قازاقستاننىڭ تۇركياداعى ەلشىسى ابزال ساپاربەك ۇلى تۇركيا ۇلى ۇلتتىق ءماجىلىسىنىڭ ءتوراعاسى بينالي يىلدىرىممەن كەزدەستى. جىلى اتموسفەرادا وتكەن كەزدەسۋ بارىسىندا قازاقستان مەن تۇركيانىڭ ەكىجاقتى جانە كوپجاقتى ىنتىماقتاستىعىنا قاتىستى ءبىرقاتار ماسەلەلەر تالقىلاندى. بۇل تۋرالى اقپارات تۇركياداعى ەلشىلىكتىڭ الەۋمەتتىك جەلىدەگى پاراقشاسىندا جازىلدى.
قازاقستاننىڭ حالىقارالىق ارەناداعى بەدەلىنىڭ ۇدايى ءوسىپ كەلە جاتقانىن تىلگە تيەك ەتكەن بينالي يىلدىرىم قازاقستان پرەزيدەنتى ءنۇرسۇلتان نازاربايەۆتىڭ ورتالىق ازيا مەن تۇركى الەمىندەگى ىنتىماقتاستىقتى دامىتۋداعى ءرولىن ايرىقشا اتاپ ءوتتى. تۇرىك سپيكەرىنىڭ پايىمداۋىنشا، رەسەي، جۇڭگو، اقش سياقتى الپاۋىت مەملەكەتتەر قازاقستاننىڭ باسشىسىن ەرەكشە قۇرمەتتەيدى جانە كەڭەستەرىنە قۇلاق اسادى. ول، سونداي-اق، تۇركيا باسشىلىعىنىڭ دا ەلباسىعا دەگەن ەرەكشە ءىلتيپاتىنا توقتالىپ، قازاقستاندا جۇرگىزىلىپ جاتقان سىندارلى سىرتقى ساياسات، سونىڭ ىشىندە استانا پروسەسى ءۇشىن العىسىن ءبىلدىردى.
ءوز كەزەگىندە، ەلشى ابزال ساپاربەك ۇلى قازاقستان مەن تۇركيانىڭ ستراتەگيالىق ارىپتەستەر ەكەندىگىنە نازار اۋدارىپ، وتكەن 2018 جىلدىڭ ەىجاقتى قارىم-قاتىناس تۇرعىسىنان وتە جەمىستى بولعانىن اتاپ ءوتتى. وسىنىڭ دالەلى رەتىندە ءبىر جىلدىڭ ىشىندە تۇركياعا قازاقستان پرەزيدەنتى، پرەمەر-مينيسترى، سەنات جانە ءماجىلىس ءتوراعالارى، مەملەكەتتىك حاتشى، سىرتقى ىستەر ءمينيسترى جانە باسقا دا مينيسترلەر مەن جوعارى لاۋازىمدى تۇلعالار دەڭگەيىندەگى ساپارلاردىڭ وتكەنىن كەلتىردى.
ەلشى سونداي-اق ورتالىق ازيادا بولىپ جاتقان جاقىنداسۋ ۇدەرىستەرگە كەڭىرەك توقتالىپ، وتكەن جىلى استانادا اتالعان ايماقتىڭ مەملەكەت باسشىلارىنىڭ العاشقى ءسامميتى وتكەنىنە نازار اۋداردى. بۇل رەتتە ول تۇركيانىڭ دا ورتالىق ازيا ءۇشىن ساياسي جانە ەكونوميكالىق تۇرعىدان ماڭىزدى سەرىكتەس ەكەنىن دە اتاپ ءوتتى.
تاراپتار بۇنىڭ سىرتىندا ەكى ەل اراسىنداعى ساياسي، ساۋدا-ەكونوميكالىق، زاڭشىعارۋشىلىق سالالارىنداعى ىنتىماقتاستىق ماسەلەلەرىنە توقتالدى. اتاپ ايتقاندا، تۇركى سپيكەرى استانادا ورنالاسقان ازىق-تۇلىك قاۋىپسىزدىگى جونىندەگى يسلام ۇيىمىنا قاتىستى ءتيىستى زاڭنىڭ تۇركيا پارلامەنتىندە جەدەل تۇردە قابىلدانۋىن قامتاماسىز ەتۋگە ۋادە بەردى.
