پرەزيدەنت قاسىم-جومارت توقايەۆ قازاقستانعا رەسمي ساپارمەن كەلگەن جۇڭگو حالىق رەسپۋبليكاسى مەملەكەتتىك كەڭەسى پرەمەرىنىڭ ورىنباسارى ليۋ گوچجۋندى قابىلدادى، دەپ حابارلايدى اقوردا.
اڭگىمەلەسۋ بارىسىندا قازاق-قىتاي ستراتەگيالىق سەرىكتەستىگىنىڭ قازىرگى جاي-كۇيى مەن دامۋ پەرسپەكتيۆالارى، سونداي-اق بۇعان دەيىن پرەزيدەنت قاسىم-جومارت توقايەۆ پەن قحر ءتوراعاسى سي سزينپين قول جەتكىزگەن ۋاعدالاستىقتاردى ەكى ەل ۇكىمەتتەرىنىڭ ىسكە اسىرۋ بارىسى تالقىلاندى.
مەملەكەت باسشىسىنىڭ ايتۋىنشا، قازاقستان قىتايدىڭ سەنىمدى سەرىكتەسى جانە سولاي بولىپ قالا بەرەدى. سونىمەن قاتار قحر-مەن ەكىجاقتى قارىم-قاتىناستى مۇلدە جاڭا دەڭگەيگە كوتەرۋ ەلىمىز ءۇشىن ماڭىزدى باسىمدىق سانالادى.
– قازاقcتان مەن قىتايدىڭ جان-جاقتى ستراتەگيالىق سەرىكتەستىگى مەن ماڭگىلىك دوستىعى ۇدايى دامىپ كەلەدى. ءبىز بولاشاققا سەنىممەن قارايمىز. مۇنى ەرەكشە اتاپ ءوتۋ كەرەك. ەكىجاقتى ساۋدا-ساتتىقتىڭ كولەمى بويىنشا كوش باستاپ تۇرعان جۇڭگو – قازاقستاننىڭ جەتەكشى ساۋدا-ەكونوميكالىق سەرىكتەسى. وتكەن جىلدىڭ قورىتىندىسى بويىنشا ەكى ەل اراسىنداعى تاۋار اينالىمى 40 ميلليارد دوللارعا جەتتى. بۇل – رەكوردتىق كورسەتكىش. ءبىز مۇنى 100 ميلليارد دوللارعا دەيىن جەتكىزۋدى كوزدەپ وتىرمىز. بۇل ماقساتقا قول جەتكىزۋگە بولادى، – دەدى مەملەكەت باسشىسى.
ءوز كەزەگىندە ليۋ گوچجۋن جۇڭگو مەن قازاقستان اراسىنداعى ىنتىماقتاستىقتىڭ قارقىندى دامىپ كەلە جاتقانىن اتاپ ءوتتى.
– جۇڭگو حالقىنىڭ سىرالعى ءارى ىزگى نيەتتى دوسى رەتىندە ءسىز وسى جىلدار ىشىندە جۇڭگو مەن قازاقستان قاتىناستارىنىڭ دامۋىنا سۇبەلى ۇلەس قوستىڭىز. مۇنى جۇڭگو تاراپى جوعارى باعالايدى. ءسىزدىڭ باسشىلىعىڭىزبەن ەلىڭىز قۋاتتى، گۇلدەنگەن جاڭا قازاقستاندى قۇرۋ جولىندا ىلگەرىلەي بەرەتىنىنە سەنىمدىمىن. جۇڭگو مەن قازاقستان – تاتۋ كورشىلەر، سەنىمدى سەرىكتەستەر ءارى ءبىر-بىرىن تولىقتىراتىن دوستاس ەلدەر، – دەدى ليۋ گوچجۋن.
كەزدەسۋ بارىسىندا ساۋدا، ينۆەستيسيا، اۋىل شارۋاشىلىعى، كولىك-لوگيستيكا، ەنەرگەتيكا جانە تۋريزم سالالارىنداعى ىقپالداستىقتى نىعايتۋ پەرسپەكتيۆالارى قاراستىرىلدى. سونداي-اق مادەني-گۋمانيتارلىق بايلانىستاردى دامىتۋ ماسەلەلەرى تالقىلاندى.
