بۇگىن ىشكى ىستەر ءمينيسترى ەرلان تۇرعىمبايەۆ، اقپارات جانە قوعامدىق دامۋ ءمينيسترى داۋرەن ابايەۆ پەن باس پروكۋروردىڭ ورىنباسارى بولات دەمبايەۆ جامبىل وبلىسى قورداي اۋدانىندا بولعان جانجالعا قاتىستى ارناي باسپا ءسوز ءماسليحاتىن وتكىزدى.
ىشكى ىستەر ءمينيسترى ەرلان تۇرعىمبايەۆتىڭ ايتۋىنشا، وقيعانىڭ وتى كەشە كەشكە تۇتانعان. كەشكى ساعات جەتىدە جامبىل وبلىسى پوليسيا دەپارتامەنتىنىڭ كەزەكشى بولىمىنە «قورداي اۋدانى ماسانشى اۋىلىندا 70-تەن استام ادام توبەلەسىپ جاتىر» دەگەن حابارلاما تۇسكەن. زاڭسىز ارەكەتتەردى توقتاتۋ ءۇشىن وقيعا ورنىنا بىردەن پوليسيا قىزمەتكەرلەرى جونەلتىلەدى. الايدا، وقيعا ورنىندا جۇرگەندەر توبەلەستى ۆيدەوعا ءتۇسىرىپ، الەۋمەتتىك جەلىلەرگە تاراتقان. ونى كورىپ، باسقا اۋىلداردان كەلگەن 300-دەن استام ازامات كلەپى، توبەلەس ۇلعايعان. ەكى جاق ءبىر-بىرىن تاياقپەن ۇرىپ، تاس لاقتىرىپ، ءتىپتى قارۋ قولداندى. اياۋسىزدىقپەن جالعاسقان توبەلەس سوڭىندا 8 ادام كوز جۇمىپ، 40-تان استام ادام جاراقات العان. جانجال بارىسىندا الدىن الا مالىمەت بويىنشا 30 جەكەمەنشىك ءۇي، 15 ساۋدا نىسانى ورتەلىپ، 23 كولىك قيراتىلعان. «قازىرگى ۋاقىتتا 47 ادام ۇستالىپ، پوليسيا بولىمىنە جەتكىزىلدى. ولاردان ەكى اڭشى قارۋى تاركىلەندى. ق ر قىلمىستىق كودەكسىنىڭ 272-بابى (جاپپاي تارتىپسىزدىكتى ۇيىمداستىرۋ جانە سوعان قاتىسۋ) جانە 99-بابى (ادام ءولتىرۋ) بويىنشا سوتقا دەيىنگى تەرگەۋ امالدارى جۇرگىزىلىپ جاتىر. قوعامدىق ءتارتىپتى بۇزعانداردىڭ ءبارى دە زاڭعا سايكەس جاۋاپكەرشىلىككە تارتىلادى. جاعدايدى تۇراقتاندىرۋ ءۇشىن وقيعا ورنىنا ىشكى ىستەر ورگاندارىنىڭ قوسىمشا كۇشتەرى جىبەرىلدى. قوعامدىق ءتارتىپتى قاداعالاۋ ماقساتىندا وقيعا ورنىندا قازىرگى ۋاقىتتا پوليسيا قىزمەتكەرلەرى مەن ۇلتتىق ۇلان ساربازدارى جۇمىلدىرىلدى. سونىمەن قاتار، ىشكى ىستەر ءمينيسترىنىڭ ورىنباسارى مەن باس پروكۋروردىڭ ورىنباسارى سول جەرگە باردى. جەدەل تەرگەۋ توبى قۇرىلىپ، ادام ءولىمى، بۇزاقىلىق فاكتىلەرى بويىنشا بىرنەشە قىلمىستىق ءىس قوزعالدى. قازىرگى كۇنى جاعداي تۇراقتى»، - دەدى ەرلان تۇرعىمبايەۆ.
ال ءوز كەزەگىندە اقپارات جانە قوعامدىق دامۋ ءمينيسترى داۋرەن ابايەۆ «جۋرناليستەردى قورداي اۋدانىندا بولعان قايعىلى جاعداي جونىندە اقپارات بەرگەندە وبەكتيۆتى بولۋعا شاقىرامىن. ازاماتتاردى الاڭداتاتىن، ەلدى شۋلاتاتىن مالىمەت بەرمەۋدى سۇرايمىن. بايقاساڭىزدار، مىنا جانجال ەڭ باسىندا تەك ءبىر اۋىل دەڭگەيىندە بولعان. الايدا ۋاتساپ، تەلەگرام سەكىلدى مەسسەندجەرلەر ماسەلەنى قوزدىرعان، جاعدايدى ۋشىقتىرعان. ناتيجەسىن كورىپ وتىرسىزدار. بىرنەشە ادام قازا تاۋىپ، جاراقات الدى. ءاربىر تاراتقان اقپاراتقا جاۋاپ بارىن ۇمىتپاۋلارىڭىز كەرەك. بۇل دا ايتىلعان ءسوز سياقتى – قايتارا المايسىز. سوندىقتان اۋديو-ۆيدەونى تاراتقان كەزدە اباي بولىڭىزدار. ءسىز تاراتقان اقپاراتتان كىناسىز بىرەۋدىڭ زارداپ شەكپەۋىن ويلاۋ قاجەت. وسى تۇستا تەك جۋرناليستەرگە عانا ەمەس، ەلىمىزدىڭ ءاربىر ازاماتىنا ەسكەرتكىم كەلەدى. ءبىز «ادامزاتتىڭ ءبارىن ءسۇي، باۋىرىم دەپ» دەگەن ابايدىڭ ەلىمىز عوي، اعايىن. اسىعىس شەشىم قابىلدامايىق. سابىر ساقتايىق. بۇل جانجالدى باستاعاندار ەشقايدا قاشىپ قۇتىلا المايدى. ءقازىر ينتەرنەتكە، بارلىق الەۋمەتتىك جەلىگە، مەسسەندجەرگە مونيتورينگ جاسالۋدا. ول جەردە ۆيدەو-اۋديوحابارلار – بارلىعى قاداعالانادى. ءقازىردىڭ وزىندە بىرنەشە قولدانۋشىلار انىقتالىپ وتىر. ولار ۇلتارالىق ارازدىقتى قوزدىراتىن حابارلار تاراتىپ، دەزينفورماسيا تۋدىرعان. ول مالىمەتتەر قۇقىق قورعاۋ ورگاندارىنا بەرىلەدى. بۇل جانجاندى باستاعاندار دا، وعان قوسا بارلىق پروۆوكاتورلار دا جاۋاپقا تارتىلادى. كوميسسيا ءقازىر قورداي اۋدانىنا بارا جاتىر. بارلىق جاعدايدى كوميسسيا حابارلايدى. ءبىز ءقازىر قحا وكىلدەرىن، جەرگىلىكتى اقساقالداردى، قوعام قايراتكەرلەرىن، يمامداردى تارتا وتىرىپ، حالىقتى سابىرعا شاقىرامىز. ءقازىر ەلدى دۇرلىكتىرەتىندەي نەگىز جوق. جاعداي باقىلاۋدا»، - دەدى داۋرەن اسكەربەك ۇلى. سونىمەن قاتار، بۇگىن الماتىداعى باراحولكا بازارىندا سانيتارلىق كۇن دەپ جاريالانۋىنىڭ اتالعان وقيعامەن بايلانىسى بار، جوعىن سۇراعان جۋرناليستەرگە اقپارات جانە قوعامدىق دامۋ ءمينيسترى "سىزدەر تۇسىنۋلەرىڭىز كەرەك. سەبەبى، سونىڭ ىشىندە باراحولكا بازارىندا قاقتىعىس جاساۋعا ۇندەۋ جاسالعان. وسىعان سايكەس ساقتىق شارالارى كۇشەيتىلدى"، - دەءدى.
ال باس پروكۋروردىڭ ورىنباسارى بولات دەمبايەۆ بولسا، «قوردايداعى وقيعا بويىنشا بىرنەشە قىلمىستىق ءىس قوزعالدى. ۆەدومستۆوارالىق جەدەل تەرگەۋ توبى قۇرىلادى. ءىستىڭ بارىسى باس پروكۋروردىڭ نازارىندا. قىلمىستىق قۋدالاۋ ورگاندارى كىنالىلەردى تاۋىپ، ولاردى جاۋاپكەرشىلىككە تارتۋ ءۇشىن بارلىق شارانى جۇزەگە اسىرادى. زارداپ شەككەندەردە قاجەتتى قۇقىقتىق كومەك بەرىلەدى. قازىرگى ۋاقىتتا قۇقىق قورعاۋ ورگاندارى زاڭدىلىقتى، قوعامدىق قاۋىپسىزدىك پەن قۇقىقتىق ءتارتىپ ساقتاۋ شارالارىن قامتاماسىز ەتىپ وتىر. جەكە ادامدار بولعان وقيعانى بۇرمالاپ، جالعان اقپارات تاراتىپ جاتىر. وسىعان بايلانىستى قوعامدىق ءتارتىپتى ساقتاپ، ەسكەرتۋ ءۇشىن بۇكىل ەلگە - قازاقستاننىڭ كونستيتۋسياسى ۇلتارالىق كەلىسىمدى بۇزارلىق كەز كەلگەن ارەكەتتى تىيىم سالاتىنىن جەتكىزگىمىز كەلەدى. كونستيتۋسيانىڭ اتالعان تالابىن ورىنداماۋدىڭ سالدارى ۇلتارالىق ارازدىقتى تۋعىزۋ، جاپپاي تارتىپسىزدىككە ۇيىمداستىرۋ، جالعان اقپارات تاراتۋ ىستەرى بويىنشا قىلمىستىق جاۋاپكەرشىلىككە اكەپ سوعادى. حالىقتى سابىر ساقتاۋعا، پروۆوكاسياعا بەرىلمەي، شىندىققا ساي كەلمەيتىن اقپاراتتى تاراتپاۋعا شاقىرامىز. تەرگەۋ امالدارىنا قاتىستى بارلىق اقپارات ىشكى ىستەر مينيسترلىگى مەن باس پروكۋراتۋراعا جولدانىپ وتىرادى. وسى ۆەدومستۆولاردىڭ ينتەرنەت-سايتتارىندا جاريالانادى، ال قۇقىق قورعاۋ ورگاندارى كەز كەلگەن ءتارتىپ بۇزۋشىلىقتىڭ جولىن كەسىپ، ولارعا جول بەرمەۋدىڭ بارلىق امالىن قاراستىرادى»، — دەدى.
photo:ortcom.kz
