قازاقستان ەلەكتر ەنەرگياسىنىڭ ەكسپورتتاۋ ءۇشىن جاڭا نارىقتارعا شىعا باستايدى. ق ر ەنەرگەتيكا مينيسترلىگىنىڭ باسپا ءسوز قىزمەتىنىڭ حابارلاۋىنشا، وسى جىلدىڭ ماۋسىم ايىنىڭ سوڭىندا كوپ جىلداردان كەيىن العاشقى رەت قازاقستان ەلەكتر ەنەرگياسىن وزبەكستانعا ەكسپورتتاي باستاماق.
ەكى ەلدىڭ ۋاكىلەتتى ۇيىمدارىنىڭ اراسىندا جاسالعان شارتقا سايكەس 2019 جىلدىڭ ىشىندە وزبەكستان ەنەرگيا جۇيەسىنە 1 ملرد. كۆت/ ساع. استام ەلەكتر ەنەرگياسى ەكسپورتتالماق. باسپا ءسوز پاراقشاسىندا سونىمەن قاتار، «وزبەكستانعا ەلەكتر ەنەرگيانىڭ ەكسپورتىن جۇزەگە اسىرۋ ءۇشىن ماڭىزدى شارتتاردىڭ ءبىرى ەڭ الدىمەن قازاقستانننىڭ ىشكى قاجەتتىلىكتەرىن قامتاماسىز ەتۋ بولىپ تابىلادى. قازاقستان تۇتىنۋشىلارىن سەنىمدى جانە ۇزدىكسىز ەلەكترمەن جابدىقتاۋدى قامتاماسىز ەتۋ ماقساتىندا اۆارياعا قارسى اۆتوماتيكانى باپتاۋ (جۇكتەمەنى اجىراتۋدىڭ ارنايى اۆتوماتيكاسى - جااا) جانە تەحنولوگيالىق بۇزۋشىلىق بولعان جاعدايدا وزبەك تۇتىنۋشىلارىنا شەكتەۋلەر ەنگىزۋ بويىنشا كەشەندى ءىس-شارالار كوزدەلگەن.
ەلەكتر ەنەرگياسىنىڭ ەكسپورتتىق جەتكىزىلىمى باستالدى، جانە بۇگىنگى تاڭدا (ماۋسىم ايىنىڭ سوڭىنان باستاپ 17 شىلدە بويىنشا) وزبەكستانعا 145 ملن. كۆت/ ساع. ەلەكتر ەنەرگياسى ساتىلعان.
قازاقستاننىڭ ەلەكتر ەنەرگياسىنىڭ ەكسپورتتىق جەتكىزىلىمى قازاقستان رەسپۋبليكاسى ۇكىمەتىنىڭ قازاقستان ەلەكتر ستانسيالارىن ۋاقتىلى جاڭعىرتۋ، رەكونسترۋكسيالاۋ جانە كەڭەيتۋ بويىنشا جۇرگىزىلگەن ساياساتىنىڭ ناتيجەسىندە الىنعان ەلەكتر قۋاتىنىڭ قولدانىستاعى ءپروفيسيتىنىڭ ارقاسىندا مۇمكىن بولىپ وتىر.
ەكى ەل اراسىنداعى ساۋدانى دامىتۋ جونىندەگى قادامدار تەك ەلەكتر ەنەرگەتيكاسى سالاسىنداعى عانا ەمەس، سونىمەن قاتار بولاشاقتا باسقا دا ەكونوميكا سالالارىندا ءوزارا ءتيىمدى ىنتىماقتاستىققا ىقپال ەتەتىن بولادى»-دەپ جازىلعان.