمكىن

ءماجىلىستىڭ جالپى وتىرىسىنىڭ كۋلۋارىنداتوتەنشە جاعدايلار ءمينيسترى شىڭعىس ءارىنوۆ سۋ تاسقىنى ءقاۋپى بار ايماقتا 23 ەلدى مەكەن بار ەكەنىن ايتتى، دەپ حابارلايدى Ulys.

«بۇل ستاتيستيكانى ماماندار بەرەدى. كەيبىر دەپۋتاتتار وسى ءوڭىردىڭ بارلىعىن سۋ باسادى دەپ شوشىپ جاتىر ەكەن. ولاي بولمايدى. بەلگىلى ءبىر جۇمىس جۇرگىزەمىز. كەيبىر وڭىردەن ول قاۋىپتەر جويىلدى. ال وڭىرلەر بويىنشا سۋ تاسقىنى ءقاۋپى ءتونىپ تۇرعان توپ-5 ايماقتى ايتاتىن بولساق، بقو، قاراعاندى، اقمولا، شىعىس قازاقستان جانە سولتۇستىك قازاقستان وبلىستارى بولىپ وتىر»، - دەدى شىڭعىس ءارىنوۆ

سۋ تاسقىنىنا دايىندىق:  ەل اۋماعىنىڭ 71%-ىندا قار جاتىر
11 ناۋرىز 2025
سۋ تاسقىنىنا دايىندىق: ەل اۋماعىنىڭ 71%-ىندا قار جاتىر

ۇكىمەت  وتىرىسىندا ەكولوگيا جانە تابيعي رەسۋرستار ءمينيسترى ەرلان نىسانبايەۆ ەل اۋماعىنىڭ 71%-ىندا قار جاتقانىن حابارلادى. 

 ول 11 ناۋرىزداعى جاعداي بويىنشا قار استىندا جاتقان اۋماق 71%-دى قۇرايتىنىن، دەگەنمەن بۇل وتكەن اپتاعا قاراعاندا 15%-عا از ەكەنىن اتاپ ءوتتى. ەلىمىزدىڭ وڭتۇستىگىندە: قىزىلوردا، تۇركىستان جانە جامبىل وبلىستارىندا، باتىسىندا: باتىس قازاقستان، اتىراۋ جانە ماڭعىستاۋ وبلىستارىندا قار ەرىپ جاتىر.
«ناۋرىز ايىندا تەمپەراتۋرا كوتەرىلىپ، جاۋىن-شاشىن كوپ بولسا ەرىگەن قار سۋىنان تاۋ وزەندەرىندە تاسقىن ءجۇرۋى مۇمكىن. ورتالىق، سولتۇستىك جانە شىعىس ايماقتاردا قار قالىڭ، ناۋرىز ايىندا جاۋىن-شاشىن مولشەرى ايلىق نورمادان ەكى جانە ودان دا كوپ تۇسەدى دەپ كۇتىلىپ وتىر. مىسالى، استانادا ءبىرىنشى ونكۇندىكتىڭ وزىندە ايلىق جاۋىن-شاشىن مولشەرى ءتۇستى»، 
— دەپ اتاپ ءوتتى ەرلان نىسانبايەۆ.

سۋ تاسقىنىمەن كۇرەس: 5 مىڭنان اسا وتباسى قونىس تويىن تويلادى
08 تامىز 2024
سۋ تاسقىنىمەن كۇرەس: 5 مىڭنان اسا وتباسى قونىس تويىن تويلادى

سۋ تاسقىنىنان زارداپ شەككەن 5 239 وتباسىعا ارنايى سالىنعان جانە ساتىپ الىنعان ۇيلەر مەن پاتەرلەر بەرىلدى، دەپ حابارلادى ۇكىمەتتىڭ باسپا ءسوز قىزمەتى.

ۇكىمەت سۋ تاسقىنىنان زارداپ شەككەن وتباسىلارعا تۇرعىن ءۇي سالۋ جانە ساتىپ الۋ، سونداي-اق ولارعا جان-جاقتى كومەك كورسەتۋ بويىنشا وڭىرلەردە جۇرگىزىلىپ جاتقان جۇمىستاردى تۇراقتى باقىلاۋدا ۇستاپ وتىر.

قيراعان باسپاناسىنىڭ ورنىنا 4769 وتباسى جاڭا ۇيلەر مەن پاتەرلەرگە يە بولدى. سونىمەن قاتار زارداپ شەككەن وڭىرلەردە 2568 جاڭا ءۇيدىڭ قۇرىلىسى قارقىندى تۇردە جۇرگىزىلىپ جاتىر، ونىڭ ىشىندە 470 نىسان بويىنشا جۇمىستار تولىعىمەن اياقتالىپ، تۇرعىندارعا كىلتتەر تابىستالدى.

سولتۇستىك قازاقستان وبلىسىندا قۇرىلىسى اياقتالعان 285 ءۇي، قوستاناي وبلىسىندا 57، باتىس قازاقستان وبلىسىندا 80، اقتوبە وبلىسىندا 43 جانە پاۆلودار وبلىسىندا 5 ءۇي پايدالانۋعا بەرىلدى.

بارلىق وبلىستا سۋ باسقان تۇرعىن ۇيلەردى تەكسەرۋ جانە باعالاۋ جۇمىستارى 100% اياقتالدى. جالپى سوماسى 49،3 ملرد تەڭگەگە 8 853 وتباسى تۇرعىن ءۇيدى جوندەۋگە جانە قالپىنا كەلتىرۋگە ءتيىستى تولەم الدى.

34 216 وتباسىعا 12،6 ملرد تەڭگەگە 100 اەك مولشەرىندە ءبىرجولعى وتەماقى تولەندى. سونداي-اق جوعالعان ءبىرىنشى قاجەتتىلىكتەگى زاتتارىن ساتىپ الۋ ءۇشىن 150 اەك-كە دەيىن قوسىمشا تولەمدەر بەرىلۋدە. بۇگىنگى تاڭدا 9،9 ملرد تەڭگەگە 21 869 وتباسى وسىنداي كومەك الدى.

زارداپ شەككەن بيزنەسكە كەلتىرىلگەن زالالدى وتەۋ جۇمىستارى جالعاسۋدا. وڭىرلىك كوميسسيالار جالپى سوماسى 7،9 ملرد تەڭگەگە شوب سۋبەكتىلەرىنىڭ 455 ءوتىنىمىن قاراپ، ماقۇلدادى.

سۋعا كەتكەن مال ءۇشىن بەرىلگەن مەملەكەتتىك كومەك كولەمى 2،8 ملرد تەڭگەدەن استى.

ءبىز تۋرالى
ulys.kz — اقپاراتتىق، ساراپتامالىق جانە تانىمدىق باعىتتاعى ماتەريالداردى بەرەدى.
 
مۋلتيمەديالىق جوبا زامان تالابىنا ساي جاسالعان. قازاقستاننىڭ اقپاراتتىق نارىعىن ساپالى
كونتەنتپەن قامتاماسىز ەتۋگە ۇلەس قوسۋعا باعىتتالعان. مۇنداعى ساراپتامالىق، تانىمدىق
ماقالالار سان سالانى قامتيدى. گەوستراتەگيا، گەوەكونوميكا، گەوساياسات، حالىقارالىق
قاتىناستار مەن ەلدىڭ ىشكى-سىرتقى ساياساتى، ەكونوميكا، جاھاندا بولىپ جاتقان تەكتونيكالىق
وزگەرىستەر مەن ترەند تاقىرىپتار ۇلتتىق مۇددە تۇرعىسىنان تەرەڭ تالدانىپ قازاق
وقىرماندارىنا جەتكىزىلەدى. ورتالىق ازيا مەن تۇركى الەمىنە ەرەكشە كوڭىل بولىنەدى.