قازاقستان مەن وزبەكستان ىنتىماقتاستىقتى ودان ءارى كەڭەيتە بەرەدى. سىرتقى ىستەر مينيسترلگىنىڭ رەسمي سايتى قازاقستان رەسپۋبليكاسى سىرتقى ساياسي ۆەدومستۆوسىنىڭ باسشىسى بەيبىت اتامقۇلوۆ ورتالىق ازيا جانە اقش سىرتقى ىستەر مينيسترلىكتەرى باسشىلارىنىڭ «س5+1» وتىرىسىنا قاتىسۋ ءۇشىن قازاقستانعا كەلگەن وزبەكستان رەسپۋبليكاسىنىڭ سىرتقى ىستەر ءمينيسترى ابدۋلازيز كاميلوۆپەن كەلىسسوزدەر وتكىزگەنىن حابارلادى.
سىرتقى ساياسي ۆەدومستۆو تاراتقان اقپارات بويىنشا، تاراپتار وسى جىلدىڭ 14-15 ساۋىرىندە ق ر پرەزيدەنتى قاسىم-جومارت توقايەۆتىڭ وزبەكستانعا جاساعان مەملەكەتتىك ساپارى جانە 21 ماۋسىمدا تاشكەنت قالاسىندا ۇكىمەت باسشىلارى دەڭگەيىندە قازاق-وزبەك ۇكىمەتارالىق كوميسسياسىنىڭ 18ء-شى ءماجىلىسىن تابىستى وتكىزۋ بارىسىندا قول جەتكىزىلگەن ۋاعدالاستىقتار شەڭبەرىندە قازاقستان مەن وزبەكستان اراسىنداعى ساياسي ديالوگتىڭ دامۋى مەن ساۋدا-ەكونوميكالىق ىنتىماقتاستىقتىڭ كەڭەيۋىن قاناعاتتانارلىقپەن اتاپ ءوتتى.
سونىمەن بىرگە، ا.كاميلوۆ قازاقستاننىڭ سىرتقى ىستەر ءمينيسترىن وزبەكستانعا رەسمي ساپارمەن كەلىپ قايتۋعا شاقىردى.
مينيسترلەر ءوزارا ساۋدانىڭ تۇراقتى ءوسۋىن قامتاماسىز ەتۋ ءۇشىن قولايلى جاعدايلار جاساۋعا نازار اۋداردى، ول 2018 جىلى 25%-عا ءوسىپ، 2،5 ملرد. اقش دوللارىن قۇرادى، سونداي-اق ونەركاسىپ پەن كولىك سالاسىنداعى بىرلەسكەن ءىرى جوبالاردى ىسكە اسىرۋعا باسا نازار اۋداردى. ەكى جاقتى تاۋار اينالىمىن تاياۋ جىلدارى 5 ملرد. دوللارعا دەيىن كوتەرۋ جوسپارلانىپ وتىر.
ەلدەر اراسىنداعى مادەني-گۋمانيتارلىق بايلانىستاردى ودان ءارى نىعايتۋدىڭ، ونىڭ ىشىندە «قازاقستاننىڭ وزبەكستانداعى جىلىن» تابىستى وتكىزۋدىڭ ماڭىزدىلىعى اتاپ ءوتىلدى.
كەزدەسۋ بارىسىندا سونداي-اق وڭىرلىك كۇن تارتىبىندەگى كەڭ اۋقىمدى ماسەلەلەر تالقىلاندى. تاراپتار ورتالىق ازيا مەملەكەتتەرى باسشىلارىنىڭ ەكىنشى كونسۋلتاتيۆتىك كەزدەسۋىن تابىستى وتكىزۋگە مۇددەلىلىگىن راستادى.
سۋرەتتەر http://mfa.gov.kz سايتىنان الىندى.