پرەمەر-مينيستر ولجاس بەكتەنوۆتىڭ توراعالىعىمەن وتكەن ۇكىمەت وتىرىسىندا اۆتوجول سالاسىن دامىتۋ ماسەلەلەرى قارالدى. كولىك ءمينيسترى مارات قارابايەۆ، «قازجولعزي» جول اكتيۆتەرىنىڭ ساپاسى ۇلتتىق ورتالىعىنىڭ باسشىلىعى جانە ءبىرقاتار وبلىس اكىمدەرى اعىمداعى جاعداي مەن اتقارىلىپ جاتقان جۇمىستار تۋرالى باياندادى. بۇل تۋرالى ۇكىمەتتىڭ باسپا ءسوز قىزمەتى حابارلادى.
مەملەكەت باسشىسىنىڭ 2025 جىلدىڭ سوڭىنا قاراي رەسپۋبليكالىق جولداردىڭ بارلىعىن نورماتيۆتىك جاعدايعا كەلتىرۋ جونىندەگى تاپسىرماسىن ورىنداۋ شەڭبەرىندە بۇگىندە ەلىمىزدە 12 مىڭ شاقىرىم كۇرە جولداردى كۇردەلى جوندەۋ جانە جاڭعىرتۋ جۇمىستارى جۇرۋدە، بۇل – رەكوردتىق جوعارى كورسەتكىش. اتاپ ايتقاندا، جوندەلەتىن جولداردىڭ 8 مىڭ شاقىرىمى – رەسپۋبليكالىق، 4 مىڭ شاقىرىمى – جەرگىلىكتى جەلىگە تيەسىلى كولىك مينيسترلىگىنىڭ دەرەكتەرىنە سايكەس، جىل سوڭىنا دەيىن 7 مىڭ شاقىرىمدا قۇرىلىس جانە جوندەۋ جۇمىستارى اياقتالادى.
جالپى، بۇگىنگى تاڭدا ەلىمىزدەگى اۆتوجولدارىنىڭ جالپى ۇزىندىعى 95 مىڭ شاقىرىمدى قۇرايدى، ونىڭ 25 مىڭ شاقىرىمى – رەسپۋبليكالىق، ال قالعان 70 مىڭ شاقىرىمى جەرگىلىكتى ماڭىزى بار جولدارعا جاتادى. قازىرگى تاڭدا رەسپۋبليكالىق جولداردىڭ نورماتيۆتىك جاعدايى 92%-دى، جەرگىلىكتى جەلىنىڭ كورسەتكىشى 87%-دى قۇراپ وتىر. جىل سوڭىنا دەيىن اتالعان كورسەتكىشتەر تيىسىنشە 93% جانە 89%-عا جەتكىزىلەتىن بولادى.
ۇكىمەت باسشىسى بيىل «قاراعاندى – الماتى»، «اقتوبە – قاندىاعاش»، «اتىراۋ – استراحان» جانە «تالدىقورعان – وسكەمەن» سياقتى ءبىرقاتار ءىرى جوبالار اياقتالاتىنىن اتاپ ءوتتى. سونداي-اق شامامەن 2،5 مىڭ شاقىرىم رەسپۋبليكالىق جولداردا جوندەۋ جۇمىستارى قولعا الىندى.
پرەمەر-مينيستر قارجىلاندىرۋ ماسەلەسىنە توقتالدى. وسىلايشا، جەكەلەگەن وڭىرلەردە جالپى سيپاتتاعى ترانسفەرتتەردى يگەرۋ قارقىنى تومەن. مىسالى، مۇنداي ماسەلەلەر اقتوبە، تۇركىستان جانە ۇلىتاۋ وبلىستارىندا بار.
تاعى ءبىر ماسەلە – جوبالاردى ىسكە اسىرۋ مەرزىمدەرىنىڭ مۇلتىكسىز ساقتالۋى. بۇل اسىرەسە، سولتۇستىك جانە شىعىس وڭىرلەر ءۇشىن ماڭىزدى. ويتكەنى، ولاردا قۇرىلىس ماۋسىمى قىسقا. سوندىقتان قارقىندى تومەندەتپەۋ ءۇشىن قاجەتتى شارالاردىڭ بارلىعىن دەر كەزىندە قابىلداۋ تاپسىرىلدى.
ۇكىمەت وتىرىسىندا ولجاس بەكتەنوۆ جولداردىڭ جاعدايىنا قاتىستى ايتىلىپ جاتقان ارىز-شاعىمدار ازايماي وتىرعانىن، ولاردىڭ نەگىزگى بولىگى جەرگىلىكتى جولدارعا قاتىستى ەكەنىن اتاپ ءوتتى.
«اقتوبە وبلىسى مۇعالجار اۋدانىنىڭ تۇرعىندارى جۇرىن مەن قاراكول اۋىلدارىنىڭ اراسىندا بيىل توسەلگەن اسفالتتىڭ ساپاسىن كورسەتتى – جاڭادان توسەلگەن اسفالت قولمەن ۇگىتىلىپ جاتىر. ال جەتىسۋ وبلىسى كەربۇلاق اۋدانى قويانكوز اۋىلىنىڭ تۇرعىندارى اسفالت توسەۋ تەحنولوگياسىن ساقتاماعان مەردىگەر كومپانيانى ءوز جۇمىسىن توقتاتۋعا ءماجبۇر ەتتى. اكىمدىكتەر قايدا، نەلىكتەن كۇندەلىكتى ساپالى باقىلاۋ جۇرگىزىلمەي جاتىر؟ ءبىرىنشى كەزەكتە تۇرعىنداردىڭ شاعىمدارىنا دەر كەزىندە نازار اۋدارۋ كەرەك»، — دەپ اتاپ ءوتتى ولجاس بەكتەنوۆ.
كولىك مينيسترلىگى وبلىستار اكىمدىكتەرىمەن بىرلەسىپ، قولدانىستاعى جول-قۇرىلىسى جوبالارىنىڭ ۋاقتىلى اياقتالۋىن قامتاماسىز ەتۋى كەرەك. سونداي-اق مىنا ماسەلەلەردى اتاپ وتكىم كەلەدى. ول ءۇشىن جەر ۋچاسكەلەرىن الدىن الا رەزەرۆكە قويۋ تاپسىرىلدى.
بۇگىنگى تاڭدا جاڭا اۆتوجول جوبالارىن باستاۋ ءۇشىن 550 ۋچاسكەنى الۋ قاجەت. ولاردىڭ ىشىندە «قاراعاندى – جەزقازعان»، «اقتوبە – ۇلعايسىن» جانە «سارىاعاش قالاسىنىڭ اينالما جولى» بار.
