قاراعاندى وبلىسىندا جىل باسىنان بەرى 332 ەسىرتكى قىلمىسى انىقتالىپ، 445 كگ ەسىرتكى تاركىلەندى. ەكى جەراستى فوتولابوراتورياسى جويىلدى. ەسىرتكى بيزنەسىمەن اينالىسقانداردىڭ قىزمەتى توقتاتىلدى: جىلدىق قارجى كولەمى 2،5 ملرد تەڭگەدەن اسقان 16 كۇدىكتى ۇستالدى.
ايماق ارالىق شتابتىڭ وتىرىسىندا ەسىرتكىگە قارسى ساياسات قانشالىقتى دەڭگەيدە جۇزەگە اسىرىلىپ جاتقاندىعى ايتىلدى. كەڭەستە مەملەكەتتىك ورگانداردىڭ وكىلدەرى وبلىستى ەسىرتكىدەن تازا ايماققا اينالدىرۋ ءۇشىن تاعى قانداي شارالار قابىلداۋ كەرەكتىگى تالقىلاندى.
پوليسەيلەر ناركوگراففيتي-مەن كۇرەس جۇرگىزۋدە.
– بۇل باعىتتاعى جۇمىستاردى جانداندىرۋ ماقساتىندا قاراعاندى، تەمىرتاۋ، ساران، شاحتينسك جانە بالقاش قالالارىندا ەرىكتىلەر مەن قوعامدىق ۇيىمداردىڭ قولداۋىمەن «ستوپ-گراففيتي» ۇرانىمەن اۋقىمدى اكسيالار وتكىزىلدى. 2024 جىلدىڭ 16 قازانىنا دەيىن 410 رەيد جۇرگىزىلىپ، 11 902 ناركوگراففيتي بوياپ تاستادى، – دەپ حابارلادى وبلىستىق پوليسيا دەپارتامەنتى باسشىسىنىڭ مىندەتىن اتقارۋشى جاسقايرات قايىروۆ.
زاماناۋي تەحنولوگيالار داۋىرىندە قىلمىسكەرلەر ەسىرتكىنى تاراتۋ ءۇشىن الەۋمەتتىك جەلىلەر مەن مەسسەندجەرلەردى كوبىرەك پايدالانادى. وبلىستىق پوليسيا دەپارتامەنت وكىلدەرى ەسىرتكىنى جارنامالايتىن 177 سايت پەن پاراقشانى بۇعاتتادى.
وتىرىستا ەسىرتكىدەن ەمدەۋ مەن ونىڭ الدىن الۋ ماسەلەلەرىنە ەرەكشە نازار اۋدارىلدى. جاقىن ارادا وبلىستىق پسيحيكالىق دەنساۋلىق ورتالىعىندا گازدى حروماتوگراف جۇمىس ىستەي باستايدى.
دەنساۋلىق ساقتاۋ باسقارماسىنىڭ باسشىسى بيبىگۇل تولەگەنوۆا بۇل قۇرالدىڭ كومەگىمەن ادامنىڭ اعزاسىندا 100-دەن استام ەسىرتكى ءتۇرىن انىقتاۋعا بولاتىنىن ايتادى.
ايماق باسشىسى ەسىرتكىگە قارسى پروفيلاكتيكا جوعارى وقۋ ورىندارىندا، كوللەدجدەر مەن مەكتەپتەردە قولجەتىمدى فورمادا جۇرگىزىلۋى كەرەكتىگىن اتاپ ءوتتى. سونداي-اق، اتا-انالارمەن ءاقپاراتتىق-تۇسىندىرۋ جۇمىستارىن كۇشەيتۋ قاجەت ەكەندىگىن ەسكەرتتى.
– پوليسيا قىزمەتكەرلەرى قالا جانە اۋدان اكىمدەرىمەن بىرگە ۇنەمى اۋلالاردى ارالاپ، ەسىرتكىنى جارنامالايتىن ورىنداردى الدىن الا انىقتاۋى قاجەت. دەنساۋلىق ساقتاۋ باسقارماسى مەكتەپ وقۋشىلارى مەن ستۋدەنتتەر اراسىندا ۇنەمى سكرينينگ ۇيىمداستىرۋى ءتيىس. وبلىستىق ديسپانسەر جانىنان ءانونيمدى كەڭەس بەرەتىن كونسۋلتاسيالىق ورتالىق اشۋ قاجەت. ايماقتا ەسىرتكىگە قارسى كۇرەستىڭ نەگىزگى ماقساتى – قوعامدى ەسىرتكىگە تاۋەلدىلىكپەن كۇرەسۋگە شاقىراتىن قوعامدىق قوزعالىس قۇرۋ كەرەك. قاراعاندى وبلىسى ەسىرتكىدەن تازا ايماققا اينالۋى ءتيىس، – دەپ اتاپ ءوتتى ەرماعانبەت بولەكپايەۆ.
