ساۋدا جانە ينتەگراسيا ۆيسە-مينيسترى قايرات تورەبايەۆ جامبىل وبلىسىنىڭ قورداي اۋدانىندا قۇرىلىسى جوسپارلانعان قويما كەشەنىنە قاتىستى تۇسىنىك بەردى. بۇل تۋرالى Kazinform حابارلايدى.

«كەشەن بىرنەشە وندىرىستىك، ساۋدا جانە لوگيستيكالىق الاڭداردان تۇرادى. بۇل نىساننىڭ جامبىل وبلىسىنىڭ قورداي اۋدانىندا ورنالاسۋى شيكىزاتتىڭ ايتارلىقتاي كولەمىنە جانە دامىعان ينفراقۇرىلىمعا بايلانىستى ناقتىلاندى. ءسۇت، ەت، كوكونىس، توقىما جانە فارماسيەۆتيكالىق ونىمدەر ءوندىرىسى بويىنشا كووپەراسيا جوبالارىن ىسكە اسىرۋ ءۇشىن جاعداي جاسالادى. سونداي-اق قۇرىلاتىن كەشەن قىرعىز رەسپۋبليكاسىمەن ساۋدا-لوگيستيكالىق ينفراقۇرىلىمدى دامىتۋعا باعىتتالعان»، — دەدى ق. تورەبايەۆ پارلامەنت ماجىلىسىندە وتكەن باسپا ءسوز ءماسليحاتىندا.

ونىڭ ايتۋىنشا، جوبا تولىعىمەن بيۋدجەتتەن تىس قاراجات ەسەبىنەن جۇزەگە اسىرىلادى.

«2024 جىلدىڭ 28 ناۋرىزىندا جامبىل وبلىسىنىڭ اكىمدىگى كەشەندى باسقاراتىن ينۆەستوردى تاڭداۋعا كونكۋرس جاريالادى. ءساۋىردىڭ 19-ى كۇنى قايتالاما كونكۋرس جاريالاندى، ءبىراق ءالى كۇنگە دەيىن ينۆەستور انىقتالمادى. سوندىقتان تاعى دا ىرىكتەۋ وتكىزىلەدى. ينۆەستورعا كەشەننىڭ قۇرىلىسىمەن قاتار، ينجەنەرلىك ينفراقۇرىلىممەن قامتاماسىز ەتۋ بويىنشا شارتتار بەلگىلەندى»، — دەدى ۆيسە-مينيستر.

ايتا كەتسەك، بۇگىن ءماجىلىستىڭ جالپى وتىرىسىندا «قازاقستان ۇكىمەتى مەن قىرعىزستان مينيسترلەر كابينەتى اراسىنداعى «قاراسۋ» مەن «اق-تىلەك» اۆتوجول وتكىزۋ پۋنكتتەرى اۋدانىنداعى يندۋستريالىق ساۋدا-لوگيستيكالىق كەشەننىڭ قىزمەتىن قۇرۋ جانە رەتتەۋ تۋرالى كەلىسىمدى راتيفيكاسيالاۋ تۋرالى» زاڭى قابىلداندى.