مەملەكەت باسشىسى قاسىم-جومارت توقايەۆ پەن وزبەكستان پرەزيدەنتى شاۆكات ميرزيويەۆ بەيرەسمي كەزدەسۋ وتكىزدى، دەپ حابارلايدى اقوردا.

قاسىم-جومارت توقايەۆ پەن شاۆكات ميرزيويەۆ قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىقتى ودان ءارى نىعايتۋ ماسەلەلەرىن تالقىلادى.

قازاقستان پرەزيدەنتى يسلام وركەنيەتى مەن ساۋلەت ونەرىنىڭ جاۋھارى سانالاتىن حيۋا قالاسىندا ءوتىپ جاتقان كەزدەسۋدىڭ سيمۆولدىق ءمانى بار ەكەنىنە نازار اۋدارىپ، بارلىق باعىت بويىنشا تابىستى دامىپ كەلە جاتقان ەكىجاقتى ىنتىماقتاستىققا كوڭىلى تولاتىنىن مالىمدەدى.

مەملەكەت باسشىسىنىڭ ايتۋىنشا، ەكى ەل ۇكىمەتتەرى قول جەتكىزىلگەن ۋاعدالاستىقتاردى جۇزەگە اسىرۋ ىسىمەن بەلسەندى اينالىسىپ جاتىر. ءتيىستى «جول كارتالارى» جوسپارلى تۇردە ورىندالىپ، قول قويىلعان كەلىسىمدەر مەن ساۋدا كەلىسىمشارتتارى بويىنشا جۇمىس جۇرگىزىلۋدە. ءوزارا تاۋار اينالىمىنىڭ كورسەتكىشتەرى جامان ەمەس. وتكەن جىلدىڭ قورىتىندىسى بويىنشا ونىڭ كولەمى 4،4 ميلليارد دوللاردى قۇرادى. ونەركاسىپ، ەنەرگەتيكا، كولىك جانە لوگيستيكا، اۋىل شارۋاشىلىعى سالالارىندا بىرلەسكەن جوبالار جۇزەگە اسىرىلىپ جاتىر. بۇگىندە پورتفەلىمىزدە ينۆەستيسيا كولەمى 2،5 ميلليارد دوللاردان اساتىن 60 بىرلەسكەن جوبا بار. ونىڭ اياسىندا 13 مىڭنان استام جۇمىس ورنى اشىلادى. حالىقارالىق ونەركاسىپ كووپەراسياسى ورتالىعىن سالۋ جوباسى دا ءساتتى ىلگەرىلەپ كەلەدى.

پرەزيدەنت قازاق-وزبەك تاندەمى ومىرلىك قاجەتتىلىكتەن تۋعانىن جانە بىرگە ءارى جۇمىلا ارەكەت ەتكەندە عانا ەلدەرىمىزدىڭ ورنىقتى دامۋىن قامتاماسىز ەتۋگە بولاتىنىن ايتتى. وسى ورايدا مەملەكەت باسشىسى قازاقستان مەن وزبەكستان اراسىنداعى ستراتەگيالىق سەرىكتەستىك پەن وداقتاستىقتىڭ 2034 جىلعا دەيىنگى باعدارلاماسىن قابىلداۋ باستاماسىن قولدادى.

كەزدەسۋدە پرەزيدەنتتەر ءوزارا تاۋار اينالىمىن ۇلعايتۋ، ەنەرگەتيكا، كولىك، سۋ شارۋاشىلىعى، IT سالالارىنداعى ىنتىماقتاستىقتى دامىتۋ سياقتى ەكونوميكالىق ىقپالداستىقتىڭ سان الۋان ماسەلەسى جونىندە پىكىر الماستى.

اڭگىمەلەسۋ بارىسىندا مادەني-گۋمانيتارلىق بايلانىستاردى وركەندەتۋ، سونداي-اق قازاقستان مەن وزبەكستاننىڭ بىرەگەي تۋريستىك الەۋەتىن پايدالانۋ مۇمكىندىكتەرىنە ايرىقشا ءمان بەرىلدى.

سونىمەن قاتار قاسىم-جومارت توقايەۆ پەن شاۆكات ميرزيويەۆ وڭىرلىك كۇن ءتارتىبىن تالقىلاپ، حالىقارالىق قۇرىلىمدار اياسىنداعى ءوزارا ىقپالداستىق ماسەلەلەرىن قاراستىردى.

كەلىسسوز بارىسىندا مەملەكەتتەر باسشىلارى ورتالىق ازياداعى تۇراقتىلىق پەن قاۋىپسىزدىكتى ساقتاۋ ماسەلەسىنە ەرەكشە نازار اۋداردى. وسى رەتتە ورتالىق ازيا مەملەكەتتەرى باسشىلارىنىڭ كەزەكتى التىنشى كونسۋلتاتيۆتىك كەزدەسۋىنە دايىندىق بارىسى، سونداي-اق س5+ فورماتىنداعى ىقپالداستىق پەرسپەكتيۆالارى تالقىلاندى.

ەكى ەل باسشىلارى وڭىردەگى ءوزارا ىنتىماقتاستىقتى نىعايتۋ ءۇشىن قازاقستان مەن وزبەكستاننىڭ تەمىرجول اكىمشىلىكتەرى اراسىندا بىرلەسكەن كاسىپورىن قۇرۋ تۋرالى باستاماعا قولداۋ ءبىلدىردى. بۇل بىرلەسكەن كاسىپورىندى قۇرۋداعى ماقسات – جۇڭگو – قازاقستان – وزبەكستان باعىتىنداعى جۇك تاسىمالىن ۇيىمداستىرۋ ءۇشىن قازاق-قىتاي شەكاراسىنداعى جانە وزبەكستانداعى جۇك تەرمينالدارىن ءوزارا ءتيىمدى نەگىزدە پايدالانۋ.

اتالعان جوبا ەكىجاقتى ساۋدانى جانداندىرىپ، تاۋار تاسىمالىنىڭ كولەمىن ارتتىرۋعا ىقپال ەتەدى، سونداي-اق وڭتۇستىك باعىتتاعى جۇك تاسىمالىن ۇلعايتۋعا قولايلى جاعداي تۋعىزادى.

بۇدان بولەك، بىرلەسكەن كاسىپورىن ترانساۋعان باعىتىن دامىتۋعا جۇمىلدىرىلادى.