ق ر پرەمەر-مينيسترى اسقار مامين تۇركيا رەسپۋبليكاسىنا جۇمىس ساپارى اياسىندا پرەزيدەنت رەجەپ ەردوعانمەن جانە ۆيسە-پرەزيدەنت فۋات وكتايمەن كەلىسسوزدەر جۇرگىزدى. «سونىمەن قاتار، قازاقستان–تۇركيا ۇكىمەتارالىق ەكونوميكالىق كوميسسياسىنىڭ ءحى وتىرىسىنا، ەكىجاقتى بيزنەس-فورۋمنىڭ اشىلۋىنا جانە تۇرىك بيزنەسىنىڭ كاپيتاندارىمەن كەزدەسۋگە قاتىستى» دەپ حابارلايدى ۇكىمەت باسشىسىنىڭ باسپا ءسوز قىزمەتى.
«ەلدەرىمىز اراسىنداعى ىنتىماقتاستىق بارلىق سالادا قارقىندى تۇردە دامىپ جاتىر، ەكىجاقتى قاتىناستاردى ساپالى جاڭا دەڭگەيگە شىعارۋدىڭ نەگىزى سالىندى. قازاقستاننىڭ تۇڭعىش پرەزيدەنتى – ەلباسى ن. نازاربايەۆ پەن مەملەكەت باسشىسى ق. توقايەۆ تۇركيانى قازاقستاننىڭ ماڭىزدى ءارى ستراتەگيالىق سەرىكتەستەرىنىڭ ءبىرى رەتىندە قاراستىرادى»، — دەدى ا. مامين انكارا قالاسىندا ر. ەردوعانمەن كەزدەسۋدە.
قازاقستاندا تۇرىك كاپيتالىنىڭ قاتىسۋىمەن 4200-دەن استام كومپانيا تىركەلگەن، ولار ەنەرگەتيكا، كولىك، اگروونەركاسىپ، ماشينا جاساۋ سەكتورلارىندا، ينفراقۇرىلىمدىق قۇرىلىستا جانە باسقا دا سالالاردا قىزمەت كورسەتەدى. وسى جىلدىڭ 9 ايىنىڭ قورىتىندىسى بويىنشا ەكىجاقتى تاۋار اينالىمى $2،3 ملرد-قا جەتتى، بۇل 2018 جىلدىڭ سايكەس كەزەڭىندەگى كورسەتكىشتەن 68%-عا ارتىق. وسى جىلدىڭ سوڭىنا قاراي ەكىجاقتى ساۋدا-ساتتىق كولەمى $3 ملرد اسادى دەپ كۇتىلۋدە. قازىرگى كەزدە تۇرىك تاراپىمەن بىرلەسىپ پىسىقتالىپ جانە ىسكە اسىرىلىپ جاتقان ينۆەستيسيالىق جوبالار پۋلى $6 ملرد-تان اسادى.
كەلىسسوزدەر بارىسىندا ساۋدا-ەكونوميكالىق، ينۆەستيسيالىق، كولىك-لوگيستيكا، اۋىل شارۋاشىلىعى جانە باسقا دا سالالارداعى ىنتىماقتاستىقتى ودان ءارى دامىتۋ ماسەلەلەرى تالقىلاندى.
ا. مامين ق ر تۇڭعىش پرەزيدەنتى – ەلباسى ن. نازاربايەۆتىڭ مونۋمەنتىنە بارىپ، اتاتۇرىك كەسەنەسىنە گۇل شوعىن قويدى جانە ر. ەردوعانمەن بىرگە تۇركيادا وتكىزىلىپ جاتقان «بولاشاققا تىنىس بەر» ەكولوگيالىق ناۋقانى اياسىندا اعاشتار وتىرعىزدى. سونىمەن قاتار، ۇكىمەت باسشىسى تر ساۋدا-ونەركاسىپ پالاتاسىنىڭ جۇمىسىمەن تانىستى، ونىڭ ىشىندە تۇركيانىڭ مەملەكەتتىك ورگاندارىن سيفرلاندىرۋ جۇمىستارى دا بار.
ق ر پرەمەر-مينيسترى ا. مامين تر ۆيسە-پرەزيدەنتى ف. وكتايمەن ستامبۋلدا قازاقستان–تۇركيا ۇكىمەتارالىق ەكونوميكالىق كوميسسياسىنىڭ ءحى وتىرىسىنا قاتىستى.
شارا قورىتىندىسى بويىنشا ساۋدا جانە ينۆەستيسيالار، ونەركاسىپ، كولىك، ءبىلىم بەرۋ، دەنساۋلىق ساقتاۋ، تۋريزم ءتارىزدى جانە ت.ب. سالالاردا 65 پۋنكتتەن تۇراتىن بىرلەسكەن ءىس-قيمىلدار جوسپارى قابىلداندى. بۇدان وزگە، حالىقارالىق ارالاس جۇكتەردى تاسىمالداۋ تۋرالى ۇكىمەتارالىق كەلىسىمگە، 2019-2021 جىلدارعا ارنالعان «جاڭا سينەرگيا» بىرلەسكەن ەكونوميكالىق باعدارلاماسى بويىنشا ءىس-قيمىلدار حاتتاماسىنا، سونداي-اق، ق ر ساۋدا جانە ينتەگراسيا مينيسترلىگى مەن تر ساۋدا مينيسترلىگى اراسىنداعى «حالال» ساناتىنداعى ونىمدەر بويىنشا ىنتىماقتاستىقتى دامىتۋعا باعىتتالعان ءوزارا تۇسىنىستىك تۋرالى مەموراندۋمعا قول قويىلدى.
ا. مامين مەن ف. وكتاي 500-گە جۋىق تۇرىك جانە 100 قازاقستاندىق ىسكەرلىك ورتالاردىڭ وكىلدەرىنىڭ قاتىسۋىمەن قازاقستان–تۇركيا بيزنەس-فورۋمىن اشتى. فورۋم اياسىندا ينفراقۇرىلىم، يندۋستريا، كولىك-لوگيستيكا سالالارىندا، دەنساۋلىق ساقتاۋدا، قارجى نارىعىن دامىتۋدا، مەملەكەتتىك-جەكەشەلىك ارىپتەستىكتە تاجىريبەمەن الماسۋ جانە ت.ب. سالالاردا بىرلەسكەن جوبالاردى ىسكە اسىرۋدى قاراستىراتىن، جالپى $1،5 ملرد سوماسىنا 18 قۇجاتقا قول قويىلدى.
اتاپ ايتقاندا، قازاقستاندا قاتپاركارتون قاپتاما، لاك-بوياۋ ونىمدەرى وندىرىستەرىن، «اقتوبە–گەبزە» يندۋستريالىق ايماعىن اشۋ، تۇركىستان قالاسىن ينفراقۇرىلىمدىق دامىتۋ، سونداي-اق، الماتى مەن قاراعاندىدا ۋنيۆەرسيتەتتىك كلينيكالار سالۋ، كوكشەتاۋ، قىزىلوردا، اقتاۋ، اتىراۋ، اقتوبە، تارازدا كوپبەيىندى اۋرۋحانالار سالۋ، شىمكەنت پەن اقتوبەدە دياگنوستيكالىق ورتالىقتار سالۋ تۋرالى ۋاعدالاستىقتارعا قول جەتكىزىلدى.
قازاقستان پرەمەر-مينيسترى تۇركيانىڭ 41 ءىرى كومپانياسىنىڭ باسشىلارىمەن – ق ر ەكونوميكاسىنىڭ قازىرگى جانە الەۋەتتى ينۆەستورلارىمەن كەزدەستى. اسقار مامين تۇرىك بيزنەسىنىڭ كاپيتاندارىمەن ەكىجاقتى كەلىسسوزدەر، سونىمەن قاتار، «دوڭگەلەك ۇستەل» فورماتىندا ورتاق كەزدەسۋ وتكىزدى. ۇكىمەت باسشىسى تۇرىك بيزنەسمەندەرىن تۇركىستان قالاسىنىڭ تۇركى الەمىنىڭ مادەني-رۋحاني ورتالىعى رەتىندە جاڭعىرۋى مەن دامۋىنا ۇلەس قوسۋعا شاقىردى.
تۇركياعا ساپارى اياسىندا ا. مامين قايسەرى قالاسىنا بارىپ، وندا 2018 جىلدان باستاپ قىزمەت كورسەتەتىن، مەملەكەتتىك-جەكەشەلىك ارىپتەستىك مودەلى بويىنشا جۇزەگە اسىرىلعان تۇركيانىڭ دەنساۋلىق ساقتاۋ سالاسىنداعى العاشقى جوباسىنا اينالعان قالالىق اۋرۋحانا قىزمەتىمەن تانىستى.
سۋرەتتەر primeminister.kz سايتىنان الىندى.
