«استانا» حالىقارالىق قارجى ورتالىعىنىڭ الاڭىندا ق ر پرەمەر-مينيسترىنىڭ ءبىرىنشى ورىنباسارى رومان سكلياردىڭ، گەرمانيا ەكونوميكاسىنىڭ شىعىس كوميتەتى باسقارماسىنىڭ ءتوراعاسى كاترينا كلااس-ميۋلحويزەردىڭ قاتىسۋىمەن بەرلين ەۋرازيالىق كلۋبىنىڭ 40-شى مەرەيتويلىق وتىرىسى ءوتتى. بۇل تۋرالى ۇكىمەتتىڭ باسپا ءسوز قىزمەتى حابارلادى.
سونداي-اق شاراعا مەملەكەتتىك جانە جەكە سەكتور وكىلدەرى، CLAAS، CT AGRO GmbH، Knauf International GmbH، Atlas International GmbH سەكىلدى گەرمانيانىڭ جەتەكشى كومپانيالارىنىڭ باسشىلارى قاتىستى.
پرەمەر-مينيستردىڭ ءبىرىنشى ورىنباسارى ءوزىنىڭ العى سوزىندە گەرمانيانىڭ ەلىمىزدىڭ ەۋروپالىق وداقتاعى ەڭ ماڭىزدى ساۋدا-ەكونوميكالىق جانە ينۆەستيسيالىق سەرىكتەسى ەكەنىن اتاپ ءوتتى. سوڭعى جىلدارى قازاقستان گەرمانيانىڭ 50 جەتەكشى سىرتقى ساۋدا سەرىكتەستەرىنىڭ قاتارىنا ەندى، وسىلايشا بىردەن 10 پوزيسياعا كوتەرىلدى.
«رەسپۋبليكامىزداعى ينۆەستيسيالار قاۋىپسىزدىگى مەن جوعارى ساياسي تۇراقتىلىقتى مويىنداۋدىڭ ماڭىزدى بەلگىسى – گەرمانيا فەدەرالدى ۇكىمەتىنىڭ قازاقستاندى ىنتىماقتاستىق ورناتۋ ءۇشىن ينۆەستيسيالىق كەپىلدىكتەر بەرۋدىڭ جەڭىلدىكتى ءتارتىبى قولدانىلاتىن 34 مەملەكەتتىڭ تىزىمىنە قوسۋى بولدى»، — دەدى ر. سكليار.
ءوز كەزەگىندە كاترينا كلااس-ميۋلحويزەر قازاقستان گەرمانيانىڭ ورتالىق ازياداعى ەڭ ماڭىزدى سەرىكتەسى ەكەنىن باسا ايتتى. ول نەمىس دەلەگاسياسىنىڭ قازاقستانعا اگروونەركاسىپ كەشەنى، تاۋ-كەن مەتاللۋرگياسى، ەنەرگەتيكا، كولىك جانە لوگيستيكا سالالارىندا ناقتى بىرلەسكەن جوبالاردى جۇزەگە اسىرۋدى ۋاعدالاسۋ ماقساتىمەن كەلگەنىن ەرەكشە اتاپ ءوتتى.
«گەرمانيا شەتەلدە سەرىكتەستەردى بەلسەندى ىزدەۋدە، وسى ورايدا قازاقستان ىنتىماقتاستىقتى كەڭەيتۋدىڭ باسىم باعىتى بولىپ سانالادى. ءبىز قوسىلعان قۇنى جوعارى ءونىم شىعارعىمىز كەلەدى جانە قازاقستان رەسپۋبليكاسىنداعى ونەركاسىپتىك جوبالاردى دامىتۋعا ۇلەس قوسۋدى جوسپارلاپ وتىرمىز»، — دەدى گەرمانيا ەكونوميكاسى شىعىس كوميتەتىنىڭ باسقارما ءتوراعاسى.
كەزدەسۋ بارىسىندا «بايتەرەك» ۇلتتىق باسقارۋشى حولدينگى» اق باسقارما ءتوراعاسى رۋستام قاراعويشين، گەرمانيا ەكونوميكاسى شىعىس كوميتەتىنىڭ اتقارۋشى ديرەكتورى، قازاقستان-گەرمانيا ىسكەرلىك كەڭەسىنىڭ تەڭ ءتوراعاسى ميحاەل حارمس، ورتالىق ازياداعى نەمىس ەكونوميكاسى سىرتقى ساۋدا، ىلگەرىلەتۋ جانە قارجى دەپارتامەنتىنىڭ باسشىسى حوۆسەپ ۆوسكانيان، گەرمانيا فەدەراتيۆتىك رەسپۋبليكاسىنىڭ ەكونوميكا جانە كليماتتى قورعاۋ فەدەرالدى مينيسترلىگىنىڭ باسشىسى گەرليند حەكمان جانە ت. ب. قاتىستى.
سونىمەن قاتار ر. سكليار قۇرامىنا 15 نەمىس كومپانياسىنىڭ باسشىلارى كىرەتىن نەمىس ەكونوميكالىق دەلەگاسياسىنىڭ وكىلدەرىمەن كەزدەسۋ وتكىزدى. تاراپتار پىكىر الماسىپ، ىنتىماقتاستىقتىڭ نەگىزگى اسپەكتىلەرىن انىقتاپ، ەكونوميكانىڭ ءتۇرلى سالالارىنداعى ارىپتەستىكتى تەرەڭدەتۋدىڭ ىقتيمال جولدارىن تالقىلادى.