اتىراۋ وبلىسىنىڭ بۇرىنعى اكىمى بەرگەي رىسقالييەۆ لوندوندا ساكۋرا گۇلدەگەن ماۋسىمدى تاماشالاپ جۇرگەن ساتىنەن ۆيدەو جاريالادى. بىرنەشە جىلدان بەرى ۇلىبريتانيادا تۇرىپ جاتقان ەكس-شەنەۋنىكتىڭ ۆيدەوسى الەۋمەتتىك جەلىگە تارادى، دەپ حابارلايدى Ulys.

بەرگەي رىسقالييەۆ لوندون ورتالىعىندا دا ءجيى كوزگە تۇسەتىنى بەلگىلى. بۇعان دەيىن الەۋمەتتىك جەلىدە ونىڭ Burberry دۇكەنىنىڭ الدىندا پرەزيدەنت اكىمشىلىگىنىڭ بۇرىنعى باسشىسى اسلان مۋسينمەن بىرگە تۇسكەن سۋرەتى تاراعان ەدى. اسلان مۋسين دە بۇگىندە چەرنوگوريا ازاماتتىعىن الىپ، ەۋروپادا قونىستانعان.

ايتا كەتەيىك، جۋىردا الماتى قالاسىنىڭ بۇرىنعى اكىمى باۋىرجان بايبەكتىڭ دە جاپونياداعى ساكۋرا ماۋسىمىنا تامسانعان ۆيدەوسى الەۋمەتتىك جەلىلەردە تاراعان ەدى.

بەرگەي رىسقالييەۆ 2006-2012 جىلدارى اتىراۋ قالاسى مەن اتىراۋ وبلىسىنىڭ اكىمى بولىپ قىزمەت ەتتى. 2012 جىلى قىزمەتىنەن كەتكەننەن كەيىن وعان جەمقورلىق، ۇيىمداسقان قىلمىستىق توپ قۇرۋ، اسا ءىرى كولەمدە بيۋدجەت قاراجاتىن جىمقىرۋ ايىپتارى تاعىلدى. تەرگەۋ ءىسى بەس جىلعا سوزىلىپ، 2019 جىلى سوت رىسقالييەۆتى سىرتتاي 17 جىلعا باس بوستاندىعىنان ايىرۋ تۋرالى ۇكىم شىعاردى. ونىڭ اعاسى امانجان رىسقالييەۆ 16 جىلعا سوتتالعان.