ۆاليۋتا باعامى
  • USD -

    462.5
  • EUR -

    495.5
  • RUB -

    5.31
قانداستارعا قاتىستى قوعامدىق تالقى
19 قاڭتار 2019
قانداستارعا قاتىستى قوعامدىق تالقى

«وتانداستار» قورى مەن دۇنيەجۇزى قازاقتارى قاۋىمداستىعىنىڭ ۇيىمداستىرۋىمەن استانادا قوعامدىق تالقى ءوتتى. «شەتەلدەن كەلگەن قانداستارىمىزدىڭ بۇگىنگى جاعدايى» تاقىرىبىنداعى شاراعا ەلگە ورالعان قانداستار، جۋرناليستەر، كاسىپكەرلەر جانە قوعام بەلسەندىلەرى قاتىستى.

«وتانداستار» قورىنىڭ ۆيسە-پرەزيدەنتى ءمادي ماناتبەك ۇلىنىڭ جەتەكشىلىگىمەن وتكەن جيىن بارىسىندا اتاجۇرتقا ورالعان قانداستارىمىزدىڭ ماسەلەلەرى تالقىلانىپ، ولاردى شەشۋگە باعىتتالعان ءبىرقاتار ۇسىنىستار ايتىلدى. جيىندى دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارىنىڭ كەڭەسشىسى مۇحيت ءىزبانوۆ اشىپ بەردى.

مۇحيت يزبانوۆ – دقق ءتوراعاسىنىڭ ءبىرىنشى ورىنباسارىنىڭ كەڭەسشىسى: «وتانداستارىمىزعا كوشى-قون زاڭىن، ولاردىڭ قۇقىق-مىندەتتەرىن ءتۇسىندىرۋ جۇمىستارىنا باسا نازار اۋدارۋ كەرەك. بىلمەستىكتەن سەرگەلدەڭگە سالىنىپ جۇرگەن قانداستارىمىز كوپ. ارينە، وتكەن جىلعى قۇرىلتايدان بەرى ءبىرشاما وزگەرىستەر ورىن الدى. ورالمان ستاتۋسىن الۋ ءۇشىن ەندى وتانداستارىمىز بۇرىنعىداي مىڭ سان قۇجات جيناپ اۋرە بولمايدى. ءبىرشاما جەڭىلدەتىلدى، بەس-اق قۇجاتپەن شەكتەلەتىن بولدى. قۇرىلتايدا ورالمانداردىڭ شەتەلدەگى زەينەتاقى وتىلدەرى ەسەپتەلمەۋ ماسەلەسى دە كوتەرىلگەن ەدى. جاقىندا ونىڭ دا شەشىمى تابىلدى، 27 جەلتوقساندا ەلباسى جارلىققا قول قويىپ، ەندى ەسەپتەلەتىن بولدى. دەسە دە، ءالى كۇنگە نازارىمىزدى تالاپ ەتەتىن ماسەلەلەر كوپ. ءوز ويىم، شەتەلدەن ەلگە ورالعان قازاقتاردىڭ ءومىرىن جەڭىلدەتۋ ءۇشىن بولەك مەكەمە بولۋى كەرەك دەپ ەسەپتەيمىن».

ال «زەردەلى» زياتكەرلىك ورتالىعىنىڭ نەگىزىن قالاۋشى ىرىسبەك ءماۋىت ەلگە ورالعان جەتكىنشەكتەرگە ارنالعان ينتەرنات نەگىزىندەگى بەيىمدەلۋ ورتالىقتارىن كوپتەپ قۇرۋ قاجەت دەپ سانايدى. سەبەبى، بالالار قازاق ءتىلى مەن قولدانىستاعى كيريلل جازۋىن مەڭگەرۋى، جاڭا ورتاعا ۇيلەسۋى، بەيىمدەلۋى بارىسىندا قاتتى قينالادى. قازىرگى ۋاقىتتا «زەردەلى» زياتكەرلىك ورتالىعىنا «شەتەلدەن قونىس اۋدارعان ازاماتتاردى بەيىمدەۋ ورتالىعى» ستاتۋسىن الۋعا نيەتتى ەكەن. سەبەبى، كۇنى بۇگىنگە دەيىن ورتالىق شەتەلدەن كەلگەن 2000-نان استام وقۋشىنى مەكتەپتەر مەن جوعارى وقۋ ورىندارىنا دايىنداعان.

ىرىسبەك ءماۋىت – «زەردەلى» زياتكەرلىك مەكتەبىنىڭ نەگىزىن قالاۋشى: «ءقازىر ءبىزدىڭ ورتالىقتا قىتايدان كەلگەن 200-دەن استام بالا وقيدى. ولار قازاق، ورىس، اعىلشىن تىلدەرىنەن جانە ماتەماتيكادان قوسىمشا دايىنداقتارعا قاتىسادى. تاعى ءبىر ماسەلە بار. ول قانداستارىمىزدىڭ بالالارى كامەلەت جاسقا دەيىن مىندەتتى تۇردە اتا-اناسىمەن بىرگە كەلۋى كەرەك دەگەن زاڭعا قاتىستى. ايتپەسە، بالالار ۆيزاسىنىڭ مەرزىمىن ۇزارتا المايدى، سايكەسىنشە قازاقستاندا ۇزاق تۇرا المايدى. ءبىراق، كوپ بالالاردىڭ اتا-اناسىمەن بىرگە كەلۋگە مۇمكىندىگى جوق. شەتەلدە تۇراتىن اتا-انا دا مۇندا بالاسىن اكەلۋگە نيەتتى بولعانىمەن، ونى قالدىرىپ كەتەتىن جەرى جوق. وسى رەتتە، شەتەلدىك بالالارعا ارنالعان ينتەرنات-مەكتەپتەر اشۋ كەرەك دەپ ەسەپتەيمىن. مەملەكەت تاراپىنان وسىعان رۇقسات بەرىلىپ، بالالارعا جاۋاپكەرشىلىك الىنۋ كەرەك. سوندا ءبىر جاعى وقىتۋ، ءبىر جاعى بەيىمدەۋ پروسەسى ورىن الادى. ءبىر وتباسىن كوشىرۋگە كەتەتىن اقشاعا ون بالانى اكەلىپ وقىتقان ارتىق دەۋگە نەگىز بار. ناتيجەسىندە، كەلگەن قانداستارىمىزدىڭ اراسىنان قازاقستان ءۇشىن قۇندى، مىقتى ماماندار شىعادى».

جۋرناليست ەرنات قاشقىنوۆتىڭ ايتۋىنشا، اتاجۇرتىنا كەلگەن جەتكىنشەكتەردىڭ ەلدە ءبىلىم الۋىنا جاستارى ازايىپ جاتقان اۋىلدى جەرلەر قىزىعۋشىلىق تانىتادى.   

ەرنات قاشقىنوۆ – جۋرناليست، اۋدارماشى: «شەتەلدەگى قازاققا وتان كەرەك. ال ءوز ەلىمىزدەگى قازاققا قازاق كەرەك. وسى ەكەۋىن ۇشتاستىرۋعا بولادى دەپ ويلايمىن. مەن ءوزىم قاراعاندى وبلىسى اقتوعاي اۋدانىنىڭ تۋماسىمىن. سول جاقتا ءۇش سەلولىق وكرۋگتىڭ اكىمى جاقىندا مەنىمەن حابارلاستى. ءبىز باردىق. نارمانبەت، ءجامشى جانە قاراتال دەگەن اۋىلدار ەكەن. وسى اۋىلداردا بالالار سانى ازايىپ كەتكەن توعىز، ون ءبىر جىلدىق مەكتەپتەر بار. جەرگىلىكتى بيلىكتىڭ مۇددەسى – سول مەكتەپتەردى جاپتىرماۋ. ولارعا بالا كەرەك، قازاق تاپپاي وتىر. اۋىلعا كوشىپ كەلگەن ادامدارعا تۇراتىن دايىن ۇيلەر بار. تاعى ءبىر ايتا كەتەرلىگى، اتالعان اۋىلداردىڭ جەرى مال شارۋاشىلىعىنا ارنالعان شۇرايلى كەلگەن. سايكەسىنشە، كاسىپ تە جۇرگىزۋگە بولادى. وسى ماسەلەنى رەسپۋبليكالىق دەڭگەيدە زەرتتەۋ كەرەك. سەبەبى، قازاققا سۇرانىپ تۇرعان جەرلەر كوپ».

اتاجۇرتقا كۇنى كەشە ورالعان قۋانىش ءىلياس وزگە ەلدەگى قانداستاردىڭ ادەبي، مادەني، تاريحي ەڭبەكتەرىن ساقتاپ قالۋ ماسەلەسىنە توقتالدى. اقىن قانداستارىمىزدىڭ رۋحاني مۇراسىنىڭ ەلەكتروندىق نۇسقاسىن جاساقتاۋدى ۇسىندى.

قۋانىش ءىلياس – اقىن: «مەنىڭ قىتايدان كوشىپ كەلگەنىمە ەكى-اق اي بولدى. وتباسىمنىڭ كوشكەنىنە جارتى جىل. كوشى-قون ماسەلەسىنە قاتىستى ايتار بولساق، ءبىز تەك ادامدى عانا اكەلە الامىز. مال قالىپ قويسا، مال ساتىپ الا الامىز. جەر قالسا،  جەردى دە الۋعا، وندىرۋگە بولادى. ءبىراق، سول جەرگە ءسىڭىپ كەتكەن تەرىمىزدى، ول جەرگە جاراتقان مادەنيەتىمىزدى، كوركەم ونەرىمىزدى، تاڭبالى تاستان باستالاتىن تاريحىمىزدى، ءبىز، وكىنىشكە قاراي، اكەلە المايمىز. ءبىزدىڭ سورەدە تۇرعان قانشاما تاريحي، مادەني، ادەبي كىتاپتارىمىز كەلمەسكە كەتتى. تاريحي وتاننان كەتكەنىمىزگە ءۇش عاسىر تولعان قازاقتارمىز. ءبىزدىڭ كوز جاسىمىزدان، ساعىنىشىمىزدان تۋعان، سول جەردەگى بۇكىل قازاققا ازىق بولاتۇعىن ۇلكەن ادەبيەت، مادەنيەت قورى، شەجىرە قالىپتاستى. وسى نارسەنىڭ بارلىعى ساياسات قۇربانى بولدى دەپ قاراپ وتىرۋعا ءتيىستى ەمەسپىز دەپ ەسەپتەيمىن. ۇلكەن قوردىڭ ەلەكتروندى نۇسقاسىن جاساۋ سياقتى جۇمىستاردى ۇيىمداستىرساق تا، قۇندىلىقتى قالاي دا قۇتقارىپ قالۋ كەرەك».

جيىن بارىسىندا ايتىلعان ۇتىمدى پىكىرلەر مەن ۇسىنىستار «وتانداستار» قورى مەن دۇنيەجۇزى قازاقتارى قاۋىمداستىعىنىڭ بىرىككەن قىزمەتىندە ەسكەرىلەتىنى ايتىلدى.

RELATED NEWS
ەكى اپتادا ەكى التىن
17 قاڭتار 2019
ەكى اپتادا ەكى التىن

شەتەلدەگى قانداستار اراسىندا قارا ءۇزىپ جۇرگەن تالاي تالانت بار. سولاردىڭ ءبىرى موڭعوليا ەلىندە تۇراتىن جاس پالۋان — سەرىك بەردىمۇرات ۇلى. قازاقستانداعى جارىستارعا ءجيى قاتىسىپ، جارقىراپ كورىنىپ كەلە جاتقان سپورتشىنى مۇقىم قازاق جاقسى تانيدى. ەندى مىنە، KAZNEWS.MN سايتىنىڭ جازۋىنشا، بۇگىن ۋلاانبااتار قالاسىندا سامبودان ەرەسەكتەر اراسىندا وتكەن موڭعوليا بىرىنشىلىگىندە ءوز سالماعىندا چەمپيون اتانعان.

وتكەن اپتا عانا دزيۋدو كۇرەسىنەن سەلەنگە ايماعىنىڭ ءسۇحبااتار قالاسىندا ەرلەر مەن ايەلدەر اراسىنداعى وتكەن موڭعوليا  چەمپيوناتىندا 100 كەلى سالماقتا بەلدەسكەن سەرىك بەردىمۇرات ۇلى قارسىلاس شىداتپاي التىن مەدال العان بولاتىن. سەرىك بەردىمۇرات ۇلى جارتىلاي فينالدا 2017، 2018 جىلعى ەل چەمپيونى گ.التاناباگانادان باسىم ءتۇسىپ، فينالدىق كەزدەسۋدە قارسىلاسى د.سەرەننيامدى اياقتان ءىلىپ شالۋ ءادىسى بويىنشا ۆازاري ۇپايىمەن جەڭگەن ەدى. ال بۇگىن مىنە، سامبودان موڭعوليا چەمپيونى اتاندى. ەستەرىڭىزگە سالا كەتسەك، سەرىك بەردىمۇرات ۇلى سامبودان ەرەسەكتەر اراسىندا ءۇشىنشى رەت ەل چەمپيونى اتانىپ وتىر. ول، بۇعان دەيىن 2014، 2017 جىلدارى چەمپيون بولعان ەدى. ال دزيۋدو كۇرەسى بويىنشا سەرىك بەردىمۇرات ۇلى 100 كەلى سالماق بويىنشا ەل بىرىنشىلىگىنىڭ 2017 جىلى قولا جۇلدەسىنە يە بولعان بولاتىن. وسىلايشا، ول بايان-ولگيي سپورت تاريحىندا العاش رەت دزيۋدودان ەرەسەكتەر اراسىندا ەل چەمپيونى اتاندى. ەكى اپتادا ەكى سالماق بويىنشا موڭعوليا چەمپيونى اتانعان قازاق بالاسىنا ازىرشە تەڭ كەلەر قارسىلاس جوق.

 

الەمنىڭ تابىستى قازاقتارى باس قالادا باس قوستى
03 ءساۋىر 2019
الەمنىڭ تابىستى قازاقتارى باس قالادا باس قوستى

قوردىڭ باسپا ءسوز قىزمەتىنىڭ حابارلاۋىنشا، قازاق دياسپوراسى وكىلدەرىمەن «وتانداستار قورى» كەاق پرەزيدەنتى نۇرتاي ابىقايەۆ پەن دۇنيەجۇزى قازاقتارى قاۋىمداستىعى ءتوراعاسىنىڭ ءبىرىنشى ورىنباسارى زاۋىتبەك تۇرىسبەكوۆ كەزدەستى. ولار ەلگە كەلگەن قوناقتارعا مەرەكەلىك لەبىز-تىلەگىن ارناپ، ەلباسى تاپسىرماسىمەن قۇرىلعان «وتانداستار قورىنىڭ» ماقسات-مۇددەسىن ءتۇسىندىردى.

«الەمگە تارىداي شاشىلعان قازاق بالاسىن ءبىز ەش ۋاقىت ۇمىتقان ەمەسپىز، ۇمىتپايمىز دا. بارلىق قانداستى تاريحي وتان توڭىرەگىندە بىرلەستىرۋ، قولداۋ ءۇشىن دۇنيەجۇزى قازاقتارىنىڭ 5ء-شى قۇرىلتايىنداعى ەلباسى تاپسىرماسىمەن «وتانداستار قورى» كوممەرسيالىق ەمەس اكسيونەرلىك قوعامى قۇرىلدى. ەلگە ورالعان جانە شەتەلدە تۇراتىن قازاقتاردى قولداۋ ماقساتىنداعى جوبالارىمىزدى ءقازىر جۇيەلەپ، ازىرلەپ جاتقان جايىمىز بار. بۇگىنگى كەزدەسۋىمىزدىڭ ماقساتى دا سول – قيىرداعى قانداستارىمىزدىڭ شوقتىعىن اسىرۋ، سونداي-اق ولاردىڭ ۇلتتىق بولمىسىن ساقتاپ قالۋ جولىندا وزدەرىڭىزبەن كۇش بىرىكتىرۋ»، - دەدى نۇرتاي ابىقايەۆ.

وتانداستار كەزدەسۋىندە ايگىلى قازاق بوكسشىسى قانات يسلام الەمنىڭ تۇكپىر-تۇكپىرىندە جۇرگەن قانداستاردى قازاقتىڭ بىرىگۋى جولىندا ايانباي ەڭبەك ەتۋگە شاقىردى. ءوز كەزەگىندە، كاسىپقوي سپورتشى بوكستى قازاق بالالارى اراسىندا دامىتۋعا باعىتتالعان جوبالاردى قولعا الىپ، جۇزەگە اسىرىپ جاتقاندىعىن بايان ەتتى.

كەزدەسۋدىڭ تاعى ءبىر كەيىپكەرى – قوبىزشى، تاراز قالاسىنىڭ تۋماسى ايگەرىم ەرسايىنوۆا فرانسياداعى «قورقىت» قازاق مادەنيەت ورتالىعىن باسقارادى. ونىڭ ايتۋىنشا، ورتالىقتى قۇربىسى ءارى اتتاسى ايگەرىم ماتايەۆا ەكەۋى ءۇش جىل بۇرىن اشقان. تۇڭعىش قازاق مادەنيەت ورتالىعىن اشۋعا فرانسياداعى اسىراندى قازاق بالالارى سەبەپ بولىپتى.

«تاريحي وتانعا، اتا-انالارىنا ءبىرشاما جاقىن بولعىسى كەلگەندىكتەن، اسىراپ الىنعان قازاق بالالارى ورىس مادەني ورتالىقتارىنا بارىپ جۇرگەن ەكەن. وسى نارسە ءبىزدىڭ نامىسىمىزعا ءتيدى. سول ءۇشىن ءوز قاراجاتىمىزدى قۇيىپ، تۇڭعىش قازاق مادەنيەت ورتالىعىن اشتىق. العاشقى ەكى جىلى، تار بولسا دا كىشكەنتاي عيماراتتىڭ ءبىر بولمەسىن جالعا بەرىپ، تۇرىك اعايىندار قول ۇشىن سوزدى. قازىرگى تاڭدا فرانسياداعى قازاقستان ەلشىلىگىندەگى مادەنيەت، عىلىم جانە ءبىلىم بولىمىندەمىز. قازاق دياسپوراسى كوپ شوعىرلانعان فرانسيا مەملەكەتىندە ءبىزدىڭ ونەرىمىز بەن انا تىلىمىزگە دەگەن قۇشتارلىق وتە زور. قازاقتىڭ ۇلتتىق اسپاپتارى مەن فورتەپيانونى،  انا ءتىلىمىز بەن قولونەردى تاعدىر تالكەگىمەن فرانسۋز شاڭىراعىندا ءوسىپ-ونىپ جاتقان ءوزىمنىڭ قاراكوز باۋىرلارىمنان بولەك، فرانسۋزدارعا دا ۇيرەتىپ جاتىرمىز. قازىرگى ۋاقىتتا قازاق ادەبيەتىنە كوپ كوڭىل بولگىمىز كەلەدى. ول ءۇشىن بىزگە لاتىن الىپبيىندەگى كىتاپتار قاجەت»، - دەيدى ايگەرىم ەرسايىنوۆا.

ەلوردا تورىندە وتكەن كەزدەسۋگە ۋكراينادان كاسىپكەر-قانداسىمىز نۇرتاي كەنجەبەكوۆ تە قاتىستى. ول ءوز سوزىندە قانداستارىمىزدىڭ اراسىنداعى جاعدايى ناشار وتباسىلاردىڭ بالالارىن مامانداندىرۋ جوباسىن قازاقستاندىق تاراپپەن بىرىگىپ جۇزەگە اسىرىپ جاتقاندىعى تۋرالى ايتتى. مالتانىڭ جوعارعى وقۋ ورنى نەگىزىندە مامانداناتىن تۇلەكتەر جوبا اياقتالعان سوڭ قازاقستاندا جۇمىسپەن قامتىلادى ەكەن. سونداي-اق، كاسىپكەر تاريحي وتاندا «ءۇمىت» قورىنىڭ نەگىزىن قالاپ، «وتانداستار» قورىمەن سەرىكتەسۋ ارقىلى «استانا حاب» نەگىزىندە Iت-ماماندارىن وقىتۋ مەكتەبى دەپ اتالاتىن جاڭا جوبانىڭ تۇساۋىن كەسپەك نيەتى تۋرالى دا ايتىپ ءوتتى.

رەسەيدەن كەلگەن تورعىن اشەنوۆا – ومبى قالاسىنىڭ تۋماسى. رف ءىىم قاراستى ومبى اكادەمياسىندا قۇقىق جانە مەملەكەت تاريحى مەن تەورياسى كافەدراسىنىڭ اعا وقىتۋشىسى بولىپ قىزمەت ەتەتىن قانداسىمىز زاڭ عىلىمدارىنىڭ كانديداتى، سونداي-اق يدەولوگ ءارى بەلسەندى قايراتكەر ەكەن. ءوزى نەگىزىن قالاعان جەرگىلىكتى «ومبى قازاقتارى» ۇيىمىن باسقارادى. ايتۋىنشا، رەسەيلىك قانداستار ءۇشىن تۋعان ءتىل ماسەلەسى وتكىر بولىپ تۇر. وسىعان «وتانداستار قورى» مەن قاۋىمداستىقتىڭ كوپ كوڭىل ءبولۋىن سۇرادى. تورعىننىڭ باسقارۋىنداعى ۇيىم دا ءقازىر قازاق ءتىلىنىڭ قولدانۋ اياسىن كەڭەيتۋ، ۇلتتىق مادەنيەتتى ناسيحاتتاۋ ماقساتىندا ەڭبەكتەنىپ جاتقاندىعىن ايتتى.

ال جۇڭگو ەلىندەگى قانداسىمىز تالاپحان ءپاتىحان ۇلى سول ءتىل ماسەلەسىن شەشۋدىڭ ۇتىمدى جولىن ويلاپ تاۋىپتى. ول كەزدەسۋ بارىسىندا بالالاردىڭ قازاق ءتىلىن وڭاي ۇيرەنۋىنە ارنالعان اۆتورلىق جوباسى «قاستەرلى قالام» وقۋ قۇرالىمەن تانىستىردى. ايتۋىنشا، ول ارقىلى بالا قازاقتىڭ ەرتەگى-اڭىزدارىن، ماقال-ماتەلدەرىن، ولەڭ-جىرلارىن، ەسەپ-قيسابىن، جاڭىلتپاشتارىن، ءتىپتى الاش ارداقتىلارىنىڭ سۋرەتى، ءاتى-جونى، ەڭبەگىنە دەيىن مەڭگەرىپ شىعادى.

كەزدەسۋ اياسىندا «وتانداستار قورى» شاقىرىلعان قوناقتارمەن ەكىجاقتى سەرىكتەستىك مەموراندۋمدارعا قول قويىپ، شەتەلدەگى قازاق دياسپورالارى مەن ەلگە ورالعان وتانداستاردى قولداۋ، قانداستاردى تاريحي وتان توڭىرەگىندە بىرلەستىرۋ باعىتىندا كۇش بىرىكتىرۋگە كەلىستى.

 

شەتەلدەگى قانداستاردىڭ جوعارى ءبىلىم الۋىنا قولداۋ جاسالادى
26 اقپان 2019
شەتەلدەگى قانداستاردىڭ جوعارى ءبىلىم الۋىنا قولداۋ جاسالادى

بۇگىن «وتانداستار» قورى ءبىرىنشى ۆيسە-پرەزيدەنتى تالعات ادۋوۆ پەن حالىقارالىق باعدارلامالار ورتالىعىنىڭ پرەزيدەنتى جانبولات مەلدەشوۆ كەزدەستى. تاراپتار ءبىلىم سالاسىنداعى ىنتىماقتاستىق تۋرالى مەموراندۋمعا قول قويدى. بۇل تۋرالى قوردىڭ باسپا ءسوز قىزمەتى اقپارات تاراتتى.

ديدار بولات – «وتانداستار» قورى پرەزيدەنتىنىڭ كەڭەسشىسى:  «بولاشاق» – ستۋدەنت جاستاردى قازاقستانعا جانە كەرىسىنشە قازاقستاننان شەتەلدىك جوعارى وقۋ ورىندارىنا تارتاتىن نەگىزگى ۇيىمداردىڭ ءبىرى. وسىنى نەگىزگە الا وتىرىپ، ءبىز كۇش بىرىكتىرگەلى وتىرمىز. مۇنداعى ماقسات – شەتەلدە تۇراتىن قانداستارىمىزدىڭ قالاۋىنشا قازاقستاندا نەمەسە شەتەلدىڭ ايگىلى جوعارى وقۋ ورىندارىندا ءبىلىم الۋ مۇمكىندىگىن قامتاماسىز ەتۋ».

جاقىن كۇندەرى «وتانداستار» قورى مەن حالىقارالىق باعدارلامالار ورتالىعى وكىلدەرىنىڭ موڭعوليا، وزبەكستان جانە رەسەي فەدەراسياسىنا بىرلەسكەن ساپار جاسايدى.  ولار شەتەلدەگى قانداستارمەن، دالىرەك مەكتەپ وقۋشىلارىمەن كەزدەسىپ، قازاقستاندا جانە شەتەلدىك جەتەكشى جوعارعى وقۋ ورىندارىندا ءبىلىم الۋ مۇمكىندىكتەرى جايلى اقپاراتتاندىراتىن بولادى.

ديدار بولات – «وتانداستار» قورى پرەزيدەنتىنىڭ كەڭەسشىسى:  «كەلەسى ايدا ءبىز موڭعولياعا، 120 مىڭعا جۋىق قازاق تۇراتىن بايان-ولگەي اۋدانىنا اتتانامىز. ونداعى قانداستارىمىزدىڭ شامامەن ءبىر جارىم مىڭى - بيىلعى مەكتەپ ءبىتىرۋشى تۇلەكتەر. ياعني قازاقستاندىق ءبىلىم وردالارىنا تۇسە الاتىن الەۋەتتى ستۋدەنتتەر. ماسەلەن، وتكەن جىلى وزبەكستاننان قازاقستاندا ءبىلىم الۋعا 12 مىڭ بالا كەلسە، ونىڭ 5 مىڭعا جۋىعى – ەتنيكالىق قازاقتار. ولارعا ىڭعايلى ءتيىمدى جاعدايدىڭ بارلىعى جاسالدى. اقتوبە ۋنيۆەرسيتەتى ءبىر جىل بويى تەگىن وقۋ مۇمكىندىگىن ۇسىندى. مۇنداي باعدارلامالار بىزدە كوپ، تەك قانداستارىمىزعا اقپارات كوپ جاعدايدا جەتپەي جاتادى. ءبىز وسى اقپاراتتاندىرۋ باعىتىندا جۇمىس ىستەيتىن بولامىز».

«وتانداستار» قورى 2017 جىلى ەلباسىنىڭ دۇنيەجۇزى قازاقتارىنىڭ Vء-شى قۇرىلتايىندا ايتقان تىكەلەي تاپسىرماسىمەن قۇرىلعان بولاتىن. قور قانداستاردى تاريحي وتان توڭىرەگىندە بىرلەستىرۋدى ماقسات تۇتادى. جۇمىس جوسپارىنداعى باسىم باعىتتارىنىڭ ءبىرى – ءبىلىم سالاسى.

ءبىز تۋرالى
ulys.kz — اقپاراتتىق، ساراپتامالىق جانە تانىمدىق باعىتتاعى ماتەريالداردى بەرەدى.
 
مۋلتيمەديالىق جوبا زامان تالابىنا ساي جاسالعان. قازاقستاننىڭ اقپاراتتىق نارىعىن ساپالى
كونتەنتپەن قامتاماسىز ەتۋگە ۇلەس قوسۋعا باعىتتالعان. مۇنداعى ساراپتامالىق، تانىمدىق
ماقالالار سان سالانى قامتيدى. گەوستراتەگيا، گەوەكونوميكا، گەوساياسات، حالىقارالىق
قاتىناستار مەن ەلدىڭ ىشكى-سىرتقى ساياساتى، ەكونوميكا، جاھاندا بولىپ جاتقان تەكتونيكالىق
وزگەرىستەر مەن ترەند تاقىرىپتار ۇلتتىق مۇددە تۇرعىسىنان تەرەڭ تالدانىپ قازاق
وقىرماندارىنا جەتكىزىلەدى. ورتالىق ازيا مەن تۇركى الەمىنە ەرەكشە كوڭىل بولىنەدى.