بۇگىن اقوردادا وتكەن سالتاناتتى ماراپاتتاۋ ءراسىمى كەزىندە قاسىم-جومارت توقايەۆ كييەۆتە قازاقستان جۋرناليسىنە جاسالعان قاستاندىق ارەكەتكە پىكىر ءبىلدىردى، دەپ حاابارلايدى اقوردا.
— ەلىمىزدە زاڭ ۇستەمدىگىن نىعايتىپ جاتىرمىز، ياعني بارلىق سالادا، ەڭ الدىمەن، زاڭ ۇستەمدىگىن قامتاماسىز ەتۋ — باستى مىندەت. بۇل ماسەلە بويىنشا مەنىڭ كوزقاراسىم — ايقىن. مۇنى وزدەرىڭىز دە جاقسى بىلەسىزدەر. قازاقستاندا زاڭ مەن ءتارتىپ بارىنەن بيىك تۇرۋعا ءتيىس. سوندىقتان قوعامداعى بارلىق قاراما-قايشىلىقتار مەن كەلىسپەۋشىلىكتەردى تەك قانا قۇقىقتىق تۇرعىدان، ياعني ءتيىستى زاڭناماعا جانە نەگىزگى حالىقارالىق نورمالارعا سايكەس شەشۋ قاجەت. كەشە قازاقستان ازاماتى ايدوس سادىقوۆقا قاتىستى كييەۆتە بولعان قىلمىسقا دا ءدال وسى ۇستانىم تۇرعىسىنان قاراعان ءجون. مەن ديپلوماتيالىق ارنالار مەن قۇقىق قورعاۋ ورگاندارى ارقىلى وسى وقىس وقيعا بويىنشا ۋكراينا تاراپىنا رەسمي سۇراتۋ جىبەرۋ تۋرالى ناقتى تاپسىرما بەردىم. سونداي-اق قاجەت بولعان جاعدايدا قازاقستاننىڭ رەسمي ورگاندارى ءىستىڭ اقيقاتىنا جەتۋگە جاردەم بەرۋ ءۇشىن تەرگەۋ جۇمىسىنا قاتىسۋعا دايىن ەكەنىن ايتقىم كەلەدى، — دەدى پرەزيدەنت.
ايتا كەتەيىك، كەشە ۋكراينانىڭ كييەۆ قالاسىندا سول ەلدە بوسقىن ەسەبىندە تۇرىپ جاتقان جۋرناليست ايدوس سادىقوۆتى الدەبىرەۋلەر كولىگىندە اتىپ كەتكەن بولاتىن. ونىڭ جاعدايى اۋىر دەپ باعالانۋدا.
