سينگاپۋرعا مەملەكەتتىك ساپارمەن كەلگەن قاسىم-جومارت توقايەۆتى «Istاna» سارايىندا پرەزيدەنت تارمان شانمۋگاراتنام كۇتىپ الدى.
كەلىسسوزدەردىڭ الدىندا رەسمي قارسى الۋ ءراسىمى ءوتتى. قازاقستان مەن سينگاپۋردىڭ مەملەكەتتىك ءانۇراندارى شىرقالىپ، قۇرمەت قاراۋىلى روتاسىنىڭ باستىعى ەكى ەل باسشىلارىنا راپورت بەردى. سودان كەيىن قاسىم-جومارت توقايەۆ پەن تارمان شانمۋگاراتنام بىر-بىرىنە رەسمي دەلەگاسيا مۇشەلەرىن تانىستىردى. مەملەكەت باسشىسى پرەزيدەنت سارايىنداعى قۇرمەتتى قوناقتار كىتابىنا ەستەلىك جازبا قالدىردى.
قاسىم-جومارت توقايەۆ قازاق دەلەگاسياسىنا سىي-قۇرمەت كورسەتكەنى ءۇشىن العىس ايتىپ، بۇل 20 جىلدان استام ۋاقىت ىشىندە قازاقستان پرەزيدەنتىنىڭ سينگاپۋرعا جاساعان ءبىرىنشى ساپارى ەكەنىن اتاپ ءوتتى. سونداي-اق 1970-جىلدارى كەڭەس وداعىنىڭ ديپلوماتى رەتىندە قىزمەت ەتكەندىكتەن، بۇل ەلدى وتە جاقسى بىلەتىنىن جانە اراعا ۋاقىت سالىپ مۇندا قازاقستان پرەزيدەنتى رەتىندە قايتا كەلگەنىنە قۋانىشتى ەكەنىن جەتكىزدى.
مەملەكەت باسشىسى سينگاپۋردى ۋاقىت سىنىنان وتكەن سەنىمدى سەرىكتەس سانايدى. بۇگىندە قازاقستاندا 140-تان استام سينگاپۋرلىق كومپانيا مەن بىرلەسكەن كاسىپورىن جۇمىس ىستەيدى. بۇل رەتتە سينگاپۋردىڭ قازاقستان ەكونوميكاسىنا سالعان ينۆەستيسياسى 1،7 ميلليارد دوللاردان استى. پاندەميا سالدارىنان تۋىنداعان ەكونوميكالىق قيىندىقتارعا قاراماستان، ەكىجاقتى ساۋدا كولەمى كوپ ۇزاماي 2 ميلليارد دوللاردان اسادى.
قازاقستان پرەزيدەنتىنىڭ ايتۋىنشا، ەلىمىز سەنىمدى ساياسي ديالوگقا، قارقىندى دامىپ كەلە جاتقان ساۋدا جانە ينۆەستيسيالىق بايلانىستارعا باعىتتالعان ەكىجاقتى ىنتىماقتاستىقتىڭ مۇلدە جاڭا كەزەڭىنە جول اشۋعا نيەتتى.
ءوز كەزەگىندە پرەزيدەنت تارمان شانمۋگاراتنام ەكى ەل اراسىنداعى قارىم-قاتىناستىڭ دامۋ ديناميكاسىنا جوعارى باعا بەردى.
كەزدەسۋ بارىسىندا مەملەكەتتەر باسشىلارى ساۋدا-ەكونوميكالىق، ينۆەستيسيالىق جانە مادەني-گۋمانيتارلىق سالالارداعى ىنتىماقتاستىقتى دامىتۋ پەرسپەكتيۆالارىن ەگجەي-تەگجەيلى تالقىلادى. مەملەكەت باسشىسى قازاقستاننىڭ سينگاپۋرمەن ەنەرگەتيكا، اسا ماڭىزدى شيكىزاتتى وڭدەۋ، ينفراقۇرىلىمدى دامىتۋ، سيفرلىق ەكونوميكا، قارجى تەحنولوگياسى، اگروتەحنولوگيا، لوگيستيكا جانە بايلانىس سەكىلدى نەگىزگى سالالار بويىنشا ىنتىماقتاستىقتى كەڭەيتۋگە مۇددەلى ەكەنىن مالىمدەدى.
پرەزيدەنتتەر ءوزارا ءتيىمدى ينۆەستيسيالىق جوبالاردى ىلگەرىلەتۋ، سونىڭ ىشىندە ەكىجاقتى قاتىناستاردىڭ قۇقىقتىق بازاسىن نىعايتۋ ارقىلى كۇش-جىگەر بىرىكتىرۋگە ۋاعدالاستى.
بۇدان بولەك، تاراپتار ءبىلىم بەرۋ جانە ادام كاپيتالىن دامىتۋ باعىتتارىنداعى ىنتىماقتاستى جانداندىرۋ قاجەت دەپ سانايدى.
