قازاقستاننىڭ حالىق جازۋشىسى مۇحتار ماعاۋين ومىردەن وزدى. قارالى حاباردى ونىڭ ۇلى ەدىگە ماعاۋين ەستىرتتى، دەپ حابارلايدى Ulys.
«ارىستان اكەم فانيدەن باقيعا اتتانىپ كەتتى، اقش-تىڭ مەريلەند شتاتىنداعى ۇيىندە، بالا-شاعاسىنىڭ ورتاسىندا، 2025 جىلعى قاڭتاردىڭ 9-ى، جەرگىلىكتى ۋاقىت بويىنشا ساعات 19:55-تە (قازاقستان ۋاقىتى بويىنشا قاڭتاردىڭ 10-ى، ساعات تاڭعى 5:55)»،- دەپ جازدى ەدىگە ماعاۋين.
ۇلى جازۋشى اقش-تا جەرلەنەدى.
«اقش-تا جۇرگەندەر بولسا، راسىمدەرى وسىنداي، قاڭتاردىڭ 9-ى بەيسەنبى اقشامدا دۇنيە سالعان مۇحتار ءماعاۋيننىڭ جانازاسى ەرتەڭ، ياعني قاڭتاردىڭ 11ء-ى سەنبى كۇنى ساعات 10:00-دە تۇرىكتىڭ Diyanet Center of America مەشىتىندە وقىلادى. قوناقاسى دا سول ورىندا 13:00-دە بەرىلەدى. جەرلەۋ ءراسىمى 11:00-دە Parklawn Memorial زيراتىندا وتەدى»، - دەپ جازدى IT مامان تيمۋر بەكتۇر جەلىدەگى پاراقشاسىندا.
مۇحتار مۇقان ۇلى ماعاۋين 1940 جىلى 2 اقپاندا سەمەي وبلىسىنىڭ شۇبارتاۋ اۋدانىندا تۋعان. 1962 جىلى قازاق مەملەكەتتىك ۋنيۆەرسيتەتىنىڭ فيلولوگيا فاكۋلتەتىن، 1965 جىلى اسپيرانتۋراسىن بىتىرگەن.
ەڭبەك جولى 1965 جىلدان باستالادى. «قازاق ادەبيەتى» گازەتىندە ءبولىم مەڭگەرۋشىسى، 1967 – 71 جج. «جازۋشى» باسپاسىندا باس رەداكتوردىڭ ورىنباسارى، قازاق كسر عىلىم اكادەمياسىنىڭ م.اۋەزوۆ اتىنداعى ادەبيەت جانە ونەر ينستيتۋتىندا اعا عىلىمي قىزمەتكەر بولىپ، سونىمەن قاتار ماسكەۋدە م.گوركيي اتىنداعى ادەبيەت ينستيتۋتىندا قازاق فولكلورى مەن قازاق ادەبيەتى تاريحى بويىنشا ارنايى لەكسيالىق كۋرستار جۇرگىزدى. 1983 – 84 جج. ەركىن شىعارماشىلىق جۇمىستا، 1984 – 86 جج. «جازۋشى» باسپاسىنىڭ باس رەداكتورى، 1987 جىلى ەركىن شىعارماشىلىق جۇمىس- تا، 1988 – 2006 جج. «جۇلدىز» جۋرنالىنىڭ باس رەداكتورى بولدى.
