ەلوردادا بولىپ وتكەن «رۋحاني جىبەك جولى. يسلام جانە جاستار: قازىرگى زامان سىن-قاتەرلەرى» اتتى IV حالىقارالىق ءعىلىمي-دىني كونفەرەنسيادا بايانداما جاساعان باس ءمۇفتي سەرىكباي قاجى وراز جىبەك جولى ەلدەرىنىڭ رۋحاني كارتاسىن جاساۋدى ۇسىندى. بۇل تۋرالى قمدب باسپا ءسوز قىزمەتى حابارلادى.
«وتكەنسىز بولاشاق جوق. ءبىز وتكەننەن ونەگە العان حالىقپىز. وسى رەتتە ارىپتەستەرىمە ۇلى جىبەك جولى ەلدەرىنىڭ «رۋحاني كارتاسىن» جاساۋدى ۇسىنامىن. رۋحاني كارتا وسكەلەڭ ۇرپاقتىڭ تاريح پەن رۋحانيات سالاسىنا قاتىستى سۇراقتارىنا جاۋاپ بەرەتىن بەينەبىر باعدارشام، شامشىراق بولۋى ءتيىس. تاريحىنان تاعىلىم العان، ال تاريحي تۇلعالاردان ءتالىم كورگەن ۇرپاق ءدىنى مەن ءداستۇرىن ۇيلەستىرىپ، ونەگەلى ءومىر ساباقتاستىعىن قالىپتاستىرماق. بۇل باستاما تاريحشى عالىمدار مەن ءدىن عۇلامالارىنىڭ جىبەك جولى تاريحىن عيبراتتىڭ كوزىمەن قايتا زەرتتەۋىن قاجەت ەتەدى»، – دەپ اتاپ ءوتتى ءوز بايانداماسىندا سەرىكباي قاجى ساتىبالدى ۇلى.
«رۋحاني جىبەك جولى. يسلام جانە جاستار: قازىرگى زامان سىن-قاتەرلەرى» اتتى IV حالىقارالىق ءعىلىمي-دىني كونفەرەنسيا قازاقستان جانە رەسەي مۇسىلماندارى ءدىني باسقارمالارىنىڭ ۇيىمداستىرۋىمەن ءوتتى.
ايتا كەتەيىك، كونفەرەنسيا جۇمىسىنا ق ر اقپارات جانە قوعامدىق دامۋ ءمينيسترى داۋرەن ابايەۆ، باس ءمۇفتي سەرىكباي قاجى وراز، رەسەي مۇسىلماندارى ءدىني باسقارماسى جانە رەسەي مۇفتيلەر كەڭەسىنىڭ ءتوراعاسى، ءمۇفتي، شەيح راۆيل گاينۋتدين، وزبەكستان ءمۇفتيى ۋسمونحون اليموۆ، جۇڭگو يسلام قاۋىمداستىعىنىڭ ءتوراعاسى حاسان فا مين، قىرعىزستان ءمۇفتيى ماقساتبەك قاجى توقتومۋشيەۆ، موڭعوليا ءمۇفتيى باتىربەك حادىس، فينلياندياداعى يسلام ورتالىعىنىڭ ءتوراعاسى گولتەن بەدرەتدين، ت.ب. ءدىن قايراتكەرلەرى، ءدىني سالاداعى مەملەكەتتىك ورگاننىڭ باسشىلارى، زيالى قاۋىم وكىلدەرى، جالپى سانى 300 دەلەگات قاتىستى.
كونفەرەنسياعا قاتىسقان ق ر اقپارات جانە قوعامدىق دامۋ ءمينيسترى داۋرەن ابايەۆ جاستاردىڭ ساناسىنا جات اعىمدارعا قارسى مىقتى يممۋنيتەت قالىپتاستىرۋ ماڭىزدى ەكەنىن اتاپ ءوتتى.
«راديكاليزمگە ادامدار قانداي سەبەپ بويىنشا بۇرىلىپ كەتەتىنىن انىقتاۋ قاجەت. وعان جەكەلەگەن ادامداردى گۋمانيستىك، ينتەللەكتۋالدىق، مادەني جاعدايلار دا يتەرمەلەۋى مۇمكىن. سوندىقتان دا زاماناۋي زايىرلى مەملەكەتتىڭ ءدىن وكىلدەرى ايماقتارداعى داستۇرگە ءمان بەرىپ، مادەني باعىتتاعى، عىلىم مەن ءبىلىم سالاسىنداعى ارتىقشىلىقتاردى ەسكەرۋى ءتيىس دەپ ويلايمىن.
ءبىز جاس ۇرپاقتىڭ دۇنيەتانىمىن دۇرىس قالىپتاستىرۋىمىز كەرەك. قازىرگى جاستار ءوز پىكىرلەرىن اشىق ايتا الادى. ولار باسەكەگە قابىلەتتى، بىلىمگە قۇشتار. ەڭ باستىسى ولاردىڭ ساناسىنا جات اعىمدارعا قارسى مىقتى يممۋنيتەت قالىپتاستىرۋ ماڭىزدى»، – دەدى داۋرەن اسكەربەك ۇلى.
2019 – جاستار جىلى اياسىندا وتكىزىلگەن كونفەرەنسيا ماقساتى – وسكەلەڭ ۇرپاقتى دەسترۋكتيۆتى اعىمنىڭ ىقپالىنان ساقتاندىرۋ، ولارعا دۇرىس ءدىني اقپارات جەتكىزۋ، ءدىني ەكسترەميزم مەن تەرروريزمدى الدىن الۋ ماقساتىندا ەۋرازيا جانە ورتالىق ازيا ەلدەرى ءدىن قايراتكەرلەرىنىڭ كۇشىن بىرىكتىرۋ، تاجىريبە الماسۋ، «رۋحاني جاڭعىرۋ» يدەياسىن ناسيحاتتاۋ، جاھاندىق ءدىني ماسەلەلەردى شەشۋدە جاڭا ادىس-تاسىلدەردى ۇسىنۋ، ۇلتارالىق، كونفەسسياارالىق ديالوگتى نىعايتۋ، ت.ب.
كونفەرەنسيا سوڭىندا قاتىسۋشىلار ارنايى قارار قابىلدادى.
سۋرەتتەر www.muftyat.kz سايتىنان الىندى.
