19 ماۋسىم كۇنى تبليسيدە گرۋزيا ۇكىمەتارالىق پراۆوسلاۆيە اسسامبلەياسىنىڭ 26ء-شى وتىرىسى باستالعان بولاتىن. وعان 25 ەلدەن جۇزدەي دەلەگاسيا قاتىسىپ جاتقان. كەشە گرۋزيا پارلامەنتىندە ءوتىپ جاتقان ۇكىمەتارالىق پراۆوسلاۆيە اسسامبلەياسىنىڭ وتىرىسىنىڭ باستالۋىندا گرۋزيا پارلامەنتى ءتوراعاسىنىڭ ورىندىعىنا وتىرىپ الىپ ءتوراعالىق ەتىپ وتىرعان رەسەي مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ ارەكەتى وپپازيسيانىڭ نارازىلىعىن تۋدىردى.
جيىندى بەل ورتادان ۇزگەن «ەۋروپالىق گرۋزيا» پارتياسى وكىلدەرى رەسەي دەلەگاسياسىنا وتىرىستى تاستاپ شىعۋىن تالاپ ەتتى. سەبەبى، ول تبيليسيگە كەلەر كەزدە 2008 جىلى رەسەي مەن گرۋزيا اراسىندا بولعان تەكەتىرەس كەزىندە ابحازيادا بولىپ، رەسەي سەپەراتيستەرى اراسىندا بەلسەندى جۇمىس ىستەگەن دەگەن اقپارات تاراعان ەدى. پارلامەنت قابىرعاسىنداعى وقيعا كەشكە ۋشىعىپ، ون مىڭداعان ادام كوشەگە شىعىپ، پارلامەنت الدىندا ميتينگ وتكىزدى. پوليسيا كۇش قولدانىپ، قاقتىعىس ناتيجەسىندە ەكى جاقتان جۇزدەگەن ادام جاراقاتتانعان. حالىق پارلامەنت ءتوراعاسى يراكليي كوباحيدزە مەن ىشكى ىستەر ءمينيسترى گەورگيي گاحاريانى قىزمەتتەن كەتۋىن تالاپ ەتۋدە. اسسامبلەيا پرەزيدەنتى سەرگەي گاۆريلوۆتىڭ توراعىلىعىمەن 22 ماۋسىمعا دەيىن ءوتۋى ءتيىس اسسامبلەيا وتىرىسى وسىلايشا ورتا جولدان توقتادى. ال رەسەي مەملەكەتتىك دۋماسىنىڭ دەپۋتاتى سەرگەي گاۆريلوۆتىڭ ءوز بولسا بۇل شارانى رەسەيگە نارازى توپتىڭ الدىن الا جوسپارالاپ، دايىنداعان اكسياسى دەپ وتىر. رەسەي اقپارات قۇرالدارى دا راديكالدى وپپازيسيانىڭ ايقاي-شۋى دەپ كورسەتىپ جاتىر.
بۇل وقيعاعا قاتىستى گرۋزيانىڭ بۇرىنعى پرەزيدەنتى ميحايل سااكاشۆيلي ءوز فەيسبۋك الەۋمەتتىك جەلىسىندە «ءوزىم قۇرعان گرۋزين پوليسياسىن يۆانيشۆيليگە باعىنعاي، حالىق جاعىنا شىعۋدى شاقىرامىن» دەپ جازدى. ال گرۋزيا پرەزيدەنتى سالومە زارابيشۆيلي «بۇگىن بولعان وقيعا ۇلكەن قىلمىس، ەلىمىزدىڭ ار-نامىسىنا قاياۋ تۇسىرەتىن وقيعا» دەي كەلە «رەسەي ءبىزدىڭ جاۋىمىز، وككۋپپانت، ولاردىڭ باسقارىپ وتىرعان قازىرگى بەسىنشى كوللوناسى ولاردىڭ اگرەسسياسىنان الدەقايدا ءقاۋىپتى بولۋى مۇمكىن» دەپ بىتىرگەن ءوز ويىن.
ۆيدەو ەحو كاۆكازا سايتىنان الىندى
