قازاقستان كورشىلەس ەلدەرگە گۋمانيتارلىق كومەك كورسەتۋدە. بۇل تۋرالى ق ر ءسىم حابارلايدى.
گۋمانيتارلىق كومەك – بۇل الەمدىك قوعامداستىق مۇشەلەرىنە ءوزارا قولداۋ كورسەتۋدىڭ جالپى قابىلدانعان حالىقارالىق تاجىريبەسى. بۇگىنگى تاڭدا COVID-19 عالامدىق پاندەمياسى جاعدايىندا كوپتەگەن ەلدەر وسى زامان تالابىنا قارسى كۇرەستە مۇمكىندىكتەردى ارتتىرۋ ماقساتىندا بىر-بىرىنە ءتۇرلى كومەك كورسەتۋدە.
قازاقستان دا بۇل ۇدەرىسكە بەلسەندى قاتىسۋدا. پاندەمياعا قارسى ءىس-قيمىل كەزەڭىندە كورشىلەس ەلدەرگە ەكونوميكالىق قولداۋ كورسەتۋگە ۇمتىلا وتىرىپ، قازاقستان پرەزيدەنتى ق.توقايەۆ قىرعىزستان مەن تاجىكستانعا جالپى قۇنى 3 ملن اقش دوللارىنان استام سوماعا ءارقايسىنا 5 مىڭ توننا كولەمىندە قازاقستاندىق ۇن جەتكىزۋ تۇرىندە گۋمانيتارلىق كومەك كورسەتۋ تۋرالى شەشىم قابىلدادى.
شەشىم حالىقتى ازىق-تۇلىكپەن ۇزدىكسىز قامتاماسىز ەتۋ ماقساتىندا قىرعىز جانە تاجىك تاراپتارىنىڭ رەسمي وتىنىشتەرىنە بايلانىستى قابىلداندى.
قازاقستان پرەزيدەنتى ق. توقايەۆپەن تەلەفون ارقىلى سويلەسۋ بارىسىندا تاجىكستان پرەزيدەنتى ە.راحمون تاجىك حالقىنا وسى قيىن كەزەڭدە قولداۋ ءبىلدىرىپ، گۋمانيتارلىق كومەك كورسەتكەنى ءۇشىن العىسىن ءبىلدىردى.
ول، سونداي-اق، تاجىكستان ازاماتتارىن وتانىنا جەتكىزۋگە ىقپال ەتكەنى جانە قازاقستان اۋماعى ارقىلى جۇكتەردى تاسىمالداۋعا كومەكتەسكەنى ءۇشىن ريزاشىلىعىن ءبىلدىردى. سونىمەن قاتار، قازاقستان جانە قىرعىزستان سىرتقى ىستەر مينيسترلەرى م.تىلەۋبەردى مەن چ.ايداربەكوۆ تەلەفون ارقىلى سويلەسۋ بارىسىندا قىرعىز تاراپى قازاقستانعا گۋمانيتارلىق كومەك كورسەتۋ تۋرالى شەشىم قابىلداعانى ءۇشىن شىن جۇرەكتەن العىس ءبىلدىردى.
جاقىن ارادا اتالعان جۇكتەر قىرعىزستان مەن تاجىكستاندا جەتكىزىلەتىن بولادى. قازاقستان، حالىقارالىق قوعامداستىقتىڭ جاۋاپتى مۇشەسى رەتىندە، جاھاندىق كوروناۆيرۋستىق پاندەميا جاعدايىندا شەت قالمايدى جانە سەرىكتەس ەلدەرگە قاجەتتى گۋمانيتارلىق كومەك كورسەتۋدى جالعاستىرۋدا.
اتاپ ايتقاندا، وسى جىلدىڭ اقپاندا COVID-19 ىندەتىنىڭ ءورشىپ تۇرعان كەزىندە قازاقستان العاشقىلاردىڭ ءبىرى بولىپ قىتايعا مەديسينالىق قورعاۋ قۇرالدارىن بىرنەشە رەت جەتكىزۋ ارقىلى ارىپتەستىك قولداۋ كورسەتتى.
جالپى گۋمانيتارلىق كومەك كورسەتۋ قازاقستاننىڭ سىرتقى ساياساتىنىڭ ماڭىزدى باعىتتارىنىڭ ءبىرى بولىپ تابىلادى. وتكەن جىلدارى قازاقستان انتيگۋا مەن باربۋدا، اۋعانستان، بانگلادەش، قىرعىزستان، مولدوۆا، موڭعوليا، ميانما، پاكىستان، سەربيا، سيريا، تۇركيا، جاپونيا جانە ت. ب. ەلدەرگە ءارتۇرلى كومەك جىبەرگەن بولاتىن.
