قازاقستان پرەزيدەنتى تۇركىتىلدەس مەملەكەتتەردىڭ ىنتىماقتاستىق كەڭەسىنىڭ باس حاتشىسى باعدات امىرەيەۆتى قابىلدادى دەپ حابارلايدى اقوردا سايتى. ونداعى اقپارعا قاراعاندا، كەزدەسۋ بارىسىندا مەملەكەت باسشىسىنا ۇيىمنىڭ قازىرگى جۇمىستارىنىڭ نەگىزگى باعىتتارى، سونىڭ ىشىندە بيىل قازان ايىندا باكۋدە وتەتىن تۇرىك كەڭەسىنىڭ سامميتىنە دايىندىق بارىسى تۋرالى باياندالعان. ءوز كەزەگىندە
قاسىم-جومارت توقايەۆ ۇيىمعا مۇشە ەلدەر اراسىندا ەكونوميكالىق جانە مادەني-گۋمانيتارلىق قاتىناستاردى دامىتۋعا ماڭىزدى ۇلەس قوسىپ كەلە جاتقان كەڭەس اياسىنداعى ءوزارا ىقپالداستىققا قازاقستاننىڭ ءداستۇرلى تۇردە زور ءمان بەرەتىنىن اتاپ وتكەن.
![پرەزيدەنت تۇركى كەڭەسىنىڭ باس حاتشىسى باعدات امىرەيەۆتى قابىلدادى](https://ulys.kz/system/news/images/000/000/305/normal/7415a127d9ba25d4d33e7e82bcf5d8d2.jpg)
![تۇركى كەڭەسى اقپاراتتىق-كوممۋنيكاسيالىق تەحنولوگيالار بويىنشا مينيسترلەرىنىڭ ءۇشىنشى كەزدەسۋى باستالدى](https://ulys.kz//system/news/images/000/000/103/normal/WhatsApp_Image_2019-01-31_at_12.58.33.jpeg)
الماتى قالاسىندا تۇركى كەڭەسى اقپاراتتىق-كوممۋنيكاسيالىق تەحنولوگيالار بويىنشا مينيسترلەرىنىڭ ءۇشىنشى كەزدەسۋى باستالدى. تۇركى كەڭەسىنىڭ باس حاتشىسى باعدات امىرەيەۆتىڭ توراعىلىعىمەن ءوتىپ جاتقان جيىنعا ق ر اقپارات جانە كوممۋنيكاسيالار ءمينيسترى داۋرەن ابايەۆ، تۇركيانىڭ قاتىناس جانە ينفراقۇرىلىم ءمينيسترى مەحمەت تۋرحان، قىرعىز رەسپۋبليكاسى اقپاراتتىق تەحنولوگيالار جانە بايلانىس مەملەكەتتىك كوميتەتىنىڭ ءتوراعاسى باقىت شارشەمبييەۆ، ازەربايجان رەسپۋبليكاسىنىڭ كولىك، بايلانىس پەن جوعارى تەحنولوگيالار ءمينيسترىنىڭ ورىنباسارى ەلمير ۆەليزادا، سونىمەن قاتار ماجارستانننىڭ ينفوكومۋنيكاسيا، يننوۆاسيا مەن تەحنولوگيالار مينيسترلىگىنىڭ مەملەكەتتىك حاتشىسىنىڭ ورىنباسارى كارولي سوليمار قاتىسۋدا.
تاراپتار كيبەرقاۋىپسىزدىك، ە-ۇكىمەت، TASIM جوباسى مەن عارىش قىزمەتتەرى سالاسىنداعى ىنتىماقتاستىقتىققا قاتىستى ماسەلەلەردى تالقىلاۋدا. قازاقستاننىڭ اقپارات جانە كوممۋنيكاسيالار ءمينيسترى داۋرەن ابايەۆ سالاداعى الەۋەتتى تولىق پايدالانا الماي وتىرعانىمىزدى ايتتى.
![نۇرسۇلتان نازاربايەۆ تۇركى مەملەكەتتەرى باسشىلارىمەن كەزدەستى](https://ulys.kz//system/news/images/000/000/364/normal/15-10-2019-erdogan00008.jpg)
بۇگىن باكۋدە ءوتىپ جاتقان تۇركى تىلدەس مەملەكەتتەردىڭ ىنتىماقتاستىعى كەڭەسىنىڭ 7ء-شى وتىرىسىنا قاتىسىپ جاتقان ەلباسى نۇرسۇلتان نازاربايەۆ تۇركى مەملەكەتتەرىنىڭ پرەزيدەنتتەرىمەن كەزدەستى.
elbasy.kz سايتىنىڭ تاراتقان اقپاراتى بويىنشا، قازاقستاننىڭ تۇڭعىش پرەزيدەنتى تۇركيا رەسپۋبليكاسىنىڭ پرەزيدەنتى رەجەپ ەردوعانمەن كەزدەسكەن. كەزدەسۋ بارىسىندا تاراپتار تۇركى الەمى ەلدەرى ينتەگراسيالىق ۇدەرىسىنىڭ قازىرگى جاعدايى مەن الداعى پەرسپەكتيۆالارىن تالقىلاعان. سونىمەن قاتار، ولار ايماقتىق قاۋىپسىزدىكتى جانە ەۋرازيا قۇرلىعى مەملەكەتتەرىنىڭ تۇراقتى دامۋىن قامتاماسىز ەتۋ ماسەلەلەرى جونىندە پىكىر الماسقان. ال
ەلباسى وزبەكستان رەسپۋبليكاسىنىڭ پرەزيدەنتى شاۆكات ميرزيويەۆپەن كەزدەسۋىندە نۇرسۇلتان نازاربايەۆ شاۆكات ميرزيويەۆتىڭ باسشىلىعىمەن قول جەتكىزىلگەن وزبەكستاننىڭ الەۋمەتتىك-ەكونوميكالىق دامۋىنىڭ ناتيجەلەرىنە توقتالعان. سوسىن ول «قازاقستان مەن وزبەكستان وتە جاقىن جانە ماڭىزدى سەرىكتەس. ءوزارا تاۋار اينالىمى 2،5 ميلليارد دوللارعا جەتتى. بۇعان دەيىن مۇنداي كورسەتكىشتەر بولعان ەمەس. بۇل جاقسى پەرسپەكتيۆالارعا جول اشىپ وتىر»، – دەپ اتاپ وتكەن. ال ءوز كەزەگىندە شاۆكات ميرزيويەۆ بولسا، ەكى ەلدىڭ تابىستى ىنتىماقتاستىعىنا كوبىنە قازاقستاننىڭ تۇڭعىش پرەزيدەنتىنىڭ ساليقالى ساياساتىنىڭ ارقاسىندا قول جەتكىزىلگەنىن ايتقان. سونداي-اق، ش.ميرزيويەۆ وزبەكستانداعى قازاقستان جىلى اياسىندا ءوتىپ جاتقان ءىس-شارالاردىڭ ورىندالۋ بارىسىنا توقتالعان. ال نۇرسۇلتان نازاربايەۆ پەن ازەربايجان رەسپۋبليكاسىنىڭ پرەزيدەنتى يلحام الييەۆپەن كەزدەسۋى بارىسىندا ەلباسى ەكى ەل قاتىناستارىنىڭ دامۋىنداعى وڭ ديناميكانى اتاپ وتكەن.
– بۇل مەنىڭ قازاقستاننىڭ تۇڭعىش پرەزيدەنتى مارتەبەسىندە سىزدەرگە العاش كەلۋىم. ەلىمىزدە ەكونوميكالىق دامۋ باعدارلامالارىن جۇزەگە اسىرۋ جانە تاۋەلسىزدىكتى نىعايتۋ جۇمىستارى جالعاسۋدا. ءبىزدىڭ قارىم-قاتىناسىمىز قارقىندى دامىپ جاتىر. ءقازىر بىزدە ىنتىماقتاستىقتى كەڭەيتۋ ءۇشىن ءبىراز مۇمكىندىك بار. ساۋدا كولەمىن ارتتىرۋ ماڭىزدى. ءبىز ءتيىستى لوگيستيكانى قۇردىق. ەرتەڭ تۇركى كەڭەسىنىڭ وتىرىسى وتەدى. مەن قۇرمەتتى ءتوراعا مارتەبەسىن قۋانا قابىلدادىم، ويتكەنى مەملەكەتتەرىمىزدىڭ اراسىنداعى ىنتىماقتاستىقتى نىعايتۋعا ۇلەس قوسۋدى جالعاستىرعىم كەلەدى، – دەگەن نۇرسۇلتان نازاربايەۆ.
ءوز كەزەگىندە يلحام الييەۆ ەلباسىنا تۇركى كەڭەسىنىڭ وتىرىسىنا كەلگەنى ءۇشىن العىس ءبىلدىردى جانە ونىڭ ەكىجاقتى قاتىناستاردى نىعايتۋعا قوسقان ۇلەسىن اتاپ ءوتتى.
– قازاقستاننىڭ تۇڭعىش پرەزيدەنتىن ازەربايجان جەرىندە قارسى الۋ ءبىز ءۇشىن زور مارتەبە. ءسىز ازەربايجاننىڭ ۇلكەن دوسىسىز. كوپتەگەن حالىقارالىق ماسەلەلەر بويىنشا ءارقاشان ءبىزدىڭ ەلىمىزدى قولدادىڭىز. ءسىزدىڭ تۇركى تىلدەس ەلدەر اراسىنداعى ىنتىماقتاستىقتى نىعايتۋداعى ۇلەسىڭىز وراسان. مەرەيتويلىق ءسامميتتىڭ باكۋدە ءوتىپ جاتقانىنا ءبىز وتە قۋانىشتىمىز، – دەدى ازەربايجان رەسپۋبليكاسىنىڭ پرەزيدەنتى. سونىمەن قاتار، يلحام الييەۆ قازاقستان استاناسىنىڭ سالىنۋى باكۋ قالاسىنىڭ دامۋىنا ۇلگى بولعانىن ايتتى.
– مەن قازاقستان استاناسىنىڭ تەز وزگەرگەنىن بايقادىم. ەكسپو كورمەسىن تاماشالاعان كەزدە قۇرىلىستىڭ اۋقىمى مەن ساۋلەتتىك شەبەرلىگىنە ريزا بولدىم. قازاقستاننىڭ بارلىق جەتىستىكتەرى ءسىزدىڭ اتىڭىزبەن بايلانىستى، – دەدى ازەربايجان رەسپۋبليكاسىنىڭ پرەزيدەنتى.
ال ەلباسى قىرعىز رەسپۋبليكاسىنىڭ پرەزيدەنتى سوورونباي جەەنبەكوۆپەن كەزدەسكەن كەزدە تۇركى ينتەگراسياسىن ودان ءارى تەرەڭدەتۋدىڭ ەرەكشە ماڭىزدىلىعى اتالىپ ءوتتى.
– قازاقستان تۇركى الەمىنىڭ بارلىق ەلدەرىمەن سەرىكتەس. مەن كەڭەستىڭ كوپتەگەن ينستيتۋتتارىن قۇرۋعا باستاماشى بولدىم. ەڭ ماڭىزدىسى – ەلدەرىمىز اراسىنداعى بەيبىتشىلىك پەن كەلىسىمدى قامتاماسىز ەتۋ، – دەدى ەلباسى.
ال ءوز كەزەگىندە سوورونباي جەەنبەكوۆ قازاقستاننىڭ تۇڭعىش پرەزيدەنتىنىڭ تۇركى ەلدەرى اراسىنداعى ىنتىماقتاستىقتى نىعايتۋعا قوسقان ۇلەسىن اتاپ ءوتىپ، ەلباسىنىڭ تۇركى تىلدەس مەملەكەتتەردىڭ ىنتىماقتاستىعى كەڭەسىنىڭ قۇرمەتتى ءتوراعاسى مارتەبەسىنە يە بولۋىمەن قۇتتىقتاعان.
سۋرەتتەر elbasy.kz سايتىنان الىندى.
![«تۇركى كەڭەسىنىڭ» اتاۋى «تۇركىتەكتەس مەملەكەتتەر ۇيىمى» بولىپ وزگەرۋى مۇمكىن](https://ulys.kz//system/news/images/000/000/365/normal/008_00000.jpg)
بۇگىن ازەربايجاننىڭ استاناسى باكۋدە تۇركى تىلدەس مەملەكەتتەردىڭ ىنتىماقتاستىعى كەڭەسىنە (تۇرىك كەڭەسى) مۇشە ەلدەر باسشىلارىنىڭ VII ءسامميتى بولىپ ءوتتى
جيىنعا قازاقستاننىڭ تۇڭعىش پرەزيدەنتى — ەلباسى نۇرسۇلتان نازاربايەۆ، تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان، وزبەكستان رەسپۋبليكاسىنىڭ پرەزيدەنتى شاۆكات ميرزيويەۆ، ازەربايجان رەسپۋبليكاسىنىڭ پرەزيدەنتى يلحام الييەۆ، قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ، ۆەنگريانىڭ پرەمەر-مينيسترى ۆيكتور وربان، تۇرىكمەنستان رەسپۋبليكاسى پرەمەر-مينيسترىنىڭ ورىنباسارى پۋرلي اگامۋرادوۆ پەن تۇركى كەڭەسىنىڭ باس حاتشىسى باعداد امىرەيەۆ قاتىستى.
الدىمەن سامميتكە قاتىسۋشىلار بىرگە ەستەلىك سۋرەتكە ءتۇستى. سوسىن ازەربايجان رەسپۋبليكاسىنىڭ پرەزيدەنتى يلحام الييەۆ ءسامميتتى سالتاناتتى تۇردە اشىپ، القالى باسقوسۋعا كەلگەندەرگە ءوز رازىلىعىن ءبىلدىردى. ودان سوڭ ءسوز العان قىرعىز رەسپۋبليكاسىنىڭ پرەزيدەنتى سوورونباي جەەنبەكوۆ تۇركى كەڭەسىنىڭ ءتوراعالىعى ازەربايجانعا وتەتىنىن حابارلادى. ىلە-شالا ازەربايجان رەسپۋبليكاسىنىڭ پرەزيدەنتى يلحام الييەۆ قازاقستاننىڭ تۇڭعىش پرەزيدەنتى — ەلباسى، «تۇركى كەڭەسىنىڭ قۇرمەتتى ءتوراعاسى» نۇرسۇلتان نازاربايەۆقا «تۇركى الەمىنىڭ جوعارى وردەنىن» تاپسىردى. ودان كەيىن قازاقستاننىڭ تۇڭعىش پرەزيدەنتى — ەلباسى نۇرسۇلتان نازاربايەۆ، تۇركيا رەسپۋبليكاسىنىڭ پرەزيدەنتى رەجەپ تايىپ ەردوعان، وزبەكستان رەسپۋبليكاسىنىڭ پرەزيدەنتى شاۆكات ميرزيويەۆ، ۆەنگريانىڭ پرەمەر-مينيسترى ۆيكتور وربان، تۇرىكمەنستان رەسپۋبليكاسى پرەمەر-مينيسترىنىڭ ورىنباسارى پۋرلي اگامۋرادوۆ پەن تۇركى كەڭەسىنىڭ باس حاتشىسى باعداد امىرەيەۆ ءسوز سويلەدى. بۇدان كەيىن كەلەسى ءسامميتتى تۇركيا رەسپۋبيكاسىندا وتكىزۋ تۋرالى شەشىم قابىلداندى. ارى قاراي قۇجاتتارعا قول قويۋ راسىمدەرى جاسالدى. سوڭىندا ازەربايجان رەسپۋبليكاسىنىڭ پرەزيدەنتى يلحام الييەۆ تۇركى كەڭەسىنە مۇشە ەلدەر باسشىلارىنىڭ VII ءسامميتىن قورىتىندىلادى. ايتا كەتەرلىگى، بۇل جولى تۇركى كەڭەسىنە وزبەكستان رەسپۋبليكاسى تولىققاندى مۇشە بولدى. ءوز كەزەگىندە نۇرسۇلتان نازاربايەۆ «كەڭەستىڭ قۇرامىنا وزبەكستاننىڭ مۇشە بولۋى – بۇكىل تۇركى تىلدەس قاۋىمداستىق ءۇشىن تاريحي ءارى كوپتەن كۇتكەن وقيعا. بۋداپەشتتە تۇركى كەڭەسىنىڭ وكىلدىگىن اشۋ - ىنتىماقتاستىقتىڭ ەۋروپا ۆەكتورىن دامىتۋدا ەرەكشە ماڭىزدى»،-دەدى. سوسىن ول «بولاشاقتا كەڭەسىمىزدىڭ اتاۋىن قايتا قاراۋدى ۇسىنامىن. تۇركى تىلدەس مەملەكەتتەر ىنتىماقتاستىعى كەڭەسىن ۇيىم دەڭگەيىنە دەيىن كوتەرۋگە بولادى دەپ سانايمىن. وسىلايشا، ءبىزدىڭ قۇرىلىمدى «تۇركىتەكتەس مەملەكەتتەر ۇيىمى» دەپ اتاۋعا بولادى»، – دەپ ويىن تۇيىندەدى.
سۋرەتتەر president.az سايتىنان الىندى.
![ءبىز تۋرالى](/uploads/images/20240518112432151.jpg)