ساياساتتانۋشى، ق ر پرەزيدەنتى جانىنداعى ۇلتتىق قۇرىلتاي مۇشەسى قازىبەك مايگەلدينوۆ استانادا بۇگىن وتكەن شىۇ سامميتىنە قاتىستى پىكىر ءبىلدىردى، دەپ حابارلايدى Ulys.
«قانشا ۋاقىت بويى كۇتىپ جۇرگەن شىۇ ءسامميتى ءوتتى. قازاقستان ۇيىمعا ءبىر جىل ءتوراعالىق ەتىپ، ەندى مىنە بۇگىن سونىڭ قورىتىندىسىن شىعاردى. سامميتكە الەمنىڭ جەر-جەرىنەن مەملەكەت باسشىلارى مەن حالىقارالىق ۇيىم وكىلدەرى كەلگەن ەكەن. ونىڭ ۇستىنە بۇگىن بەلارۋس ۇيىمعا مۇشە اتاندى. باستاپقىدا شانحاي بەستىگى رەتىندە قۇرىلعان ۇيىمعا بەلارۋس قوسىلىپ، وندىققا اينالدى.
جالپى، بۇگىنگى ءوتىپ جاتقان ءىس-شارانىڭ ماڭىزى زور. اتالمىش ۇيىم ءبىر كەزدەرى ەۋرازيا ايماعىنداعى ىنتىماقتاستىقتى نىعايتۋ ءۇشىن قۇرىلعان بولاتىن. ال ءقازىر الەم تەرروريزم، ەكسترەميزم، كيبەرقاۋىپتەر پەن كليماتتىڭ وزگەرۋى سياقتى ءتۇرلى قاۋىپتەردىڭ الدىندا تۇرعان كەزدە، شىۇ ءرولى كۇن ساناپ ارتىپ كەلەدى.
سونىمەن بۇگىنگى كۇن ق. توقايەۆتىڭ قاتىسۋمەن وتكەن شىۇ-عا مۇشە مەملەكەتتەر باسشىلارى كەڭەسىنىڭ وتىرىسىنان باستالدى. وتىرىستا ءسوز سويلەگەن باسشىمىز بۇگىندە شانحاي ىنتىماقتاستىق ۇيىمى دوستىق، تاتۋ كورشىلىك، تەڭقۇقىقتىق پەن ءوزارا قولداۋدىڭ، ياعني «شانحاي رۋحى» نەگىزىندە جۇمىس ىستەيتىن مەملەكەتارالىق قاتىناستاردىڭ ءتيىمدى تەتىگىنە اينالعانىن اتاپ ءوتتى. بىلتىردان باستاپ ۇيىمعا ءتوراعالىق ەتكەن ۋاقىت ارالىعىندا ءتۇرلى دەڭگەيدە 150-گە جۋىق ءىس-شارا، سونىڭ ىشىندە سيفرلىق دامۋ، تۋريزم، ەنەرگەتيكا، بيزنەس سالالارىندا فورۋمدار مەن شىۇ جاستار كەڭەسى وتكىزىلدى. بۇل جايلى دا ق. توقايەۆ مالىمدەدى. ارى قاراي ءوز سوزىندە ءتۇرلى ءىس-شارالاردىڭ ناتيجەسىندە شىۇ كەڭىستىگىندەگى ساۋدا-ەكونوميكالىق ىنتىماقتاستىق قارقىندى دامىپ كەلە جاتقانىنا توقتالدى»، -دەيدى ساياساتتانۋشى.
ونىڭ ايتۋىنشا توقايەۆ قازاقستان شىۇ ءتوراعاسى رەتىندە الدىڭعى سامميتتە ايتىلعان بارلىق ماقسات-مىندەتتى تولىعىمەن ورىنداعانىن ايتتى.
«پرەزيدەنت ەلىمىزدىڭ باستامالارىن جۇزەگە اسىرۋعا قولداۋ كورسەتىپ، بەلسەندى اتسالىسقانى ءۇشىن بارلىق مەملەكەتكە شىنايى ريزاشىلىعىن ءبىلدىردى.
ارينە، پرەزيدەنت قاۋىپسىزدىك سالاسىنداعى ءوزارا سەنىم مەن ىنتىماقتاستىقتى نىعايتۋدى ءبىرىنشى ماڭىزدى باعىت ەكەنىن دە نازاردان تىس قالدىرعان جوق»، - دەيدى ساراپشى.
