بۇگىن تاشكەنت قالاسىندا ق ر پرەمەر-مينيسترى اسقار مامين وزبەكستان پرەزيدەنتى شاۆكات ميرزيەيەۆپەن كەزدەستى. بۇل تۋرالى ەلىمىزدىڭ ۇكىمەت باسشىسىنىڭ باسپا ءسوز قىزمەتى حابارلادى.
«ق ر تۇڭعىش پرەزيدەنتى – ەلباسى نۇرسۇلتان نازاربايەۆ سىزبەن بىرگە قازاقستان مەن وزبەكستان اراسىنداعى ەكىجاقتى قاتىناستاردى ستراتەگيالىق ىنتىماقتاستىقتىڭ جاڭا دەڭگەيىنە شىعارۋعا نەگىز سالدى. مەملەكەت باسشىسى قاسىم-جومارت توقايەۆ سىرتقى ساياساتتىڭ ساباقتاستىعىن ساقتايدى جانە ەكىجاقتى ىنتىماقتاستىقتى نىعايتۋعا ەرەكشە نازار اۋدارادى»، — دەدى ا. مامين. ۇكىمەت باسشىسى بۇگىندە قازاقستان–وزبەكستان قارىم-قاتىناسى ىنتىماقتاستىقتىڭ ساپالى جوعارى دەڭگەيىنە شىققانىن اتاپ ءوتتى. مۇنى بارلىق دەرلىك دەڭگەيلەردەگى ءوزارا ارەكەتتەسۋ قارقىنى دالەلدەيدى.
كەلىسسوزدەر بارىسىندا ساۋدا-ەكونوميكالىق، ينۆەستيسيالىق، ەنەرگەتيكالىق، ترانزيتتىك-كولىك، قۇرىلىس، توقىما، اۆتوموبيل جاساۋ، مادەني-گۋمانيتارلىق، تۋريستىك جانە باسقا دا سالالارداعى ىنتىماقتاستىقتى ودان ءارى دامىتۋ بويىنشا كەڭ اۋقىمدى ماسەلەلەر تالقىلاندى.
2019 جىلعى 9 ايدىڭ قورىتىندىسى بويىنشا ق ر مەن ءور اراسىنداعى ءوزارا ساۋدا-ساتتىق 25%-عا $2،6 ملرد دەيىن ءوستى. الداعى جىلدارى تاۋار اينالىمىن $5 ملرد دەيىن جەتكىزۋ جوسپاردا بار.
ەرتەڭ ق ر پرەمەر-مينيسترى اسقار مامين شانحاي ىنتىماقتاستىق ۇيىمىنا (شىۇ) مۇشە مەملەكەتتەردىڭ ۇكىمەت باسشىلارى كەڭەسىنىڭ (ۇبك) وتىرىسىنا قاتىسادى.
سۋرەتتەر primeminister.kz سايتىنان الىندى.