بۇگىن نۇر-سۇلتان قالاسىنداعى قمدب جاڭا عيماراتىندا IV حالىقارالىق ءدىني-عىلىمي كونفەرەنسيا دەلەگاتتارىنىڭ قاتىسۋىمەن مەرەكەلىك شارا بولىپ ءوتتى. ەلوردا تورىندە كورشىلەس مەملەكەت مۇفتيلەرى مەن ءدىن قايراتكەرلەرىنىڭ باسىن قوسقان «رۋحاني جىبەك جولى. يسلام جانە جاستار: قازىرگى زاماننىڭ سىن-قاتەرلەرى» اتتى حالىقارالىق كونفەرەنسيا اياسىندا بۇگىن قازاقستان مۇسىلماندارى ءدىني باسقارماسىنىڭ جاڭا عيماراتىمەن تانىستىرۋ ءراسىمى ءوتىپ، شەتەلدىك قوناقتارعا قازاقى ءسالت-داستۇرىمىز، ۇلتتىق قۇندىلىقتارىمىز پاش ەتىلدى.
قمدب باسپا ءسوز قىزمەتىنىڭ مالىمەتىنشە، قاز-قاتار قازاق ءۇي تىگىلىپ، كۇمبىرلەگەن كۇي، تاعىلىمدى تەرمە ءۇنى تەربەتكەن قمدب عيماراتىنىڭ اۋلاسىندا بۇگىن قۋانىشتىڭ قازانى بۇرقىلداپ، ىنتىماق-بىرلىكتىڭ تۋى جەلبىرەدى. سالتاناتتى شارانىڭ شىمىلدىعىن تۇرگەن قمدب ءتوراعاسى، باس ءمۇفتي سەرىكباي قاجى وراز حالىقارالىق كونفەرەنسيا ماڭىزىن، بۇگىنگى كۇننىڭ ايرىقشا قۋانىشىن اتاپ ءوتىپ، بارشا قوناقتارعا اق تىلەگىن جەتكىزدى.
IV حالىقارالىق كونفەرەنسيا جۇمىسىنا ارنايى كەلگەن رەسەي مۇسىلماندارى ءدىني باسقارماسى جانە رەسەي مۇفتيلەر كەڭەسى ءتوراعاسىنىڭ ءبىرىنشى ورىنباسارى رۋشان حازىرەت اببياسوۆ، وزبەكستان ءمۇفتيى ۋسمونحان اليموۆ، موڭعوليا ءمۇفتيى باتىربەك حاديس، جۇڭگو يسلام اسسوسياسياسىنىڭ ءتوراعاسى حاسان يانگ فامينگ، ت.ب. يسلام الەمىنىڭ بەدەلدى تۇلعالارى قۇتتىقتاۋ لەبىزدەرىن ايتىپ، قمدب جۇمىسىنا ساتتىلىك تىلەدى.
جاماعات الدىندا جۇرەكجاردى تىلەكتەرىن جەتكىزگەن قوناقتار لەبىزىنەن سوڭ باس ءمۇفتي سەرىكباي قاجى وراز جاقىندا عانا اشىلعان عيمارات ءىشىن تانىستىرىپ، جالپى جۇمىس بارىسىنان حاباردار ەتتى. ارنايى تانىستىرۋ راسىمىنەن سوڭ قوناقتار عيمارات اۋلاسىنداعى قازاق ۇيلەرگە باس سۇعىپ، قازاق حالقىنىڭ قوناقجايلىعىنا كۋا بولدى.
سۋرەتتەر muftyat.kz سايتىنان الىندى.
