بۇگىن ون ەكى ايدىڭ سۇلتانى سانالاتىن رامازان ايى باستالدى.
قازاقستان مۇسىلماندارى ءدىني باسقارماسىنىڭ حابارلاۋىنشا، 24 ساۋىردە باستالعان رامازان ايى 23 مامىردا اياقتالادى. مامىر ايىنىڭ 19-ىنان 20-سىنا قاراعان ءتۇن - قاسيەتتى ءقادىر ءتۇنى. بيىل ءپىتىر ساداقا جان باسىنا 370 تەڭگەدەن بەلگىلەنگەن.
ايتا كەتەيىك، كوروناۆيرۋس ينفەكسياسىنا بايلانىستى ەلدە توتەنشە جاعداي جاريالانىپ، بيىل وسى رامازان ايىنداعى ءداستۇرلى شارالارعا ءبىرشاما شەكتەۋلەر ەنگىزىلدى.
«وزدەرىڭىز بىلەسىزدەر، ەلىمىزدە جاريالانعان توتەنشە جاعدايعا بايلانىستى مەشىتتە جاماعاتپەن وقىلاتىن نامازدارعا ۋاقىتشا شەكتەۋ قويدىق. ءار ازاماتتىڭ ءومىرى مەن دەنساۋلىعى قىمبات قۇندىلىق بولعاندىقتان، جۇقپالى ىندەتتىڭ الدىن الۋ ءۇشىن وسىنداي شەشىم قابىلداۋعا ءماجبۇر بولدىق. ارينە، بۇل – ۋاقىتشا سىناق. الايدا جاماعات نامازى ءۇشىن مەشىت ەسىگى جابىلعانىمەن، ساۋاپ پەن ىزگىلىك ەسىكتەرى ەشقاشان جابىلمايدى. قاسيەتتى حاديس-شاريفتە ايتىلعانداي، مۇسىلماننىڭ نيەتى امالىنان قايىرلى»، - دەدى قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى.
وسى ورايدا قمدب قاسيەتتى رامازان ايىندا ىندەتتىڭ تارالۋىنىڭ الدىن الۋ ماقساتىندا، كارانتين مەرزىمىندە تاراۋىق نامازى مەشىتتەردە جاماعاتپەن وقىلمايتىنىن مالىمدەدى. اركىم تاراۋىق نامازىن ءوز شاڭىراعىندا وتباسى مۇشەلەرىمەن وقۋىنا كەڭەس بەرىلدى.
سونىمەن قاتار، مەشىتتەردە، ءدامحانالاردا، قوعامدىق ورىنداردا جانە باسقا دا مەكەمەلەردە جينالىپ، اۋىزاشار بەرۋ ۋاقىتشا توقتاتىلاتىنى ايتىلدى.
بۇدان بولەك، توتەنشە جاعدايعا بايلانىستى رامازان ايىندا بەرىلەتىن ءپىتىر ساداقا مەن زەكەتتى ءموبيلدى قوسىمشالار ارقىلى اۋدارۋعا بولادى.
ورازا تۇتۋ - يگى مۇسىلمان قاۋىمىنىڭ بەس پارىزىنىڭ ءبىرى. جالپى «ورازا» ءسوزىنىڭ ماعىناسى - ءبىر نارسەدەن الىستاۋ، بەلگىلى ءبىر ۋاقىت ارالىعىندا ىشىپ-جەۋدەن، ءناپسى قالاۋلارىنان تىيىلۋ دەگەندى بىلدىرەدى.
ورازاعا نيەت: «اللا تاعالانىڭ رازىلىعى ءۇشىن تاڭنان كۇن باتقانعا دەيىن مۇباراك رامازان ايىنىڭ ورازاسىن ۇستاۋعا نيەت ەتتىم».
اۋىزاشار دۇعاسى: «جاراتقان يەم! سەنىڭ رازىلىعىڭ ءۇشىن ورازا ۇستادىم، ساعان يمان كەلتىردىم، ساعان تاۋەكەل ەتتىم، سەن بەرگەن ريزىق-نەسىبەڭمەن اۋىز اشتىم. ۋا، كەشىرىمدى اللا! مەنىڭ الدىڭعى جانە سوڭعى كۇنا-كەمشىلىكتەرىمدى كەشىرە گور!»
جاماعات نازارىنا قازاقستان مۇسىلماندارى ءدىني باسقارماسىنىڭ مالىمەتتەرى نەگىزىندە ورازا ايىندا ءمان بەرەر مالىمەتتەردى ۇسىنامىز:
- پiتiر-ساداقانى رامازان ايىنىڭ باسىنان ايت نامازىنا دەيiن بەرۋگە بولادى. ەلىمىز بويىنشا ءار ادامعا 370 تەڭگە.
- ءپىتىر-ساداقادان تۇسكەن قاراجات ەسەبىنەن مۇگەدەكتەر مەن قارتتارعا، جەسىر ايەلدەر مەن جەتىمدەرگە، الەۋمەتتىك تۇرمىسى تومەن وتباسىلارعا قايىرىمدىلىق كومەك كورسەتىلەدى.
- جۇكتى، ومىراۋدا بالاسى بار ايەلدەرگە، جولاۋشىلارعا، ناۋقاس جاندارعا ورازا ۇستاۋ - پارىز ەمەس.
- ساپاردا جۇرگەندەرگە ورازا ۇستاماۋعا بولادى. ءبىراق باسقا كۇندەردە سانىن تولتىرىپ، اۋىز بەكىتەدى. ەگەر ساپار قيىندىق تۋعىزباسا، ابزالى - اۋىز بەكىتۋ.
