تۋريزم جانە سپورت مينيسترلىگى كاسىبي سپورتتى قارجىلاندىرۋ جانە سپورت رەزەرۆىن دايارلاۋ جونىندەگى زاڭ جوباسىن ازىرلەدى. بۇل تۋرالى اتالعان مينيسترلىكتىڭ باسپا ءسوز قىزمەتى حابارلادى.
تۋريزم جانە سپورت مينيسترلىگى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت، سونداي-اق نورمالاردىڭ ارتىق (شامادان تىس) زاڭنامالىق رەگلامەنتتەلۋىن بولعىزباۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن ازىرلەدى.
قۇجاتتا سپورت رەزەرۆىن دايارلاۋ ماسەلەلەرىنە ايتارلىقتاي وزگەرىستەر ەنگىزىلەدى. زاڭ جوباسىنا سايكەس، سپورت رەزەرۆى تەك جوعارى جەتىستىكتەر سپورتىنىڭ تۇرلەرى بويىنشا دايارلاناتىن بولادى. سپورتشىلاردى دايارلاۋ ۋاكىلەتتى ورگان بەكىتەتىن سپورتتىق دايارلىقتىڭ ۇلتتىق ستاندارتتارىنا سايكەس قاتاڭ تۇردە جۇرگىزىلەدى. بۇل شارا قازاقستاننىڭ ۇلتتىق قۇراماسىنىڭ الەۋەتىن ارتتىرۋ جانە سپورت سالاسىنداعى جۇيەلى دامۋ ءۇشىن نەگىز بولماق.
سونىمەن قاتار، كاسىبي سپورتتى مەملەكەتتىك بيۋدجەت قاراجاتى ەسەبىنەن قارجىلاندىرۋعا قاتىستى جاڭا ەرەجەلەر ۇسىنىلادى. زاڭ جوباسى بويىنشا، كاسىبي كلۋبتاردى ۇستاۋعا مەملەكەت تاراپىنان قارجىلاندىرۋ ليميتتەرى بەلگىلەنەتىن بولادى. بۇل شارا بيۋدجەتتىك شىعىستاردىڭ تيىمدىلىگىن ارتتىرىپ، سپورتتى دامىتۋعا بولىنگەن قاراجاتتىڭ دۇرىس پايدالانىلۋىن قامتاماسىز ەتەدى.
زاڭ جوباسىندا تاعى دا ءبىر ماڭىزدى وزگەرىس بار: قازاقستان رەسپۋبليكاسىنىڭ ازاماتتارى بولىپ سانالمايتىن سپورتشىلاردى مەملەكەتتىك بيۋدجەت جانە كۆازيمەملەكەتتىك سەكتور سۋبەكتىلەرىنىڭ قاراجاتى ەسەبىنەن قارجىلاندىرۋعا تىيىم سالۋ. بۇل شارا ەل ازاماتتارىنىڭ سپورتتا دا، قارجىلىق قولداۋدا دا باسىمدىققا يە بولۋىن قامتاماسىز ەتەدى.
«بۇل وزگەرىستەر سپورتتىق سالاداعى باسقارۋدى وڭتايلاندىرىپ، قارجىلىق رەسۋرستاردى ءتيىمدى پايدالانۋعا مۇمكىندىك بەرەدى. ءبىز جوعارى جەتىستىكتەر سپورتىنا ەرەكشە كوڭىل ءبولىپ، كاسىبي سپورتتىڭ قارجىلاندىرۋ جۇيەسىن تۇراقتى ءارى ءادىل ەتۋدى ماقسات ەتىپ وتىرمىز»، – دەپ اتاپ ءوتتى تۋريزم جانە سپورت ءمينيسترى ەربول مىرزابوسىنوۆ.
زاڭ جوباسىنىڭ قابىلدانۋى ەلىمىزدەگى سپورتتىق جۇيەنى جەتىلدىرۋگە، مەملەكەتتىك قاراجاتتىڭ ءتيىمدى پايدالانىلۋىنا جانە سپورتتىڭ كاسىبي دەڭگەيدە دامۋىنا سەرپىن بەرەدى.
